ନୂଆଦିଲ୍ଲୀ: ପାକିସ୍ତାନରେ ଆତଙ୍କବାଦୀ ଆଡ୍ଡାଗୁଡ଼ିକୁ ଟାର୍ଗେଟ କରି ଭାରତ ବିଶ୍ୱକୁ  କଡ଼ା ସେନ୍ଦଶ ଦେଇଛି । ଅନ୍ୟପଟେ ଭାରତ ଏହାର ପ୍ରତିରକ୍ଷା କ୍ଷମତାକୁ ଆହୁରି ବୃଦ୍ଧି କରିବା ପାଇଁ ବଡ଼ ଯୋଜନା କରୁଛି । ମହାକାଶ ନିରୀକ୍ଷଣ କ୍ଷମତାକୁ ବୃଦ୍ଧି କରିବା ପାଇଁ ଭାରତ ଆଗାମୀ ପାଞ୍ଚ ବର୍ଷ ମଧ୍ୟରେ ୫୨ଟି ଗୁଇନ୍ଦା ଉପଗ୍ରହକୁ କକ୍ଷପଥରେ ସ୍ଥାପନ କରିବ। ବୁଧବାର ଦିନ ଭାରତୀୟ ଜାତୀୟ ମହାକାଶ ପ୍ରୋତ୍ସାହନ ଏବଂ ପ୍ରାଧିକରଣ କେନ୍ଦ୍ର (IN-SPACE)ର ଅଧ୍ୟକ୍ଷ ପବନ କୁମାର ଗୋଏଙ୍କା ଏହି ସୂଚନା ଦେଇଛନ୍ତି ।

ସେ କହିଛନ୍ତି ଯେ, ଏହି ପଦକ୍ଷେପରେ ଘରୋଇ କ୍ଷେତ୍ରକୁ ଅଗ୍ରାଧିକାର ମିଳିବ । ଗ୍ଲୋବାଲ୍ ସ୍ପେସ୍ ଏକ୍ସପ୍ଲୋରେସନ୍ ସମ୍ମିଳନୀ ୨୦୨୫ ଅବସରରେ ଗୋଏଙ୍କା କହିଛନ୍ତି, ଆମର ପୂର୍ବରୁ ବହୁତ ଶକ୍ତିଶାଳୀ କ୍ଷମତା ରହିଛି । ଏହାକୁ ନିରନ୍ତର ବୃଦ୍ଧି କରିବାକୁ ପଡିବ । ସେ କହିଛନ୍ତି ଯେ, ଏହି ଯୋଜନା ପ୍ରତିରକ୍ଷା କ୍ଷେତ୍ରର ନିରୀକ୍ଷଣ କ୍ଷମତାକୁ ବୃଦ୍ଧି କରିବା ପାଇଁ ଉଦ୍ଦିଷ୍ଟ। ଏପର୍ଯ୍ୟନ୍ତ ଏହା ମୁଖ୍ୟତଃ ISRO (ଭାରତୀୟ ମହାକାଶ ଗବେଷଣା ସଂଗଠନ) ଦ୍ୱାରା କରାଯାଇଛି । ଆମେ ଆଗକୁ ବଢ଼ିବା ସହିତ ଘରୋଇ କ୍ଷେତ୍ରକୁ ମଧ୍ୟ ସାମିଲ କରିବୁ ।

ସେ କହିଛନ୍ତି ଯେ, ଏହି ଗୁଇନ୍ଦା ଉପଗ୍ରହଗୁଡ଼ିକ ଭାରତୀୟ ସେନା, ନୌସେନା ଏବଂ ବାୟୁସେନାକୁ ଶତ୍ରୁ ଗତିବିଧିକୁ ଟ୍ରାକ୍ କରିବା, ସୀମା ଉପରେ ନଜର ରଖିବା ଏବଂ ସାମରିକ ଅଭିଯାନ ସମୟରେ ବାସ୍ତବ-ସମୟ ସମନ୍ୱୟକୁ ଉନ୍ନତ କରିବାରେ ସାହାଯ୍ୟ କରିବ। ୫୨ଟି ଉପଗ୍ରହ ମଧ୍ୟରୁ ଅଧା ଘରୋଇ ସଂସ୍ଥା ନିର୍ମାଣ କରିବେ ଏବଂ ବାକି ସବୁ ISRO ଦ୍ୱାରା ନିର୍ମିତ ହେବ ବୋଲି ଗୋଏଙ୍କା କହିଛନ୍ତି ।

ସେ ସ୍ପଷ୍ଟ କରିଛନ୍ତି ଯେ, ନିରୀକ୍ଷଣ କ୍ଷମତାକୁ ଆହୁରି ବୃଦ୍ଧି କରିବା ନିଷ୍ପତ୍ତି କେନ୍ଦ୍ର ଗୃହ ମନ୍ତ୍ରଣାଳୟ ଏବଂ ପ୍ରତିରକ୍ଷା ବାହିନୀ ଦ୍ୱାରା ନିଆଯିବ। ISRO ମଧ୍ୟ କ୍ଷୁଦ୍ର ଉପଗ୍ରହ ପ୍ରକ୍ଷେପଣ ଯାନ (SSLV) ପ୍ରଯୁକ୍ତିବିଦ୍ୟାକୁ ଘରୋଇ କ୍ଷେତ୍ରକୁ ହସ୍ତାନ୍ତର କରିବା ପ୍ରକ୍ରିୟାରେ ଅଛି । ଛୋଟ ସାଟେଲାଇଟକୁ ପୃଥିବୀର ନିମ୍ନ କକ୍ଷପଥରେ ସ୍ଥାପନ କରିବା ଲାଗି ଏସଏସଏଲଭିକୁ ବିକଶିତ କରାଯାଇଛି, ଯାହା ଜରୁରୀକାଳୀନ ପରିସ୍ଥିତିରେ ପ୍ରତିରକ୍ଷା ବାହିନୀ ପାଇଁ ଅତ୍ୟନ୍ତ ଗୁରୁତ୍ୱପୂର୍ଣ୍ଣ। ଏହା ୫୦୦ କିଲୋମିଟର ବୃତ୍ତାକାର କକ୍ଷପଥରେ ୧୦-୫୦୦ କିଲୋଗ୍ରାମ ଓଜନର ଉପଗ୍ରହ ଉତକ୍ଷେପଣ କରିବାକୁ ସକ୍ଷମ ।