ବାକୁ: ଇସ୍ରାଏଲ ଗତ ଶୁକ୍ରବାର ଇରାନ ଉପରେ ଆକ୍ରମଣ ଆରମ୍ଭ କରିବା ପରେ ଅଜରବୈଜାନ ୬୦୦ରୁ ଅଧିକ ବିଦେଶୀ ନାଗରିକଙ୍କୁ ଇରାନରୁ ଉଦ୍ଧାର କରିବା ପାଇଁ ଏହାର ସୀମାକୁ ଅସ୍ଥାୟୀ ଭାବେ ଖୋଲିଛି। ଅଜରବୈଜାନ ସରକାରୀ ସୂତ୍ରରୁ ମିଳିଥିବା ସୂଚନା ଅନୁଯାୟୀ, ୧୭ଟି ଦେଶର ନାଗରିକମାନେ କାସ୍ପିଆନ ସାଗର ଉପକୂଳରେ ଥିବା ଆସ୍ତାରା ଚେକପୋଷ୍ଟ ମାଧ୍ୟମରେ ଅଜରବୈଜାନରେ ପ୍ରବେଶ କରିଛନ୍ତି। ଏହି ବିଦେଶୀ ନାଗରିକଙ୍କୁ ବାକୁ ବିମାନବନ୍ଦରକୁ ନେଇ ସେମାନଙ୍କ ନିଜ ଦେଶକୁ ଫେରାଇବା ପାଇଁ ବ୍ୟବସ୍ଥା କରାଯାଇଛି।
ଅଜରବୈଜାନ ୨୦୨୦ ମସିହାରେ ପରଠୁ କୋଭିଡ-୧୯ ମହାମାରୀ ସମୟରେ ଏହାର ସ୍ଥଳଭାଗ ସୀମା ବନ୍ଦ କରିଥିଲା। କିନ୍ତୁ ଇରାନରେ ଚାଲିଥିବା ସଂଘର୍ଷ ଯୋଗୁଁ ମାନବୀୟ ଆବଶ୍ୟକତାକୁ ଦୃଷ୍ଟିରେ ରଖି ଆସ୍ତାରା ସୀମା ଚେକପୋଷ୍ଟକୁ ଏକ ମାନବୀୟ କରିଡର ଭାବେ ଖୋଲାଯାଇଛି। ଏହି ଉଦ୍ଧାର କାର୍ଯ୍ୟରେ ରୁଷିଆ, ବେଲାରୁଷ, କାଜାଖସ୍ତାନ, କିର୍ଗିଜସ୍ତାନ, ତାଜିକିସ୍ତାନ, ଉଜବେକିସ୍ତାନ, ଜର୍ମାନୀ, ସ୍ପେନ, ଇଟାଲୀ, ସର୍ବିଆ, ରୋମାନିଆ, ପର୍ତ୍ତୁଗାଲ, ଆମେରିକା, ସାଉଦି ଆରବ, ଚୀନ ଏବଂ ଭିଏତନାମ ଆଦି ଦେଶର ନାଗରିକମାନେ ରହିଛନ୍ତି।
ଏକ କିର୍ଗିଜସ୍ତାନ ନାଗରିକ ନାଜିମ ବେଇଶେକେୟେଭ କହିଛନ୍ତି ଯେ ସେ ସୀମାରେ ୮ ଘଣ୍ଟା ଧାଡ଼ିରେ ଅପେକ୍ଷା କରିବା ପରେ ଅଜରବୈଜାନ ସେମାନଙ୍କ ପାଇଁ ସୀମା ଖୋଲିଥିଲା। ଏହାପରେ ଅପେକ୍ଷାରତ ସମସ୍ତ ବିଦେଶି ନାଗରିକ ସୀମା ମଧ୍ୟ ଦେଇ ପ୍ରବେଶ କରିଥିଲେ ଏବଂ ସେଠାରେ ଖାଦ୍ୟ ଓ ଚିକିତ୍ସା ସହାୟତା ପାଇଥିଲେ। ସେ ଅଜରବୈଜାନ କର୍ତ୍ତୃପକ୍ଷଙ୍କୁ ଧନ୍ୟବାଦ ଜଣାଇଛନ୍ତି। ଅଜରବୈଜାନୀ ଖବର ସଂସ୍ଥା ପ୍ରାକାଶ କରିଥିବା ରିପୋର୍ଟ ଅନୁଯାୟୀ, ୨୬ ଜଣ ଚୀନୀ ନାଗରିକ ମଧ୍ୟ ସୀମା ଅତିକ୍ରମ କରିଛନ୍ତି।
ଇସ୍ରାଏଲ ଗତ ଶୁକ୍ରବାର ଇରାନ ଉପରେ ଆକସ୍ମିକ ଆକ୍ରମଣ ଆରମ୍ଭ କରିଥିଲା। ଯାହାର ଜବାବରେ ଇରାନ ମଧ୍ୟ ଘନଘନ ମିସାଇଲ ଏବଂ ଡ୍ରୋନ ଆକ୍ରମଣ କରି ନିଜ ଉପରେ ହୋଇଥିବା ଆକ୍ରମଣର ପ୍ରତିଶୋଧ ନେଇଛି। ଏହି ସଂଘର୍ଷ ଯୋଗୁଁ ଇରାନରେ ଥିବା ବିଦେଶୀ ନାଗରିକମାନେ ଦେଶ ଛାଡ଼ିବାକୁ ବାଧ୍ୟ ହୋଇଛନ୍ତି। ଅଜରବୈଜାନ ଏବଂ ଆର୍ମେନିଆ ଉଭୟ ଇରାନର ଉତ୍ତର-ପଶ୍ଚିମ ସୀମାରେ ଅବସ୍ଥିତ, ଯେଉଁଠାରୁ ଉଦ୍ଧାର କାର୍ଯ୍ୟ ପାଇଁ ସହଜ ରାସ୍ତା ଉପଲବ୍ଧ ରହିଛି।
ଏହା ବ୍ୟତୀତ, ତୁର୍କମେନିସ୍ତାନ ମଧ୍ୟ ପ୍ରାୟ ୧୨୦ ଜଣ ବିଦେଶୀ ନାଗରିକଙ୍କୁ, ମୁଖ୍ୟତଃ ମଧ୍ୟ ଏସୀୟ ଦେଶର ନାଗରିକଙ୍କୁ, ଏହାର ସୀମା ଦେଇ ଟ୍ରାନଜିଟ ପାଇଁ ଅନୁମତି ଦେଇଛି। ରୁଷିଆ ଏହାର ଦୂତାବାସ ମାଧ୍ୟମରେ ନିଜର ନାଗରିକଙ୍କୁ ଅଜରବୈଜାନ ସୀମା ଦେଇ ଉଦ୍ଧାର କରିବାରେ ସହାୟତା କରୁଛି। ଯେଉଁଥିପାଇଁ କ୍ରେମଲିନ ଅଜରବୈଜାନକୁ ଧନ୍ୟବାଦ ଜଣାଇଛି।
ଏହି ଉଦ୍ଧାର କାର୍ଯ୍ୟ ଇସ୍ରାଏଲ-ଇରାନ ମଧ୍ୟରେ ଚାଲିଥିବା ସଂଘର୍ଷର ଗମ୍ଭୀରତାକୁ ଦର୍ଶାଉଛି। ଯେଉଁଥିରେ ଇରାନରେ ୨୨୪ ଜଣଙ୍କର ମୃତ୍ୟୁ ହୋଇଥିବା ରିପୋର୍ଟ ହୋଇଛି, ଯେଉଁମାନଙ୍କ ମଧ୍ୟରୁ ଅଧିକାଂଶ ସାଧାରଣ ନାଗରିକ। ଇସ୍ରାଏଲରେ ମଧ୍ୟ ଇରାନର ପ୍ରତିଶୋଧମୂଳକ ଆକ୍ରମଣରେ ୨୪ ଜଣଙ୍କର ମୃତ୍ୟୁ ହୋଇଛି।
ଅଜରବୈଜାନର ଏହି ମାନବୀୟ ପଦକ୍ଷେପ ବିଶ୍ୱବ୍ୟାପୀ ସମୁଦାୟ ମଧ୍ୟରେ ସହଯୋଗର ଏକ ଉଦାହରଣ ସୃଷ୍ଟି କରିଛି। ଯେଉଁଥିରେ ଅନେକ ଦେଶର ନାଗରିକମାନେ ନିରାପଦେ ନିଜ ଦେଶକୁ ଫେରିବାରେ ସକ୍ଷମ ହୋଇଛନ୍ତି।
