ନୂଆଦିଲ୍ଲୀ,୨୫/୦୧: ଭାରତୀୟ ରେଳବାଇ ମାତା ବୈଷ୍ଣୋ ଦେବୀ ରେଳ ଷ୍ଟେସନ କଟରା ଠାରୁ ଶ୍ରୀନଗର ପର୍ଯ୍ୟନ୍ତ ପ୍ରଥମ ବନ୍ଦେ ଭାରତ ଟ୍ରେନର ଟ୍ରାଏଲ ରନ୍ ହୋଇଛି। ଯାହାର ଭିଡିଓ ମଧ୍ୟ ସାମ୍ନାକୁ ଆସିଛି। ଏହି ଟ୍ରେନଟି ଅଞ୍ଜୀ ଖାଦ୍ ବ୍ରିଜ ଦେଇ ମଧ୍ୟ ଯିବ । ଯାହା ଭାରତର ପ୍ରଥମ କେବୁଲ ରେଳ ବ୍ରିଜ। ଚେନାବ ବ୍ରିଜ ଦେଇ ମଧ୍ୟ ଯିବ ଯାହାକି ବିଶ୍ୱର ସର୍ବୋଚ୍ଚ ରେଳ ବ୍ରିଜ ଅଟେ। କାଶ୍ମୀର ଉପତ୍ୟକାର ଶୀତଳ ଜଳବାୟୁ ଅନୁଯାୟୀ ଏହି ଟ୍ରେନକୁ ସ୍ୱତନ୍ତ୍ର ଭାବେ ଡିଜାଇନ୍ କରାଯାଇଛି।
ବନ୍ଦେ ଭାରତ ଟ୍ରେନ୍ ନିଜର ଗତି ଏବଂ ସୁବିଧା ପାଇଁ ଜଣାଶୁଣା । ଏଥିରେ ଯାତ୍ରୀମାନଙ୍କ ଆରାମ ଏବଂ ନିରାପତ୍ତା ଉପରେ ଉତ୍ତମ ଯତ୍ନ ନିଆଯାଏ । ଏହାର ଗତି ଏତେ ଦ୍ରୁତ ଅଟେ ଯେ ଏହା ଯାତ୍ରୀମାନଙ୍କୁ ଶୀଘ୍ର ଗନ୍ତବ୍ୟ ସ୍ଥଳରେ ପହଞ୍ଚାଇଥାଏ। ନୂଆଦିଲ୍ଲୀ-କଟରା ବନ୍ଦେ ଭାରତ ଏକ୍ସପ୍ରେସ ୮ ଘଣ୍ଟା ୫ ମିନିଟରେ ଦିଲ୍ଲୀ ଏବଂ କଟରା ମଧ୍ୟରେ ଥିବା ୬୫୫ କିଲୋମିଟର ଦୂରତା ଅତିକ୍ରମ କରିଛି । ଏହି ଟ୍ରେନ୍ ଅମ୍ବାଲା , ଲୁଧିଆନା ଜଙ୍କସନ, ପଠାନକୋଟ ଏବଂ ଜମ୍ମୁ ତବିରେ ରହିଥାଏ । ଏହି ସେମି ହାଇ-ସ୍ପିଡ୍ ଟ୍ରେନ୍ ଚେନ୍ନାଇ ସ୍ଥିତ ଆଇସିଏଫ୍ ଦ୍ୱାରା ବିକଶିତ ହୋଇଥିଲା। ଅକ୍ଟୋବର ୩,୨୦୧୯ ରେ ଏହାର ଉଦଘାଟନ କରାଯାଇଥିଲା ।
ଭାରତର ବିଭିନ୍ନ ଅଞ୍ଚଳକୁ କାଶ୍ମୀର ଉପତ୍ୟକା ସହିତ ସଂଯୋଗ କରିବା ପାଇଁ ରେଳବାଇ ଦୀର୍ଘ ଦିନ ଧରି ସଂଯୋଗ ଉପରେ କାର୍ଯ୍ୟ କରିଆସୁଛି। ଏଭଳି ପରିସ୍ଥିତିରେ ଡିସେମ୍ବର ୨୦୨୪ ରେ ଖବର ଆସିଥିଲା ଯେ ଦିଲ୍ଲୀକୁ ଶ୍ରୀନଗର ସହିତ ସିଧାସଳଖ ସଂଯୋଗ କରୁଥିବା ରେଳ ଲାଇନ ଜାନୁଆରୀରୁ ଆରମ୍ଭ ହୋଇପାରେ। ଏହି ମାର୍ଗରେ ବନ୍ଦେ ଭାରତ ପରି ଟ୍ରେନ୍ ଚଳାଇବାକୁ ପ୍ରସ୍ତୁତି ଚାଲିଥିଲା। ବନ୍ଦେ ଭାରତ ଟ୍ରେନ୍ ୧୩ ଘଣ୍ଟାରୁ କମ୍ ସମୟ ମଧ୍ୟରେ ଦିଲ୍ଲୀରୁ ଶ୍ରୀନଗର ପର୍ଯ୍ୟନ୍ତ ୮୦୦ କିଲୋମିଟର ଦୂରତା ଅତିକ୍ରମ କରିବ ।
