ନୂଆଦିଲ୍ଲୀ ୨୩/୧୧: ଶୀଘ୍ର ଉଠିବା ବ୍ୟକ୍ତିମାନେ ଅଧିକ ଶୃଙ୍ଖଳିତ ଏବଂ ଉତ୍ପାଦନକ୍ଷମ ହୋଇଥାନ୍ତି ବୋଲି ଧାରଣା ବହୁ ପୂର୍ବରୁ ରହିଆସିଛି। ଶୀଘ୍ର ଉଠିବା ବ୍ୟକ୍ତିମାନଙ୍କୁ ପ୍ରାୟତଃ ସଫଳତା ଏବଂ ଭଲ ସ୍ୱାସ୍ଥ୍ୟର ସଙ୍କେତ ଭାବରେ ଗ୍ରହଣ କରାଯାଏ। କିନ୍ତୁ ବିଜ୍ଞାନ କ’ଣ ପ୍ରକୃତରେ ଏହି ବିଶ୍ୱାସକୁ ସମର୍ଥନ କରେ, ନା ରାତିରେ ଚେଇଁ ରହିବାର କିଛି ଅଣଦେଖା ଲାଭ ଅଛି? ଆସନ୍ତୁ ଜାଣିବା କ’ଣ କହୁଛି ନୂତନ ଗବେଷଣା।
ଜଣେ ବ୍ୟକ୍ତିଙ୍କର ବିଳମ୍ବିତ ସମୟ ପର୍ଯ୍ୟନ୍ତ ଜାଗ୍ରତ ରହିବା କିମ୍ବା ଶୀଘ୍ର ଉଠିବାର ପ୍ରବୃତ୍ତି କେବଳ ଏକ ଅଭ୍ୟାସ ନୁହେଁ, ବରଂ ସେମାନଙ୍କର କ୍ରୋନୋଟାଇପ୍ ଉପରେ ନିର୍ଭର କରେ। MDPI ଅନୁସାରେ, କ୍ରୋନୋଟାଇପ୍ ହେଉଛି ଏକ ଜୈବିକ ଢାଞ୍ଚା ଯାହା, ଏହା ଆମ ଶରୀରର ପ୍ରାକୃତିକ ଶୋଇବା-ଚେଇଁବା ଚକ୍ର, ସର୍ବାଧିକ ସତର୍କତା ଏବଂ ମାନସିକ କାର୍ଯ୍ୟଦକ୍ଷତା ନିର୍ଣ୍ଣୟ କରେ। ସରଳ ଭାଷାରେ କହିବାକୁ ଗଲେ, ଏହା ଶରୀରର ମାଷ୍ଟର ଘଣ୍ଟା।
ଇମ୍ପେରିଆଲ୍ କଲେଜ ଲଣ୍ଡନର ଡକ୍ଟର ରାହା ୱେଷ୍ଟଙ୍କ ଅନୁସାରେ, କ୍ରୋନୋଟାଇପ୍ ଜଣେ ବ୍ୟକ୍ତିଙ୍କ ଜ୍ଞାନାତ୍ମକ କାର୍ଯ୍ୟକୁ ପ୍ରଭାବିତ କରିପାରେ। ଇମ୍ପେରିଆଲ୍ କଲେଜ ଲଣ୍ଡନର ଏକ ବଡ଼ ଅଧ୍ୟୟନରେ ୨୬,୦୦୦ ରୁ ଅଧିକ ଲୋକଙ୍କ ତଥ୍ୟ ବିଶ୍ଳେଷଣ କରାଯାଇଥିଲା। ଏଥିରୁ ଜଣାପଡିଲା ରାତିରେ ଚେଉଁଥିବା ଲୋକ ଅନେକ କ୍ଷେତ୍ରରେ ସକାଳୁ ଶୀଘ୍ର ଉଠୁଥିବା ଲୋକଙ୍କ ଅପେକ୍ଷା ଭଲ ପ୍ରଦର୍ଶନ କରିଥିଲେ। ଏପରିକି ମଧ୍ୟମ କ୍ରୋନୋଟାଇପ୍ ଥିବା ଲୋକମାନେ, ଯେଉଁମାନେ ନା ରାତିରେ ଚେଇଁଥାନ୍ତି ନା ଶୀଘ୍ର ଉଠିଥାନ୍ତି, ସେମାନେ ମଧ୍ୟ ଶୀଘ୍ର ଉଠିବା ଲୋକଙ୍କ ଅପେକ୍ଷା ଭଲ ପ୍ରଦର୍ଶନ କରିଥିଲେ।
ୟୁକେର ଏକ ପ୍ରମୁଖ ଅଧ୍ୟୟନରୁ ଜଣାପଡିଛି ଯେ ରାତିରେ ଚେଉଁଥିବା ଲୋକଙ୍କ ମୃତ୍ୟୁ ଏବଂ ହୃଦରୋଗର ଆଶଙ୍କା ମଧ୍ୟ ଅଧିକ ଥାଏ। ଏମାନଙ୍କ ଜ୍ଞାନାତ୍ମକ କାର୍ଯ୍ୟଦକ୍ଷତା ଭଲ ହୋଇପାରେ, କିନ୍ତୁ ଶରୀରର ଜୈବିକ ଘଣ୍ଟା ଏବଂ ଦୈନନ୍ଦିନ କାର୍ଯ୍ୟ ମଧ୍ୟରେ ଦ୍ୱନ୍ଦ୍ୱ ସେମାନଙ୍କ ସ୍ୱାସ୍ଥ୍ୟକୁ କ୍ଷତି ପହଞ୍ଚାଇପାରେ।
ଏକ ସାମ୍ପ୍ରତିକ ଅଧ୍ୟୟନରୁ ଜଣାପଡିଛି ଯେ ସକାଳୁ ଉଠୁଥିବା ଲୋକଙ୍କର BMI କମ୍ ଥାଏ, ଫାଷ୍ଟିଂ ଟ୍ରାଇଗ୍ଲିସେରାଇଡ୍ସ ଏବଂ ଗ୍ଲୁକୋଜ୍ କମ ହୁଏ, ଭଲ କୋଲେଷ୍ଟ୍ରଲ୍ ଅଧିକ ହୁଏ ।ଶୀଘ୍ର ଉଠିଥିବା ଲୋକମାନେ ସାମଗ୍ରିକ ସ୍ୱାସ୍ଥ୍ୟ ଦୃଷ୍ଟିରୁ ଆଗରେ ଥାଆନ୍ତି।
