ଭୁବନେଶ୍ଵର : ଆଜିର ମହଙ୍ଗା ଦୁନିଆରେ ବଢୁଥିବା ବିଜୁଳି ବିଲ୍ ପ୍ରାୟ ମଧ୍ୟବିତ୍ତ ପରିବାରକୁ ଚିନ୍ତାରେ ପକାଉଛି । ଥଣ୍ଡା ଦିନେ ମଧ୍ୟ ବିଜୁଳି ବିଲ୍ କମ୍ ଆସୁନାହିଁ । ତେବେ ଗରମ ଦିନେ ଅବସ୍ଥା କଣ ହେବ ଭାବି ଚିନ୍ତାରେ ପଡୁଛନ୍ତି ଘରଣୀମାନେ । କାରଣ ଘର ଖର୍ଚ୍ଚକୁ ନିୟନ୍ତ୍ରଣରେ ରଖିବା ସେମାନଙ୍କର ପ୍ରମୁଖ କାମ । ଚାଲନ୍ତୁ ଜାଣିବା କଣ କରିବା ଦ୍ୱାରା ଆପଣ ବିଜୁଳି ବିଲ୍କୁ ଅଧା କରିପାରିବେ ।
ଘରେ ଲଗାନ୍ତୁ ସୋଲାର୍ ଏନର୍ଜି
ବିଜୁଳି ବିଲ୍କୁ କମ୍ କରିବା ପାଇଁ ସୋଲାର୍ ଏନର୍ଜି ଶ୍ରେଷ୍ଠ ବିକଳ୍ପ । ଭାରତରେ ପ୍ରାୟ ୩୦୦ ଦିନ ଖରା ରହିଥାଏ । ତେଣୁ ଏହା ଆମ ପାଇଁ ଉପଯୁକ୍ତ ବିକଳ୍ପ । ସୋଲାର୍ ଏନର୍ଜିକୁ ଆପଣ ଘର ଛାତ ଉପରେ ଲଗାଇପାରିବେ । ଏଥିପାଇଁ ଗୋଟିଏ ଥର ପାଇଁ ନିବେଶ କରିବାକୁ ପଡିଥାଏ, ଯାହା ଦୀର୍ଘ ଦିନ ଯାଏ ବିଜୁଳି ଯୋଗାଇଥାଏ । ଫଳରେ ବିଜୁଳି ବିଲ୍କୁ କମ୍ କରିପାରିବେ ।
ଏଲ୍ଇଡି ଲାଇଟ୍
ଘରେ ବ୍ୟବହୃତ ସମସ୍ତ ଲାଇଟ୍ ପଏଣ୍ଟରେ ଏଲ୍ଇଡି ବଲ୍ବ ବ୍ୟବହାର କରନ୍ତୁ । ଫଳରେ ବିଜୁଳି କମ୍ ବ୍ୟବହାର ସହ ବିଲ୍ କମ୍ ଆସିଥାଏ । ୠଏୟାର କଣ୍ଡିସନର୍ ଗରମ ଦିନେ ଅଧିକ ବିଜୁଳି ବ୍ୟବହାର ହୋଇଥାଏ । ତଥାପି ଗରମ ଦିନେ ଅଧିକରୁ ଅଧିକ ସିଲିଙ୍ଗ୍ ଓ ଟେବଲ୍ ଫ୍ୟାନ୍ ବ୍ୟବହାର ପାଇଁ ଚେଷ୍ଟା କରନ୍ତୁ । କାରଣ ଏସି ବ୍ୟବହାର ଦ୍ୱାରା ଶରୀର କ୍ଷତିଗ୍ରସ୍ତ ହେବା ସହ ଅଧିକ ବିଜୁଳି ବିଲ୍ ଆସିଥାଏ । ଏହାକୁ ଧ୍ୟାନରେ ରଖନ୍ତୁ । ଆବଶ୍ୟକ ନ ଥିଲେ ଲାଇଟ୍ ବା ଫ୍ୟାନ୍ ବନ୍ଦ କରିବା ଶିଖନ୍ତୁ । ଏହା ମଧ୍ୟ ପିଲାମାନଙ୍କୁ ଶିଖାନ୍ତୁ ।
କମିବ ବିଲ୍
କେତେକ ଅତ୍ୟାଧୁନିକ ବିଦ୍ୟୁତ୍ ଉପକରଣ ବ୍ୟବହାର ଦ୍ୱାରା ମଧ୍ୟ ବିଜୁଳି ବିଲ୍ କମ୍ କରିପାରିବେ । ଏଇ ଯେମିତି ମାଇକ୍ରୋୱେଭ୍, ଇଲେକ୍ଟ୍ରିକ୍ କେଟଲ ବ୍ୟବହାର ଦ୍ୱାରା ମଧ୍ୟ ବିଜୁଳିର କମ୍ ବ୍ୟବହାର କରିପାରିବେ । ସେହିପରି ଲାପଟପ୍, ମୋବାଇଲ୍ ଫୋନ୍ ଓ ଡିଜିଟାଲ୍ କ୍ୟାମେରା ଆଦିର ଚାର୍ଜର ବ୍ୟବହାର ନ ହେବା ସମୟରେ ପ୍ଲଗ୍ରୁ ବାହାର କରି ଦିଅନ୍ତୁ ।
