ନୂଆଦିଲ୍ଲୀ,୨୫/୦୮: ଭାରତ ସରକାର ବାୟୁସେନା ଓ ନୌସେନାର ଶକ୍ତି ବଢ଼ାଇବା ପାଇଁ ଦୁଇଟି ବଡ଼ ଚୁକ୍ତି ଲାଗି ପ୍ରସ୍ତୁତି ଚଳାଇଛନ୍ତି । ପ୍ରଥମ ଚୁକ୍ତିରେ ପ୍ରତିରକ୍ଷା ମନ୍ତ୍ରଣାଳୟ ଓ ମଝଗାଓଁ ଡକ୍ୟାର୍ଡସ ଲିମିଟେଡ୍ (ଏମ୍ଡିଏଲ୍) ଜର୍ମାନୀଠାରୁ ୬ଟି ବୁଡ଼ାଜାହାଜ କିଣିବେ । ସରକାର ‘ପ୍ରୋଜେକ୍ଟ ୭୫ ଇଣ୍ଡିଆ’ରେ ଭାରତରେ ନିର୍ମିତ ହେଉଥିବା ଏହି ବୁଡ଼ାଜାହାଜର କ୍ରୟକୁ ନେଇ କଥାବାର୍ତ୍ତା ଆରମ୍ଭ ଲାଗି ଅନୁମୋଦନ ଦେଇଛନ୍ତି । ଏହି ଚୁକ୍ତି ୭୦ ହଜାର କୋଟି ଟଙ୍କାରେ ହୋଇପାରେ ।ସେହିଭଳି ଭାରତ ସରକାର ଇସ୍ରାଏଲଠାରୁ ର୍ୟାମ୍ପେଜ୍ ଏୟାର-ଟୁ-ଗ୍ରାଉଣ୍ଡ ମିସାଇଲ କିଣିବେ ।
ସୂତ୍ର ମୁତାବକ, ଖୁବଶୀଘ୍ର ଏହି ଅର୍ଡର ପାଇଁ ଫାଷ୍ଟଟ୍ରାକ୍ ଭିତ୍ତିରେ ପ୍ରକ୍ରିୟା ଆରମ୍ଭ ହେବ । ଅପରେସନ ସିନ୍ଦୂର ବେଳେ ପାକିସ୍ତାନର ମୁରିଦ୍କେ ଓ ବହାବଳପୁରସ୍ଥିତ ଆତଙ୍କବାଦୀଙ୍କ ମୁଖ୍ୟାଳୟ ଉପରେ ସଠିକ୍ ଆକ୍ରମଣ ପାଇଁ ର୍ୟାମ୍ପେଜ୍ ମିସାଇଲ୍କୁ ବ୍ୟବହାର କରାଯାଇଥିଲା । ପ୍ରତିରକ୍ଷା ମନ୍ତ୍ରଣାଳୟ ଚଳିତବର୍ଷ ଜାନୁଆରୀରେ ଜର୍ମାନ୍ କମ୍ପାନି ଥିସେନକ୍ରୁପ୍ ମେରାଇନ୍ ସିଷ୍ଟମ୍ସ ସହ ଏୟାର ଇଣ୍ଡିପେଣ୍ଡେଣ୍ଟ ପ୍ରପଲ୍ସନ ସିଷ୍ଟମ୍ ବିଶିଷ୍ଟ ୬ଟି ବୁଡ଼ାଜାହାଜ ଉତ୍ପାଦନ ଲାଗି ମଝଗାଓଁ ଡକ୍ୟାର୍ଡକୁ ନିଜ ଭାଗୀଦାର ଭାବେ ଚୟନ କରିଥିଲା।
