ଦୁବାଇ,୦୯/୦୧: ସଦ୍ୟ ପ୍ରକାଶିତ ଆଇସିସି ଟେଷ୍ଟ ମାନ୍ୟତାରେ ବହୁ ପରିବର୍ତ୍ତନ ହୋଇଛି । ଯଶପ୍ରୀତ ବୁମରା ବୋଲିଂ ମାନ୍ୟତାର ଶୀର୍ଷ ସ୍ଥାନ ବଜାୟ ରଖିଥିବାବେଳେ ତାଙ୍କ ରେଟିଂ ପଏଣ୍ଟ ୯୦୮କୁ ବୃଦ୍ଧି ପାଇଛି । ଅଷ୍ଟ୍ରେଲିଆର ପ୍ୟାଟ୍ କମିନ୍ସ ଦ୍ୱିତୀୟ ଓ ଦକ୍ଷିଣ ଆଫ୍ରିକାର କାଗିସୋ ରାବାଡ଼ା ତୃତୀୟକୁ ଉନ୍ନୀତ ହୋଇଛନ୍ତି । ସେହିପରି ବ୍ୟାଟିଂ ବିଭାଗରେ ରିଷଭ ପନ୍ତ ପୁନର୍ବାର ଶ୍ରେଷ୍ଠ ୧୦ରେ ପ୍ରବେଶ କରିଛନ୍ତି।
ଦୁଇ ଇଂଲଣ୍ଡ ବ୍ୟାଟର ଜୋ ରୁଟ୍ ଓ ହ୍ୟାରୀ ବ୍ରୁକ୍ ବ୍ୟାଟିଂ ମାନ୍ୟତାର ପ୍ରଥମ ୨ଟି ସ୍ଥାନ, କେନ ୱିଲିୟମସନ ତୃତୀୟ, ଯଶସ୍ୱୀ ଜୈସ୍ୱାଲ ଚତୁର୍ଥ ଓ ଟ୍ରେଭିସ୍ ହେଡ୍ ପଞ୍ଚମ ସ୍ଥାନ ବଜାୟ ରଖିଛନ୍ତି । ତେମ୍ବା ବଭୁମାଙ୍କ ମାନ୍ୟତାରେ ୩ଟି ସ୍ଥାନ ଉନ୍ନତି ହୋଇଛି ଓ ସେ ଷଷ୍ଠ ସ୍ଥାନ ଦଖଲ କରିଛନ୍ତି । ସେହିପରି ପନ୍ତଙ୍କ ମାନ୍ୟତାରେ ୩ଟି ସ୍ଥାନ ଉନ୍ନତି ହୋଇଛି ଓ ସେ ନବମ ସ୍ଥାନ ଦଖଲ କରିଛନ୍ତି । ବୋଲିଂରେ କମିନ୍ସ ଓ ରାବାଡା ଗୋଟିଏ ଲେଖାଏଁ ସ୍ଥାନ ଉପରକୁ ଉଠିଛନ୍ତି । ଅନ୍ୟ ଭାରତୀୟ ରବିନ୍ଦ୍ର ଜାଡେଜା ଗୋଟିଏ ସପ୍ତାହ ପରେ ପୁନର୍ବାର ନବମ ସ୍ଥାନକୁ ଫେରିଛନ୍ତି ।
ଅଷ୍ଟ୍ରେଲିଆର ସ୍କଟ ବୋଲାଣ୍ଡଙ୍କ ମାନ୍ୟତାରେ ୨୯ଟି ସ୍ଥାନ ଉନ୍ନତି ହୋଇଛି ଓ ସେ ଲମ୍ବା ଲମ୍ଫ ମାରି ମାନ୍ୟତା ତାଲିକାର ଦଶମ ସ୍ଥାନ ଦଖଲ କରିଛନ୍ତି । ସିଡନୀ ଟେଷ୍ଟରେ ସେ ୧୦ଟି ୱିକେଟ୍ ନେଇଥିଲେ । ବର୍ଡର-ଗାଭସ୍କର ଟ୍ରଫିରେ ସେ ୩ଟି ଟେଷ୍ଟ ଖେଳି ମୋଟ୍ ୨୧ଟି ୱିକେଟ୍ ଅକ୍ତିଆର କରିଥିଲେ ।
