ମୁଲନପୁର,୦୫/୦୪: ଆଜି ଟେବୁଲ୍ ଟପ୍ପର ପଞ୍ଜାବ କିଙ୍ଗ୍ସ ଘରୋଇ ଗ୍ରାଉଣ୍ଡ୍ରେ ପ୍ରଥମ ମ୍ୟାଚ୍ ଖେଳିବାକୁ ଯାଉଛି । ମୁଲନପୁର ସ୍ଥିତ ନୂଆ ପିସିଏ ଷ୍ଟାଡ଼ିୟମ୍ରେ ଶ୍ରେୟାସ ଆୟରଙ୍କ ଦଳ ରାଜସ୍ଥାନ ରୟାଲ୍ସକୁ ସାମ୍ନା କରିବ । ପ୍ରଥମ ୨ଟି ମ୍ୟାଚ୍ ଜିତି ସାରିଥିବା ପଞ୍ଜାବ କିଙ୍ଗସ ଘରୋଇ ଗ୍ରାଉଣ୍ଡ୍ରେ ମଧ୍ୟ ରାଜୁତି କରିବାକୁ ଲକ୍ଷ୍ୟ ରଖିଛି । ସେହିପରି ୨ଟି ପରାଜୟ ପରେ ପଏଣ୍ଟ ଖାତା ଖୋଲିଥିବା ରାଜସ୍ଥାନ ରୟାଲ୍ସ ମଧ୍ୟ ବିଜୟ ଜାରି ରଖିବାକୁ ଅପେକ୍ଷା କରିଛି ।
ସବୁ କ୍ରିକେଟ୍ ପ୍ରେମୀଙ୍କ ନଜର ଏହି ମ୍ୟାଚ୍ ଉପରେ ରହିବ । ପ୍ରଥମତଃ ଶ୍ରେୟାସଙ୍କ ନେତୃତ୍ୱରେ ପଞ୍ଜାବ କିଙ୍ଗ୍ସ ଚଳିତ ସିଜନର ସବୁଠୁ ଶକ୍ତିଶାଳୀ ଦଳ ଭାବେ ଉଭା ହୋଇଛି । ଦ୍ୱିତୀୟତଃ ଆଜି ସଞ୍ଜୁ ସାମସନ ଅଧିନାୟକ ଭାବେ ଗ୍ରାଉଣ୍ଡକୁ ଓହ୍ଲାଇବାକୁ ଯାଉଛନ୍ତି ।
ଆଜି ପଞ୍ଜାବ କିଙ୍ଗ୍ସ ମୁଲନପୁର ଦୁଃଖ ପାଶୋରିବାକୁ ପ୍ରୟାସ କରିବ । ଗତ ସିଜନରେ ପଞ୍ଜାବ କିଙ୍ଗ୍ସ ଏହି ଗ୍ରାଉଣ୍ଡ୍ରେ ୫ଟି ମ୍ୟାଚ୍ ଖେଳି ୪ଟିରେ ପରାଜିତ ହୋଇଥିଲା । ପ୍ଲେ ଅଫ୍ରେ ପ୍ରବେଶ କରିବାକୁ ହେଲେ ଘରୋଇ ମ୍ୟାଚ୍ ଜିତିବା ଜରୁରି ବୋଲି କୋଚ୍ ରିକି ପଣ୍ଟିଂ ଟୁର୍ଣ୍ଣାମେଣ୍ଟ ଆରମ୍ଭରୁ ଦଳକୁ ସ୍ପଷ୍ଟ କରାଇ ଦେଇଛନ୍ତି । ପ୍ରତ୍ୟେକ ଖେଳାଳି ଚମତ୍କାର ଫର୍ମରେ ରହିଥିବାରୁ ପଣ୍ଟିଂଙ୍କ ପରାମର୍ଶକୁ ଦଳ ଗୁରୁତ୍ୱ ଦେବ ।
ରାଜସ୍ଥାନ ରୟାଲ୍ସ ଗତ ଚେନ୍ନାଇ ସୁପରକିଙ୍ଗ୍ସ ବିପକ୍ଷ ମ୍ୟାଚ୍ରେ ବିଜୟ ସହ ଅନେକ ତ୍ରୁଟି ସୁଧାରିଛି । ବିଶେଷ କରି ବ୍ୟାଟିଂ ବିଭାଗରେ ସନ୍ତୁଳନ ବୃଦ୍ଧି ପାଇଛି । ନୀତିଶ ରାଣାଙ୍କୁ ୩ନଂ ସ୍ଥାନରେ ବ୍ୟାଟିଂ କରାଇବାର ରଣନୀତି ସଫଳ ହୋଇଛି । ତଥାପି ନିମ୍ନ ଭାଗ ବ୍ୟାଟିଂ ଉପରେ ଟିମ ମ୍ୟାନେଜମେଣ୍ଟ ବିଚାର କରିବ । ଦଳର ବୋଲିଂ ବିଭାଗ ସନ୍ତୁଳିତ ରହିଛି । ଶ୍ରୀଲଙ୍କାର ଦୁଇ ସ୍ପିନର ମହୀଶ ତୀକ୍ଷଣା ଓ ୱାନିଣ୍ଡୁ ହସରଙ୍ଗା ପ୍ରତିପକ୍ଷ ବ୍ୟାଟରଙ୍କୁ ବାନ୍ଧି ରଖିବାରେ ସଫଳ ହୋଇଛନ୍ତି । ସୁପରକିଙ୍ଗ୍ସ ବିପକ୍ଷରେ ହସରଙ୍ଗା ୪ଟି ୱିକେଟ୍ ନେଇଥିଲେ।
ପଞ୍ଜାବ କିଙ୍ଗ୍ସ ସବୁ ବିଭାଗରେ ଦମ୍ଦାର ପ୍ରଦର୍ଶନ କରିଛି । ଘରୋଇ ଓ ବିଦେଶୀ ଖେଳାଳିଙ୍କ ମିଶ୍ରଣରେ ପଞ୍ଜାବ କିଙ୍ଗ୍ସ ବେଶ ଶକ୍ତିଶାଳୀ ଦଳ ଗଢିଛି । ପ୍ରତି ସ୍ଥାନ ପାଇଁ ଦଳ ନିକଟରେ ବିକଳ୍ପ ରହିଛି ।
ପଞ୍ଜାବ କିଙ୍ଗ୍ସ ଏକାଦଶ ଅପରିବର୍ତ୍ତିତ ରଖିବାର ଯଥେଷ୍ଟ ସମ୍ଭାବନା ରହିଛି । ସ୍ପିନର ୟୁଝବେନ୍ଦ୍ର ଚହଲଙ୍କ ଉପରେ ନଜର ରହିବ । ସେ ଗତ ୩ଟି ସିଜନ ଧରି ରାଜସ୍ଥାନ ରୟାଲ୍ସ ପକ୍ଷରୁ ଖେଳିଥିଲେ । ୨୦୨୨ରେ ସେ ୨୭ଟି ୱିକେଟ୍ ନେଇ ଦଳକୁ ଫାଇନାଲ୍ରେ ପହଞ୍ଚାଇଥିଲେ ଓ ପର୍ପଲ କ୍ୟାପ୍ ହାସଲ କରିଥିଲେ । ଏଥର ନିଲାମ ପୂର୍ବରୁ ତାଙ୍କୁ ରାଜସ୍ଥାନ ରୟାଲ୍ସ ବାଦ ଦେଇଥିଲା ଓ ପଞ୍ଜାବ କିଙ୍ଗ୍ସ ୧୮କୋଟି ଟଙ୍କାରେ କିଣିଥିଲା । ସେ ଆଇପିଏଲ୍ ଇତିହାସର ସବୁଠୁ ଦାମୀ ସ୍ପିନର ଭାବେ ରେକର୍ଡ କରିଥିଲେ ।
ଏପର୍ଯ୍ୟନ୍ତ ସଫଳ ହୋଇ ନଥିବା ରାଜସ୍ଥାନ ରୟାଲ୍ସର ଯଶସ୍ୱୀ ଜୈସ୍ୱାଲ୍ ଓ ପଞ୍ଜାବ କିଙ୍ଗ୍ସର ଗ୍ଲେନ ମ୍ୟାକ୍ସୱେଲଙ୍କ ବ୍ୟାଟ୍ରୁ ବଡ଼ ଇନିଂସ ଦେଖିବାକୁ ଦର୍ଶକ ଆଶା ରଖିବେ ।
ମୁଲନପୁରରେ ସିଜନର ପ୍ରଥମ ମ୍ୟାଚ୍ ଖେଳାଯାଉଥିବାରୁ ପିଚ୍କୁ ନେଇ ପୂର୍ବାନୁମାନ କରିବା କଷ୍ଟକର । ଗତ ସିଜନରେ ପିଚ୍ ସ୍ପିନରଙ୍କୁ ସହାୟତା କରିଥିଲା । ଏଥର ମଧ୍ୟ ସ୍ପିନରଙ୍କ ଉପରେ ଦଳ ନିର୍ଭର କରିବେ । ଗ୍ରାଉଣ୍ଡର ବିଶାଳ ବାଉଣ୍ଡାରୀରେ ବଡ଼ ସ୍କୋର କଷ୍ଟକର ହେବ। ତଥାପି ରାତ୍ରିରେ ମ୍ୟାଚ୍ ଖେଳାଯାଉଥିବାରୁ ଟସ ବିଜୟୀ ଦଳ ଫିଲ୍ଡିଂ ନିଷ୍ପତ୍ତି ନେବା ଏକ ପ୍ରକାର ନିଶ୍ଚିତ ।
ସମ୍ଭାବ୍ୟ ଦ୍ବାଦଶ
ପଞ୍ଜାବ କିଙ୍ଗ୍ସ: ପ୍ରଭସିମରନ ସିଂହ, ପ୍ରିୟାଂଶ ଆର୍ୟ, ଶ୍ରେୟାସ ଆୟର (ଅଧିନାୟକ), ଗ୍ଲେନ ମ୍ୟାକ୍ସୱେଲ୍, ମାର୍କସ ଷ୍ଟଇନିସ୍, ଶଶାଙ୍କ ସିଂହ, ସୂର୍ୟାଂଶ ସେଡଗେ, ମାର୍କୋ ଜାନସେନ, ଲୋକି ଫର୍ଗୁସନ, ଅର୍ଶଦୀପ ସିଂହ, ୟୁଝବେନ୍ଦ୍ର ଚହଲ, ବିଜୟ କୁମାର ବୈଶାଖ/ନେହାଲ ୱଧେରା ।
ରାଜସ୍ଥାନ ରୟାଲ୍ସ: ଯଶସ୍ୱୀ ଜୈସ୍ୱାଲ୍, ସଞ୍ଜୁ ସାମସନ (ଅଧିନାୟକ), ନୀତିଶ ରାଣା, ରିୟାନ ପରାଗ, ଧ୍ରୁବ ଜୁରେଲ, ୱାନିଣ୍ଡୁ ହସରଙ୍ଗା, ସିମରନ ହେତମାୟର, ଜୋଫ୍ରା ଆର୍ଚର, ମହୀଶ ତୀକ୍ଷଣା, ତୁଷାର ଦେଶପାଣ୍ଡେ, ସନ୍ଦୀପ ଶର୍ମା, ଶୁଭମ ଦୁବେ।
IPL 2025: ଆଜି ସୁପରକିଙ୍ଗ୍ସ-ଦିଲ୍ଲୀ କ୍ୟାପିଟାଲ୍ସ ଟକ୍କର, ମନ୍ଥର ଚିପକ୍ରେ ଲେଗ୍ ସ୍ପିନ୍ ଲଢ଼େଇ
