ନୂଆଦିଲ୍ଲୀ,୧୬/୧୦ : ଏବେ ଭାରତ ଏବଂ କାନାଡା ମଧ୍ୟରେ କୂଟନୈତିକ ସମ୍ପର୍କ ବିଗିଡିଛି । ଫଳରେ ଦ୍ୱିପାକ୍ଷିକ ବାଣିଜ୍ୟ ଉପରେ ଏହାର କଳାବାଦଲ ଦେଖାଯାଇଛି । ଖଲିସ୍ଥାନି ଆତଙ୍କୀ ହର୍‌ଦୀପ ସିଂ ନିଜ୍ଜରଙ୍କୁ କାନାଡାରେ ହତ୍ୟା ପରେ ଏଭଳି ସ୍ଥିତି ଉପୁଜିଛି । ଏବେ ଉଭୟ ଦେଶ କୂଟନୀତିଜ୍ଞମାନଙ୍କୁ ଫେରାଇ ଆଣିଛନ୍ତି । ଭାରତ କାନାଡା ସମ୍ପର୍କ ଏବେ ଦୋଛକିରେ ଥିବା ଯୋଗୁ ୭୦ ହଜାର କୋଟିର କାରବାର ଉପରେ ସଙ୍କଟ ସୃଷ୍ଟି ହୋଇଛି । ଥିଙ୍କ ଟ୍ୟାଙ୍କ ଜିଟିଆର୍‌ଆଇ ମୁତାବକ, ଏବେ ଯାଏ ଭାରତ କାନାଡା ଦ୍ୱିପାକ୍ଷିକ କାରବାର ଉପରେ ସେତେଟା ପ୍ରଭାବ ପଡିନି । ତେବେ ଏହି ବିବାଦ ସମାଧାନ ନ ହେଲେ ଏହା ସମସ୍ୟା ସୃଷ୍ଟିକରିବ । କାରବାର ସ୍ଥିତି ସମ୍ଭାଳିବା ଲାଗି ସତର୍କତା ଅବଲମ୍ବନ କରିବାକୁ ହେବ । ଏବେ ଉଭୟ ଦେଶ ମଧ୍ୟରେ ଦ୍ୱିପାକ୍ଷିକ କାରବାର ଲଗାତାର ବୃଦ୍ଧି ହେଉଥିବାରୁ ସତର୍କତା ଜରୁରି ହୋଇପଡିଛି । ୨୦୨୨-୨୩ରେ ଭାରତ ଓ କାନାଡା ମଧ୍ୟରେ ଦ୍ୱିପାକ୍ଷିକ ବାଣିଜ୍ୟ ୮.୩ ବିଲିୟନ ଡଲାର ସ୍ତରରେ ଥିଲା । ୨୦୨୩- ୨୪ରେ ଏହା ୮.୪ ବିଲିୟନ ଡଲାର (୭୦,୬୧୧ କୋଟି) ଛୁଇଁଛି । କାନାଡାରୁ ଭାରତ ୪.୬ ବିଲିୟନ ଡଲାରର ସାମଗ୍ରୀ ଆମଦାନି କରିଛି । ରପ୍ତାନିରେ ସାମାନ୍ୟ ହ୍ରାସ ହୋଇ ୩.୪ ବିଲିୟନ ଡଲାର ସ୍ତରରେ ରହିଛି । କାନାଡାର ବିଭିନ୍ନ ପେନସନ ଫଣ୍ଡ ୬ ଲକ୍ଷ କୋଟି ଟଙ୍କାର ନିବେଶ କରିଛନ୍ତି । ୬୦୦ କାନାଡା କମ୍ପାନି ଭାରତରେ ଉପସ୍ଥିତି ଜାହିର କରିଛନ୍ତି । ସିଆଇଆଇ ରିପୋର୍ଟ ମୁତାବକ, କାନାଡାରେ ୩୦ରୁ ଊଦ୍ଧ୍ୱର୍ ଭାରତୀୟ କମ୍ପାନି ଉପସ୍ଥିତି ଜାହିର କରିଛନ୍ତି । ଏହି କମ୍ପାନି ଗୁଡିକ ୪୦ ହଜାର କୋଟିରୁ ଊଦ୍ଧ୍ୱର୍ ନିବେଶ କରିଛନ୍ତି । ବର୍ତ୍ତମାନ ସଙ୍କଟ ବଢ଼ିଲେ ଏହା ସମସ୍ୟାକୁ ଡାକି ଆଣିବ ବୋଲି କୁହାଯାଉଛି ।