ଲକ୍ଷ୍ନୌ ୨୨/୦୪: ଚଳିତ ଆଇପିଏଲ୍ର ୪୦ତମ ଲିଗ୍ ମୁକାବିଲାରେ ଲକ୍ଷ୍ନୌ ସୁପରଜାଏଣ୍ଟ୍ସ ଘରୋଇ ଗ୍ରାଉଣ୍ଡ୍ରେ ଦିଲ୍ଲୀ କ୍ୟାପିଟାଲ୍ସକୁ ଭେଟିବ । ସମଗ୍ର ଭାରତୀୟ କ୍ରିକେଟ୍ ପ୍ରେମୀଙ୍କ ନଜର ରହିବ ଏହି ମ୍ୟାଚ୍ ଉପରେ । ତାହା ପୁଣି କେଏଲ ରାହୁଲଙ୍କ ପାଇଁ । ୨୦୨୨ ସିଜନରୁ ୨୦୨୪ ପର୍ଯ୍ୟନ୍ତ ସେ ସୁପରଜାଏଣ୍ଟ୍ସର ଅଧିନାୟକ ରହିଥିଲେ ।
ଗତ ସିଜନରେ ଦଳ ପ୍ଲେ- ଅଫକୁ ଯୋଗ୍ୟତା ଅର୍ଜନ କରିବାରେ ବିଫଳ ହେବା ପରେ ରାହୁଲଙ୍କୁ ଗ୍ରାଉଣ୍ଡ ଭିତରେ ଫ୍ରାଞ୍ଚାଇଜ୍ ମାଲିକ ସଞ୍ଜୀବ ଗୋଏଙ୍କା ଗାଳି କରିଥିଲେ । ଏଥର ମେଗା ନିଲାମ ପୂର୍ବରୁ ରାହୁଲ ସୁପରଜାଏଣ୍ଟ୍ସରୁ ବାହାରି ଆସିଥିଲେ । ସେ ବର୍ତ୍ତମାନ ଦିଲ୍ଲୀ କ୍ୟାପିଟାଲ୍ସର ସଦସ୍ୟ ଓ ଚମତ୍କାର ଫର୍ମରେ ରହିଛନ୍ତି । ଆଜି ସେ ନିଜ ପୂର୍ବ ଦଳ ବିପକ୍ଷରେ ଏକାନ୍ନା ଷ୍ଟାଡ଼ିୟମକୁ ଓହ୍ଲାଇବେ ।
ଉଭୟ ଦଳ ମଧ୍ୟରେ ପୂର୍ବରୁ ଗୋଟିଏ ମ୍ୟାଚ୍ ଖେଳାଯାଇଥିଲା ଓ ରାହୁଲ ଉକ୍ତ ମ୍ୟାଚ୍ ଖେଳି ନଥିଲେ । ତେଣୁ ତାଙ୍କୁ ନେଇ ଦର୍ଶକ ମହଲରେ ଜୋରଦାର ଉତ୍କଣ୍ଠା ବୃଦ୍ଧି ପାଇଛି । ରିଷଭ ପନ୍ତ ମଧ୍ୟ ପୂର୍ବରୁ ଦିଲ୍ଲୀ କ୍ୟାପିଟାଲ୍ସର ଅଧିନାୟକ ଥିଲେ ଓ ଏଥର ସେ ସୁପରଜାଏଣ୍ଟ୍ସ ଦଳର ନେତୃତ୍ୱ ନେଉଛନ୍ତି । ଦିଲ୍ଲୀ କ୍ୟାପିଟାଲ୍ସ ଓ ସୁପରଜାଏଣ୍ଟ୍ସ ମଧ୍ୟରେ ମୋଟ୍ ୬ଟି ମ୍ୟାଚ୍ ଖେଳାଯାଇଛି ଓ ଉଭୟ ଦଳ ୩ଟି ଲେଖାଏଁ ମ୍ୟାଚ୍ ଜିତିଛନ୍ତି । ମାର୍ଚ୍ଚ ୨୪ ତାରିଖରେ ଉଭୟ ଦଳ ମଧ୍ୟରେ ସିଜନର ପ୍ରଥମ ଭେଟ ହୋଇଥିଲା । ଏହି ସଂଘର୍ଷପୂର୍ଣ୍ଣ ମୁକାବିଲାରେ କ୍ୟାପିଟାଲ୍ସ ୧ ୱିକେଟ୍ରେ ବିଜୟ ହାସଲ କରିଥିଲା । ଆଶୁତୋଷ ଶର୍ମା ବିସ୍ଫୋରକ ବ୍ୟାଟିଂ କରି ଶେଷ ମୁହୂର୍ତ୍ତରେ ସୁପରଜାଏଣ୍ଟ୍ସ ଠାରୁ ବିଜୟ ଛଡ଼ାଇ ନେଇଥିଲେ । ଏଥର ସୁପରଜାଏଣ୍ଟ୍ସ ପୂର୍ବ ପରାଜୟର ପ୍ରତିଶୋଧ ନେବ ।
ଆଜି ଉଭୟ ଦଳ ଏକାଦଶରେ ସେଭଳି ପରିବର୍ତ୍ତନ କରିବା ସମ୍ଭାବନା ନାହିଁ । କେବଳ ଫାଷ୍ଟ ବୋଲର ମୟଙ୍କ ଯାଦବ ଏକାଦଶରେ ସୁଯୋଗ ପାଇପାରନ୍ତି । ଗତ ରାଜସ୍ଥାନ ରୟାଲ୍ସ ବିପକ୍ଷ ମ୍ୟାଚ୍ରେ ସେ ଇମ୍ପାକ୍ଟ ଖେଳାଳି ତାଲିକାରେ ରହିଥିଲେ ହେଁ ସୁଯୋଗ ପାଇ ନଥିଲେ ।ଦିଲ୍ଲୀ କ୍ୟାପିଟାଲ୍ସ ମଧ୍ୟ ଓପନର ସ୍ଥାନ ପାଇଁ ଫାଫ ଡୁପ୍ଲେସି କିମ୍ବା ଡୋନୋଭାନ ଫରେରାଙ୍କ ମଧ୍ୟରୁ ଜଣଙ୍କୁ ଡକାଇପାରେ । ଡୁ ପ୍ଲେସି ଫିଟ୍ ହେଲେ ଖେଳିବା ନିଶ୍ଚିତ ।
ଏକାନ୍ନା ଷ୍ଟାଡ଼ିୟମ୍ରେ ମ୍ୟାଚ୍ ପାଇଁ ନାଲି ମାଟି ପିଚ୍ ପ୍ରସ୍ତୁତ କରାଯାଇଛି । ଏହି ପିଚ୍ରେ ପୂର୍ବରୁ ସୁପରଜାଏଣ୍ଟ୍ସ ଓ ପଞ୍ଜାବ କିଙ୍ଗ୍ସ ମଧ୍ୟରେ ମ୍ୟାଚ୍ ଖେଳାଯାଇଥିଲା ଓ ପଞ୍ଜାବ କିଙ୍ଗ୍ସ ଉକ୍ତ ମ୍ୟାଚ ଜିତିଥିଲା । ଆଜି ମଧ୍ୟ ପିଚ୍ରେ ବଡ଼ ସ୍କୋର ହେବା ଆଶା କରାଯାଉଛି । ରାତ୍ରିରେ ବ୍ୟାଟିଂ ସହଜ ହେବ । ତେଣୁ ଟସ ବିଜୟୀ ଦଳ ଫିଲ୍ଡିଂ ନିଷ୍ପତ୍ତି ନେବା ଏକ ପ୍ରକାର ନିଶ୍ଚିତ।
-:ସମ୍ଭାବ୍ୟ ଦଳ:-
ସୁପରଜାଏଣ୍ଟ୍ସ:- ମିଚେଲ ମାର୍ଶ, ଆଡେନ ମାରକ୍ରମ, ନିକୋଲାସ ପୂରନ, ରିଷଭ ପନ୍ତ (ଅଧିନାୟକ), ଆୟୂଷ ବାଦୋନି, ଡେଭିଡ ମିଲର, ଅବଦୁଲ ସମଦ, ସର୍ଦୁଲ ଠାକୁର, ରବି ବିଷ୍ଣୋଇ, ପ୍ରିନ୍ସ ଯାଦବ/ମୟଙ୍କ ଯାଦବ, ଦିଗବେଶ ରାଠି, ଅଭେଶ ଖାନ ।
ଦିଲ୍ଲୀ କ୍ୟାପିଟାଲ୍ସ :- ଅଭିଷେକ ପୋରେଲ, ଫାଫ ଡୁ ପ୍ଲେସି/ଡୋନୋଭାନ ଫରେରା, କରୁଣ ନାଏର, କେଏଲ ରାହୁଲ, ଅକ୍ଷର ପଟେଲ (ଅଧିନାୟକ), ଟ୍ରିଷ୍ଟନ ଷ୍ଟବ୍ସ, ଆଶୁତୋଷ ଶର୍ମା, ବିପ୍ରଜ ନିଗମ, ମିଚେଲ ଷ୍ଟାର୍କ, କୁଲଦୀପ ଯାଦବ, ମୋହିତ ଶର୍ମା, ମୁକେଶ କୁମାର ।
