ଭୁବନେଶ୍ବର,୦୯|୦୧: ପ୍ରଭୁ ଶ୍ରୀଲିଙ୍ଗରାଜ ମନ୍ଦିର ସତ୍ବଲିପି କମିଟିର ଅନ୍ତରୀଣ ରିପୋର୍ଟ ପ୍ରଦାନ । ଅବସରପ୍ରାପ୍ତ ଜଷ୍ଟିସ ଡି.ପି ଚୌଧରୀଙ୍କ ଅଧକ୍ଷତାରେ ଗଠିତ କମିଟି ଆଇନ ମନ୍ତ୍ରୀ ପୃଥ୍ବୀରାଜ ହରିଚନ୍ଦନଙ୍କୁ ରିପୋର୍ଟ ପ୍ରଦାନ କରିଛନ୍ତି । ସବୁ ନିଯୋଗର ପୁରାତନ ନଥିପତ୍ରରୁ ରିପୋର୍ଟ ପ୍ରସ୍ତୁତ କରିଛି କମିଶନ । ଏହାକୁ ନେଇ ଆଗାମୀ ଦିନରେ ଆଇନ ଆସିଲେ ଶ୍ରୀଲିଙ୍ଗରାଜଙ୍କ ସେବା, ନୀତିକାନ୍ତି ଓ ପର୍ବପର୍ବାଣି ସେବା ନୀତି ଶୃଙ୍ଖଳିତ ହେବ । ବିଶେଷକରି ନୀତିକାନ୍ତି ସୁରୁଖୁରୁରେ ପରିଚାଳିତ ହେବ।
ବର୍ତ୍ତମାନ ରିପୋର୍ଟକୁ ଆଇନ ବିଭାଗ ତର୍ଜମା କରିବ। ପରେ ଏହାକୁ ମୁଖ୍ୟମନ୍ତ୍ରୀଙ୍କୁ ପ୍ରଦାନ କରିବ ବିଭାଗ ବୋଲି କହିଛନ୍ତି ଆଇନ ମନ୍ତ୍ରୀ। ସେହିପରି ରିପୋର୍ଟ ପ୍ରଦାନ ପରେ ଜଷ୍ଟିସ ଡି.ପି ଚୌଧରୀ ମଧ୍ୟ ଗଣମାଧ୍ୟମକୁ ପ୍ରତିକ୍ରିୟା ଦେଇଛନ୍ତି । ଆଗାମୀ ଦିନରେ ଶ୍ରୀଲିଙ୍ଗରାଜ ମହାପ୍ରଭୁ ଯେପରି ଉପାସ ନରହିବେ ସେନେଇ କମିଟି ବସିଥିଲା। ଇତିହାସକାର, ଏଏସଆଇ, ଓଡ଼ିଶା ଷ୍ଟେଟ୍ ଲାଇବ୍ରେରୀ ଭଳି ବହୁ ଗୁରୁତ୍ବପୂର୍ଣ୍ଣ ଅନୁଷ୍ଠାନରୁ ଲିଙ୍ଗରାଜ ମନ୍ଦିର ସେବା, ନୀତି, ନିଯୋଗ ଓ ପର୍ବପର୍ବାଣି ନେଇର ତଥ୍ୟ ସଂଗ୍ରହ କରାଯାଇଥିଲା । ସେହି ପ୍ରାଥମିକ ତଥ୍ୟ ଅନୁସାରେ ରିପୋର୍ଟ ପ୍ରସ୍ତୁତ କରାଯାଇଛି ବୋଲି ଜଷ୍ଟିସ ଡି. ପି ଚୌଧୁରୀ କହିଛନ୍ତି ।
