ନୂଆଦିଲ୍ଲୀ, ୦୩/୦୪ : ଫ୍ରାନ୍ସ ରାଷ୍ଟ୍ରପତି ଇମାନୁଏଲ ମାକ୍ରନ ଏବଂ ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ମଧ୍ୟରେ ନିକଟରେ ଏକ ଔପୋଚାରିକ ସାକ୍ଷାତ ପରେ ଏକ ବଡ଼ ଖବର ସାମ୍ନାକୁ ଆସିଛି । ଖବର ଅନୁସାରେ, ଫ୍ଲାଇଙ୍ଗ୍ ହ୍ୱିଲ୍ସ ଏବଂ ଭାରତର ବିଏଲ୍ପି ଗ୍ରୁପ୍ ମଧ୍ୟରେ ଏକ ସହଯୋଗିତା ହୋଇଛି । ଏହି ସହଯୋଗିତାର ଉଦ୍ଦେଶ୍ୟ ହେଉଛି ଭାରତକୁ ପରବର୍ତ୍ତୀ ପିଢ଼ି କାର୍ଗୋ ଏୟାରସିପ୍ ବିନିର୍ମାଣର ବିଶ୍ୱ ହବ୍ ରେ ରୂପାନ୍ତର କରିବା । ଏହି ସହଯୋଗିତା ଏକ ବଡ଼ ଔଦ୍ୟୋଗିକ ଯୋଜନାର ପ୍ରଥମ ଅଂଶ । ଏହା ମାଧ୍ୟମରେ ଫ୍ରାନ୍ସ ଏବଂ କାନାଡା ପରେ ଭାରତ ଫ୍ଲାଇଙ୍ଗ୍ ହ୍ୱିଲ୍ସର ତୃତୀୟ ଗ୍ଲୋବାଲ ମାନୁଫାକ୍ଚରିଂ ହବ୍ ହେବ । ଏହାସହିତ ଆଉ ଏକ ଲକ୍ଷ୍ୟ ହେଉଛି ମଧ୍ୟପ୍ରାଚ୍ୟ ଏବଂ ଏସିଆ ପାସିଫିକ୍ କ୍ଷେତ୍ରରେ ହେଭି ଲିଫ୍ଟ ଏୟାର୍ସିପ୍ ଟେକ୍ନୋଲୋଜିକୁ ଦ୍ରୁତ ବେଗରେ ପହଞ୍ଚାଇବା ।
ଏହି ଏମ୍ଓୟୁ ମାଧ୍ୟମରେ ଫ୍ଲାଇଙ୍ଗ୍ ହ୍ୱିଲ୍ସ ଏବଂ ବିଏଲ୍ପି ଗ୍ରୁପ୍ ଏକତ୍ର ହୋଇ ଭାରତରେ ଏଲ୍ସିଏ୬୦ଟି କାର୍ଗୋ ଏୟାର୍ସିପ୍ ର ଆସେମ୍ବଲି ଲାଇନ୍ ବସାଇବେ । ଏହାକୁ ତାମିଲନାଡୁରେ କରିବା ପାଇଁ ବିଚାର ହେଉଛି । ଏହି ପ୍ରକଳ୍ପ ଦ୍ୱାରା ଏରୋନଟିକ୍ସ କ୍ଷେତ୍ରରେ ୩୦୦ରୁ ଅଧିକ ଉଚ୍ଚ-ଦକ୍ଷତାଯୁକ୍ତ ନିଯୁକ୍ତି ସୃଷ୍ଟି ହେବାର ଆଶା ରହିଛି ଏବଂ ଏହାଦ୍ୱାରା ଦେଶର ଏରୋସ୍ପେସ୍ ଯୋଗାଣ ଶୃଙ୍ଖଳକୁ ପ୍ରୋତ୍ସାହନ ମିଳିବ । ଏହାଦ୍ୱାରା ଅତ୍ୟାଧୁନିକ ଏବଂ ନିରନ୍ତର ବିମାନ ନିର୍ମାଣରେ ଭାରତର ସ୍ଥିତି ଅଧିକ ମଜଭୁତ ହେବ । ଭାରତରେ ହେବାକୁ ଥିବା ପ୍ଲାଣ୍ଟ ଫ୍ଲାଇଙ୍ଗ୍ ହ୍ୱିଲ୍ସର ଗ୍ଲୋବାଲ ଷ୍ଟ୍ରକ୍ଚରର ତୃତୀୟ ସ୍ତମ୍ଭ ହେବ । ପ୍ରଥମ ଫ୍ରାନ୍ସରେ ଅଛି, ଯାହା ୟୁରୋପ ଏବଂ ଆଫ୍ରିକାକୁ ଦେଖୁଛି । ଦ୍ୱିତୀୟଟି ଆମେରିକାରେ ଅଛି ଏବଂ ଏବେ ଭାରତର ପ୍ଲାଣ୍ଟ ମଧ୍ୟପ୍ରାଚ୍ୟ ଏବଂ ଏସିଆ ପାସିଫିକ୍ କ୍ଷେତ୍ରର ଆବଶ୍ୟକତାକୁ ପୂରଣ କରିବ ।
ଏହି ଖବରଟିକୁ ପଢନ୍ତୁ- ଦ୍ୱୀପରେ ମିସାଇଲ ଠିକଣା ନିର୍ମାଣ କରୁଛି ଚୀନ୍, ଦ୍ରୁତ ବେଗରେ ଚାଲିଛି କାମ
