ନୂଆଦିଲ୍ଲୀ, ୧୧।୫: ପଶ୍ଚିମ ଏସିଆରେ ଲାଗି ରହିଥିବା ଯୁଦ୍ଧ ଓ ଅସ୍ଥିରତା ମଧ୍ୟରେ ଭାରତ ନିଜର ରଣନୀତିକ ସଫଳତା ହାସଲ କରିଛି । ବିଶ୍ୱର ସବୁଠାରୁ ଗୁରୁତ୍ୱପୂର୍ଣ୍ଣ ଜଳପଥ 'ଷ୍ଟ୍ରେଟ୍ ଅଫ୍ ହୋର୍ମୁଜ୍'ରେ ଉତ୍ତେଜନା ଲାଗି ରହିଥିବା ବେଳେ ଭାରତ ଏହାର ବିକଳ୍ପ ମାର୍ଗ ଖୋଜି ବାହାର କରିଛି । ସଂଯୁକ୍ତ ଆରବ ଏମିରେଟ୍ସ (UAE) ର ‘ଫୁଜୈରା ପୋର୍ଟ’କୁ ନେଇ ଭାରତ ଏକ ବଡ଼ ଚୁକ୍ତି କରିବାକୁ ଯାଉଛି । ଏହି ଚୁକ୍ତି ଦ୍ୱାରା କେବଳ ବ୍ୟବସାୟ ନୁହେଁ, ବରଂ ସଙ୍କଟ ସମୟରେ ଲକ୍ଷ ଲକ୍ଷ ଭାରତୀୟ ଶ୍ରମିକଙ୍କୁ ସୁରକ୍ଷିତ ଭାବେ ଉଦ୍ଧାର କରାଯାଇପାରିବ ।
୧୫ ମେ’ରେ ହୋଇପାରେ ଐତିହାସିକ ଚୁକ୍ତି:
ଆସନ୍ତା ମେ ୧୫ ତାରିଖରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ନିଜର ୟୁରୋପ ଗସ୍ତ ଆରମ୍ଭ କରିବାକୁ ଯାଉଛନ୍ତି । ଏହି ଗସ୍ତର ପ୍ରଥମ ପର୍ଯ୍ୟାୟରେ ସେ ୟୁଏଇର ଫୁଜୈରା ପୋର୍ଟରେ ରହିବେ । ସେଠାରେ ଉଭୟ ଦେଶ ମଧ୍ୟରେ ଏହି ଗୁରୁତ୍ୱପୂର୍ଣ୍ଣ ଚୁକ୍ତି ସ୍ୱାକ୍ଷରିତ ହେବାର ସମ୍ଭାବନା ରହିଛି । ଏହାପରେ ପିଏମ୍ ମୋଦୀ ନିଦରଲ୍ୟାଣ୍ଡ, ସ୍ୱିଡେନ, ନରୱେ ଏବଂ ଇଟାଲୀ ଗସ୍ତ କରିବେ ।
ଭାରତୀୟଙ୍କ ପାଇଁ ‘ଲାଇଫ୍ ଲାଇନ୍’ ସାଜିବ ଫୁଜୈରା:
ଇରାନ, ଆମେରିକା ଏବଂ ଇସ୍ରାଏଲ୍ ମଧ୍ୟରେ ଚାଲିଥିବା ସଂଘର୍ଷ ଯୋଗୁଁ ଖାଡ଼ି ଦେଶଗୁଡ଼ିକରେ ବିମାନ ଚଳାଚଳ ବାଧାପ୍ରାପ୍ତ ହେଉଛି । ପଶ୍ଚିମ ଏସିଆରେ ପ୍ରାୟ ୧ କୋଟି ଭାରତୀୟ କାମ କରନ୍ତି, ଯେଉଁଥିରୁ କେବଳ ୟୁଏଇରେ ୪୩ ଲକ୍ଷରୁ ଅଧିକ ଭାରତୀୟ ଅଛନ୍ତି । ଯଦି ଯୁଦ୍ଧ ଯୋଗୁଁ ଆକାଶ ମାର୍ଗ ବନ୍ଦ ହୋଇଯାଏ, ତେବେ ଫୁଜୈରା ପୋର୍ଟ ଦେଇ ଜାହାଜ ସାହାଯ୍ୟରେ ଲକ୍ଷ ଲକ୍ଷ ଭାରତୀୟଙ୍କୁ ସିଧାସଳଖ ଭାରତ ଅଣାଯାଇପାରିବ ।
କାହିଁକି ଏହି ବନ୍ଦର ଏତେ ଗୁରୁତ୍ୱପୂର୍ଣ୍ଣ ?
ଫୁଜୈରା ପୋର୍ଟ ହୋର୍ମୁଜ୍ ଷ୍ଟ୍ରେଟ୍ର ପଶ୍ଚିମ ଦିଗରେ ଅବସ୍ଥିତ । ସାଧାରଣତଃ ପାରସ୍ୟ ଖାଡ଼ିରୁ ତେଲ ରପ୍ତାନି ପାଇଁ ହୋର୍ମୁଜ୍ ଏକମାତ୍ର ମୁଖ୍ୟ ରାସ୍ତା । ଯଦି ଇରାନ ଏହି ରାସ୍ତାକୁ ବନ୍ଦ କରିଦିଏ, ତେବେ ସାରା ବିଶ୍ୱରେ ତେଲ ସଙ୍କଟ ଦେଖାଦେବ । କିନ୍ତୁ ଫୁଜୈରା ଏକମାତ୍ର ବନ୍ଦର ଯାହା ହୋର୍ମୁଜ୍ ଷ୍ଟ୍ରେଟ୍ ବାହାରେ ଅବସ୍ଥିତ ଏବଂ ଏଠାରୁ ଜାହାଜଗୁଡ଼ିକ ସିଧାସଳଖ ଭାରତ ମହାସାଗରକୁ ଆସିପାରିବେ ।
ଅର୍ଥନୈତିକ କରିଡର ଏବଂ ବିକଳ୍ପ ମାର୍ଗ:
ଫୁଜୈରା ପୋର୍ଟ କେବଳ ତେଲ ପାଇଁ ନୁହେଁ, ବରଂ ପ୍ରସ୍ତାବିତ ‘ଭାରତ-ମଧ୍ୟପ୍ରାଚ୍ୟ-ୟୁରୋପ ଅର୍ଥନୈତିକ କରିଡର’ (IMEC) ର ଏକ ପ୍ରମୁଖ କେନ୍ଦ୍ର ଭାବରେ ଉଭା ହେବ । ଦୁବାଇ ବନ୍ଦରରେ କୌଣସି ସମସ୍ୟା ଉପୁଜିଲେ, ଫୁଜୈରା ଏବଂ ଖୋର ଫକ୍କର ବନ୍ଦର ଦେଇ ଭାରତୀୟ ପଣ୍ୟଦ୍ରବ୍ୟ ସଡ଼କ ମାର୍ଗରେ ୟୁଏଇକୁ ପଠାଯାଇପାରିବ ।
ସାଉଦି ଆରବକୁ ଶକ୍ତ ଜବାବ !
ବିଶେଷଜ୍ଞଙ୍କ ମତରେ, ୟୁଏଇ ସହ ଭାରତର ଏହି ନିବିଡ଼ ସମ୍ପର୍କ ସାଉଦି ଆରବ ପାଇଁ ଏକ ବଡ଼ ସଙ୍କେତ । ସାଉଦି ଆରବ ପକ୍ଷରୁ କଞ୍ଚା ତେଲ ଉପରେ ଆଦାୟ କରାଯାଉଥିବା ‘ଏସିଆନ୍ ପ୍ରିମିୟମ’ରୁ ଭାରତ ଏବେ ମୁକ୍ତି ପାଇପାରିବ । ୟୁଏଇ ସହ ମୁକ୍ତ ବ୍ୟାପାର ଚୁକ୍ତି (FTA) ପରେ ଦୁଇ ଦେଶ ମଧ୍ୟରେ ବାଣିଜ୍ୟ ବହୁଗୁଣିତ ହୋଇଛି, ଯାହା ଭାରତୀୟ ଅର୍ଥନୀତିକୁ ସୁଦୃଢ଼ କରିବ । ପ୍ରଧାନମନ୍ତ୍ରୀଙ୍କ ଏହି ଗସ୍ତ ଏବଂ ଫୁଜୈରା ଚୁକ୍ତି ଭାରତର ଦୂରଦୃଷ୍ଟି ସମ୍ପନ୍ନ ବୈଦେଶିକ ନୀତିର ଏକ ବଡ଼ ବିଜୟ ବୋଲି କୁହାଯାଉଛି ।
ଆହୁରି ପଢ଼ନ୍ତୁ... US-Iran War: ଆମେରିକା ଶାନ୍ତି ପ୍ରସ୍ତାବକୁ ଇରାନର ଖାରଜ, ଭଡ଼କିଲେ ଟ୍ରମ୍ପ କହିଲେ ୪୭ ବର୍ଷ ହେବ...
