ନୂଆଦିଲ୍ଲୀ,୨୫/୦୨: ଆହୁରି ସହଜ ଓ ସୁବିଧା ହେବ ରେଳଯାତ୍ରା । ପ୍ରସ୍ତୁତ ହୋଇଛି ଦେଶର ପ୍ରଥମ ହାଇପରଲୁପ୍ ଟ୍ରାକ୍ । ଆଇଆଇଟି ମାଡ୍ରାସ ସହଯୋଗରେ ରେଳବାଇ ଦ୍ୱାରା ପ୍ରସ୍ତୁତ ହେଉଛି ଏହି ଟ୍ରାକ୍ । ମାତ୍ର ୩୦ ମିନିଟରେ ଅତିକ୍ରମ କରିବ ୩୦୦ କିଲୋମିଟର । ଖୁବଶୀଘ୍ର ଆରମ୍ଭ ହେବ ଏହାର ପରୀକ୍ଷଣ । ଏନେଇ ସୂଚନା ଦେଇଛନ୍ତି ରେଳମନ୍ତ୍ରୀ ଅଶ୍ୱିନୀ ବୈଷ୍ଣବ। ଏଥିସହ ରେଳ ମନ୍ତ୍ରାଳୟ ପକ୍ଷରୁ ଗତକାଲି ଏହାର ଏକ ଭିଡିଓ ମଧ୍ୟ ସେୟାର ହୋଇଛି ।
ଏହି ହାଇପରଲୁପ୍ ଟ୍ରାକ୍ ର ଲମ୍ବା ୪୨୨ ମିଟର ଅଟେ । ଏହି ପ୍ରକଳ୍ପ ଭବିଷ୍ୟତରେ ରେଳ ଯାତାୟାତକୁ ଆହୁରି ସୁଗମ କରିବାରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିବ । ହାଇପରଲୁପ୍ ରେଳ ଟ୍ରାକ୍ ପ୍ରକୃତରେ ଏକ ଏପରି ପ୍ରଯୁକ୍ତିବିଦ୍ୟା ଯେଉଁଥିରେ ଟ୍ରେନକୁ ଏକ ସ୍ୱତନ୍ତ୍ର ଭାବରେ ଡିଜାଇନ୍ କରାଯାଇଥିବା ଟ୍ୟୁବ୍ରେ ଚଲାଯାଏ । ଏହାର ବେଗ ଦ୍ରୁତ ବୋଲି କୁହାଯାଉଛି । ଏହା ସାର୍ବଜନୀନ ପରିବହନକୁ ଦ୍ରୁତ କରିବାରେ ସହାୟକ ହୋଇପାରେ । ଦେଶର ପ୍ରଥମ ହାଇପରଲୁପ୍ ରେଳ ଟ୍ରାକ୍ ପ୍ରସ୍ତୁତ ହୋଇସାରିଥିବା ବେଳେ ଖୁବଶୀଘ୍ର ଟ୍ରେନ୍ ପରୀକ୍ଷଣ ଆରମ୍ଭ ହେବ । ତେବେ ଏହି ଟ୍ରେନ ୩୦୦ କିଲୋମିଟରକୁ ୩୦ ମିନିଟରେ ଅତିକ୍ରମ କରିବ ବୋଲି କହିଛନ୍ତି ରେଳମନ୍ତ୍ରୀ ।
ଏହି ହାଇପରଲୁପରେ ଟ୍ରେନ୍ ଘଣ୍ଟା ପ୍ରତି ୧୧୦୦ କିଲୋମିଟର ବେଗରେ ଚାଲିବ। ଏହି ବେଗ ବୁଲେଟ୍ ଟ୍ରେନ୍ ଅପେକ୍ଷା ଅଧିକ। ବୁଲେଟ୍ ଟ୍ରେନ୍ ଘଣ୍ଟା ପ୍ରତି ସର୍ବାଧିକ ୪୫୦ କିଲୋମିଟର ବେଗରେ ଚାଲିଥାଏ। ଯଦି ଏହି ପ୍ରଯୁକ୍ତିବିଦ୍ୟା ଭାରତରେ କାର୍ଯ୍ୟକାରୀ ହୁଏ, ତେବେ ଦିଲ୍ଲୀରୁ ଜୟପୁର ଏବଂ ମୁମ୍ବାଇରୁ ପୁନେ ଯାତ୍ରା ୩୦ମିନିଟରୁ କମ୍ ସମୟ ମଧ୍ୟରେ ହୋଇପାରିବ ।ଖୁବଶୀଘ୍ର ଏହାର ଟ୍ରାଏଲ ରନ୍ ହେବ। ଯଦି ଭାରତରେ ହାଇପରଲୁପ୍ ସିଷ୍ଟମ୍ ଆରମ୍ଭ ହୁଏ, ତେବେ ସଡ଼କ ପରିବହନ ଏବଂ ରେଳପଥର ସ୍ୱରୂପ ବଦଳିଯିବ। ଏହା କେବଳ ଶକ୍ତି ବ୍ୟବସ୍ଥାରେ ପରିବର୍ତ୍ତନ ଆଣିବ ନାହିଁ ବରଂ ଯାତ୍ରୀମାନଙ୍କୁ ନିରାପଦ, ଦ୍ରୁତ ଏବଂ ଆରାମଦାୟକ ଯାତ୍ରା ମଧ୍ୟ ପ୍ରଦାନ କରିବ।
