ନୂଆଦିଲ୍ଲୀ,୯।୭: ଦିଲ୍ଲୀ ମୁଖ୍ୟମନ୍ତ୍ରୀ ରେଖା ଗୁପ୍ତାଙ୍କ ବଙ୍ଗଳାର ଟେଣ୍ଡର ବାତିଲ କରାଯାଇଛି। ପ୍ରଶାସନିକ କାରଣ ଦର୍ଶାଇ ପିଡବ୍ଲୁଡି ୬୦ ଲକ୍ଷ ଟଙ୍କାର ଟେଣ୍ଡର ବାତିଲ କରିଛି। ମୁଖ୍ୟମନ୍ତ୍ରୀଙ୍କ ରାଜନିବାସ ମାର୍ଗ ବଙ୍ଗଳା ନମ୍ବର ୧/୮ ର ନବୀକରଣରେ ବୈଦ୍ୟୁତିକ କାର୍ଯ୍ୟ ପାଇଁ ଟେଣ୍ଡର ୪ ଜୁଲାଇରେ ଖୋଲାଯାଇଥିଲା। ଏଥିରେ ୧୪ ଟି ଏସି, ୯ ଲକ୍ଷ ଟଙ୍କାର ଟିଭି, ୬ ଲକ୍ଷ ଟଙ୍କାର ଲାଇଟ୍ ଏବଂ ଅନ୍ୟାନ୍ୟ ସାମଗ୍ରୀ ଅନ୍ତର୍ଭୁକ୍ତ ଥିଲା। ଡକ୍ୟୁମେଣ୍ଟ ଅନୁଯାୟୀ, ୬୦ ଲକ୍ଷ ଟଙ୍କାର ଚୁକ୍ତିନାମା ବାତିଲ କରାଯାଇଛି। ଏହା ଅଧୀନରେ, ମୁଖ୍ୟମନ୍ତ୍ରୀଙ୍କ ବାସଭବନରେ ବିଭିନ୍ନ ଉପକରଣ ମଧ୍ୟ ରଖା ଯିବାର ଥିଲା। ଏଥିରେ ୧୪ଟି ଏୟାର କଣ୍ଡିସନର, ଟେଲିଭିଜନ ଏବଂ ବୈଦ୍ୟୁତିକ ଉପକରଣ ଅନ୍ତର୍ଭୁକ୍ତ ଥିଲା।

ଲୋକ ନିର୍ମାଣ ବିଭାଗ ମୁଖ୍ୟମନ୍ତ୍ରୀ ରେଖା ଗୁପ୍ତାଙ୍କୁ ରାଜ ନିବାସ ମାର୍ଗରେ ଦୁଇଟି ବଙ୍ଗଳା ଆବଣ୍ଟିତ କରିଥିଲା। ଗୋଟିଏ ତାଙ୍କ ବାସଭବନ ପାଇଁ ଏବଂ ଅନ୍ୟଟି ଶିବିର କାର୍ଯ୍ୟାଳୟ ପାଇଁ। ଗତ ସପ୍ତାହରେ ମୁଖ୍ୟମନ୍ତ୍ରୀ ଗୁପ୍ତା କ୍ୟାମ୍ପ ଅଫିସ ଉଦଘାଟନ କରିଥିଲେ। ଅନ୍ୟପକ୍ଷରେ, ମୁଖ୍ୟମନ୍ତ୍ରୀଙ୍କ ବଙ୍ଗଳାକୁ ନେଇ ରାଜନୀତି ମଧ୍ୟ ଚାଲିଛି। ଆମ ଆଦମୀ ପାର୍ଟି ମୁଖ୍ୟମନ୍ତ୍ରୀଙ୍କ ବଙ୍ଗଳାକୁ 'ମାୟାମହଲ' ନାମ ଦେଇଛି।  ଆପ ଟାର୍ଗେଟ କରି କହିଛି ଯେ ଦିଲ୍ଲୀବାସୀ ବୃଦ୍ଧି ପାଉଥିବା ମୁଦ୍ରାସ୍ଫୀତି ଏବଂ ଘରୋଇ ସ୍କୁଲଗୁଡ଼ିକର ବର୍ଦ୍ଧିତ ଫି ଦ୍ୱାରା ଅସୁବିଧାର ସମ୍ମୁଖୀନ ହେଉଥିବା ବେଳେ, ମୁଖ୍ୟମନ୍ତ୍ରୀ ରେଖା ଗୁପ୍ତା କୋଟି କୋଟି ଟଙ୍କା ବ୍ୟୟରେ ବଙ୍ଗଳାର ମରାମତି କରୁଛନ୍ତି, ଯେଉଁଥିରେ ଲକ୍ଷ ଲକ୍ଷ ଟଙ୍କାର ଏସି, ଝୁମର ଏବଂ ଲାଇଟ୍ ଲଗାଯିବ। ଏଥିପାଇଁ କୋଟି କୋଟି ଟଙ୍କା ଖର୍ଚ୍ଚ ହେବ। 

ଆମ ଆଦମୀ ପାର୍ଟି ବ୍ୟତୀତ କଂଗ୍ରେସ ମଧ୍ୟ ମୁଖ୍ୟମନ୍ତ୍ରୀ ରେଖା ଗୁପ୍ତାଙ୍କୁ ତାଙ୍କ ବଙ୍ଗଳା ସମ୍ପର୍କରେ ଟାର୍ଗେଟ କରିଥିଲା। କଂଗ୍ରେସ ମହିଳା ନେତ୍ରୀ ଏବଂ ଜାତୀୟ ମୁଖପାତ୍ର ସୁପ୍ରିୟା ଶ୍ରୀନେଟ ତାଙ୍କ X ହ୍ୟାଣ୍ଡେଲରେ ଲେଖିଛନ୍ତି, "ଶୀଶ ମହଲ କଥା କହି କହି ନିଜ ପାଇଁ ରଙ୍ଗ ମହଲ ନିର୍ମାଣ କରାଯାଉଛି! ଦିଲ୍ଲୀରେ, ଯେଉଁଠାରେ ଘର ଭାଙ୍ଗିବା ପରେ ଲୋକମାନେ ବୁଲଡୋଜର ଆଗରେ ଶୋଇବାକୁ ବାଧ୍ୟ ହୁଅନ୍ତି, ସେଠାରେ ମୁଖ୍ୟମନ୍ତ୍ରୀ ରେଖା ଗୁପ୍ତା ଜୀ ଗୋଟିଏ ନୁହେଁ ବରଂ ଦୁଇଟି ବଙ୍ଗଳାରେ  ରହିବେ ଏବଂ ନବୀକରଣ ବିଷୟରେ ଶୁଣି ଆପଣ ଆଶ୍ଚର୍ଯ୍ୟ ହୋଇଯିବେ।"