ବେଙ୍ଗାଲୁରୁ,୦୫/୦୪: ଭାରତୀୟ କ୍ରିକେଟ୍ ପ୍ରେମୀଙ୍କ ପାଇଁ ଖୁସି ଖବର । ଗତ ବର୍ଡର-ଗାଭାସ୍କର ଟ୍ରଫି ଟେଷ୍ଟ ସିରିଜରେ ଆହତ ହୋଇଥିବା ଭାରତର ପ୍ରମୁଖ ଫାଷ୍ଟ ବୋଲର ଯଶପ୍ରୀତ ବୁମରାଙ୍କୁ ଖୁବ୍ ଶୀଘ୍ର କ୍ରିକେଟ୍ ଗ୍ରାଉଣ୍ଡରେ ଦେଖିବାକୁ ମିଳିବ । ସେ ସମ୍ପ୍ରତି ଜାତୀୟ କ୍ରିକେଟ୍ ଏକାଡେମୀ (ଏନ୍ସିଏ) ରେ ପୂର୍ଣ୍ଣ ଫିଟ୍ନେସ୍ ଫେରି ପାଇବାକୁ ଜୋରଦାର ପ୍ରସ୍ତୁତି ଚଳାଇଛନ୍ତି । ଗତ କିଛି ଦିନ ହେଲା ସେ ନିୟମିତ ଭାବେ ବୋଲିଂ ଅଭ୍ୟାସ କରୁଛନ୍ତି । ଏନ୍ସିଏ ପକ୍ଷରୁ ତାଙ୍କ କାର୍ଯ୍ୟଭାର ବୃଦ୍ଧି କରାଯାଇଛି । ସେ ଖୁବ୍ ଶୀଘ୍ର ମୁମ୍ବାଇ ଇଣ୍ଡିଆନ୍ସ ଦଳରେ ଯୋଗ ଦେବାର ସମ୍ଭାବନା ରହିଥିବା ଅଧିନାୟକ ହାର୍ଦ୍ଦିକ ପାଣ୍ଡ୍ୟା ପ୍ରକାଶ କରିଛନ୍ତି ।
ବୁମରା ସିଡନୀରେ ଅନୁଷ୍ଠିତ ପଞ୍ଚମ ଟେଷ୍ଟରେ ଆହତ ହୋଇଥିଲେ । ବୋଲିଂ ବେଳେ ପିଠିରେ ଯନ୍ତ୍ରଣା ଅନୁଭବ କରିଥିଲେ । ସ୍ୱଦେଶ ଫେରିବା ପରଠୁ ଏନ୍ସିଏରେ ସେ ଚିକିତ୍ସାଧୀନ ଥିଲେ । ଆଗାମୀ କିଛି ଦିନ ମଧ୍ୟରେ ସେ ଅନ୍ତିମ ପର୍ଯ୍ୟାୟ ଫିଟ୍ନେସ୍ ପରୀକ୍ଷା ଦେବେ । ଏନ୍ସିଏ ପକ୍ଷରୁ ଫିଟ୍ନେସ୍ ପ୍ରମାଣ ପତ୍ର ପ୍ରଦାନ କରାଯିବା ପରେ ବୁମରା ମୁମ୍ବାଇ ଇଣ୍ଡିଆନ୍ସ ଦଳରେ ଯୋଗ ଦେଇ ପାରିବେ । ଆସନ୍ତା ଜୁନ୍ରେ ଭାରତୀୟ ଦଳ ୫ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜ ଖେଳିବା ପାଇଁ ଇଂଲଣ୍ଡ ଯାତ୍ରା କରିବ । ଏହି ସିରିଜ ଜରିଆରେ ଭାରତ ଓ ଇଂଲଣ୍ଡ ୨୦୨୫/୨୭ ବିଶ୍ୱ ଟେଷ୍ଟ ଚାମ୍ପିଅନ୍ସିପ୍ ଅଭିଯାନ ଆରମ୍ଭ କରିବେ । ଏହି ସିରିଜରେ ବୁମରା ଭାରତୀୟ ଦଳର ମୁଖ୍ୟ ଅସ୍ତ୍ର ହେବେ । ତେଣୁ ଆଇପିଏଲ୍ରେ ମଧ୍ୟ ବୁମରାଙ୍କ କାର୍ଯ୍ୟଭାରକୁ ନିୟନ୍ତ୍ରଣ କରାଯିବ ।
ସୂଚନାଯୋଗ୍ୟ, ୨୦୦୭ ପରଠୁ ଇଂଲଣ୍ଡରେ ଭାରତ କୌଣସି ଟେଷ୍ଟ ସିରିଜ ଜିତି ନାହିଁ ।
IPL 2025: ସିଏସ୍କେର ବଡ଼ ନିଷ୍ପତ୍ତି, ପୁଣି ଦଳର ନେତୃତ୍ବ ନେଇପାରନ୍ତି ଏମଏସ୍ ଧୋନୀ
