ନୂଆଦିଲ୍ଲୀ: ଚୀନ୍ ପୁଣି ଥରେ ଭାରତ ବିରୋଧରେ ଷଡ଼ଯନ୍ତ୍ର କରିବାକୁ ଚେଷ୍ଟା କରିଛି। ପାକିସ୍ତାନ ସହିତ ଉତ୍ତେଜନା ମଧ୍ୟରେ ଏହା ଅରୁଣାଚଳ ପ୍ରଦେଶର କିଛି ସ୍ଥାନର ନାମ ପରିବର୍ତ୍ତନ କରିଛି। ଭାରତ ଏହି ପ୍ରସଙ୍ଗରେ ଚୀନକୁ ଉଚିତ ଜବାବ ଦେଇଛି। ବୁଧବାର ଦିନ ଭାରତ ଚୀନର ହୀନ ପ୍ରୟାସକୁ ସ୍ପଷ୍ଟ ଭାବରେ ପ୍ରତ୍ୟାଖ୍ୟାନ କରିଛି ଏବଂ କହିଛି ଯେ ଏପରି ହୀନ ପ୍ରୟାସ ଏହି ସତ୍ୟକୁ ପରିବର୍ତ୍ତନ କରିବ ନାହିଁ।
ଅରୁଣାଚଳ ପ୍ରଦେଶ ପ୍ରସଙ୍ଗରେ ଭାରତ ଚୀନକୁ ଏକ କଡ଼ା ବାର୍ତ୍ତା ଦେଇଛି ଏବଂ କହିଛି କି,"ସତ୍ୟ କେବେ ପରିବର୍ତ୍ତନ ହୋଇପାରିବ ନାହିଁ।"ଏହି ରାଜ୍ୟ ଭାରତର ଏକ ଅବିଚ୍ଛେଦ୍ୟ ଅଙ୍ଗ ଥିଲା, ଅଛି ଏବଂ ରହିବ।" ଅରୁଣାଚଳ ପ୍ରଦେଶର କିଛି ସ୍ଥାନ ପାଇଁ ଚୀନ୍ ଦ୍ୱାରା ଏହାର ନାମ ଘୋଷଣା ଉପରେ ଭାରତ ଏଭଳି ପ୍ରତିକ୍ରିୟା ଦେଇଛି। ସେପଟେ ଚୀନ୍ ଦାବି କରୁଛି ଯେ, ଅରୁଣାଚଳ ପ୍ରଦେଶ ତିବ୍ଦତର ଦକ୍ଷିଣ ଅଂଶ।
ବୈଦେଶିକ ମନ୍ତ୍ରଣାଳୟର ମୁଖପାତ୍ର ରଣଧୀର ଜୟସୱାଲ କହିଛନ୍ତି କି, "ଆମେ ଦେଖିଛୁ ଯେ ଚୀନ୍ ଭାରତୀୟ ରାଜ୍ୟ ଅରୁଣାଚଳ ପ୍ରଦେଶର ସ୍ଥାନ ଗୁଡ଼ିକର ନାମ ପରିବର୍ତ୍ତନ କରିବା ପାଇଁ ଏକ ହୀନ ପ୍ରୟାସ କରିଛି। ସେ କହିଛନ୍ତି, "ଆମର ନୀତିଗତ ଦୃଷ୍ଟିକୋଣ ଅନୁଯାୟୀ ଆମେ ଏପରି ପ୍ରୟାସକୁ ସ୍ପଷ୍ଟ ଭାବରେ ପ୍ରତ୍ୟାଖ୍ୟାନ କରୁଛୁ।"
