ମାଲକାନଗିରି,୨୩।୧ (ଆପ୍ର ):ମାଲକାନଗିରି ଜିଲ୍ଲା ସୀମାନ୍ତ ଛତିଶଗଡ଼ର ବିଜାପୁର ଜିଲ୍ଲାରେ ମାଓବାଦୀ ଖଞ୍ଜିଥିବା ୫୦ କିଲୋ ଓଜନର ଲ୍ୟାଣ୍ଡମାଇନ୍ସ ଯବାନ ନିଷ୍କ୍ରିୟ କରିଛନ୍ତି । ଫଳରେ ମାଓବାଦୀଙ୍କ ବଡ ଧରଣର ଯୋଜନାକୁ ଯବାନ ପଣ୍ଡ କରିଛନ୍ତି।
ଛତିଶଗଡର ବିଜାପୁର ଜିଲ୍ଲାର ବାସାଗୁଡ଼ା ଠାରୁ ଆବାପାଲୀ ମଧ୍ୟରେ ଯବାନମାନେ ତଲାସି ଅଭିଯାନ କରୁଥିଲେ। ଏହି ଅଭିଯାନ ବେଳେ ତିମାପୁର ଦୁର୍ଗାମନ୍ଦିର ପାଖରେ ରହିଥିବା ଏକ ବ୍ରିଜ ତଳେ ମାଓବାଦୀ ଖଞ୍ଜିଥିବା ୫୦ କିଲୋ ଓଜନର ଲ୍ୟାଣ୍ଡମାଇନ୍ସକୁ ଯବାନମାନେ ଠାବ କରିଥିଲେ। ତେବେ ଯବାନ ସେହି ବୋମାକୁ ନିଷ୍କ୍ରିୟ କରିବା ପାଇଁ ବହୁ କସରତ କରିବାକୁ ପଡିଥିଲା। ଶେଷରେ ବୋମା ନିଷ୍କ୍ରିୟ କାରୀ ଦଳଙ୍କ ଦ୍ଵାରା ଉକ୍ତ ବୋମାକୁ ନିଷ୍କ୍ରିୟ କରାଯାଇଥିଲା। ତେବେ ନିଷ୍କ୍ରିୟ ସମୟରେ ଏତେ ବଡ ଧରଣର ବିସ୍ଫୋରଣ ହୋଇଥିଲା ଯେ, ସଂପୂର୍ଣ୍ଣ ବ୍ରିଜ ନଷ୍ଟ ହେବା ସହ ବିଶାଳ ଗର୍ତ୍ତ ହୋଇଥିଲା।
ସେହିପରି ମାଲକାନଗିରି ଜିଲ୍ଲା ସୀମାନ୍ତ ସୁକୁମା ଜିଲ୍ଲା ପୁଲିସକୁ ମିଳିଛି ଆଉ ଏକ ସଫଳତା। ସୀମାନ୍ତଵର୍ତ୍ତି ଅଞ୍ଚଳରେ ବଡ଼ ଧରଣର ମାଓ ହିଂସା ଘଟାଇବା ପାଇଁ ପ୍ରସ୍ତୁତ ହେଉଥିବା ଯୋଜନାକୁ ଭଣ୍ଡୁର କରିଛନ୍ତି ଯବାନ । ସୁକୁମା ମାଲକାନଗିରି ସୀମାରୁ ବନ୍ଧୁକ ତିଆର କାରଖାନା ଠାବ କରିଛନ୍ତି ଯବାନ। ବନ୍ଧୁକ ତିଆରି ସାମଗ୍ରୀ ସହ ୨୧ଟି ପ୍ରେସର ବୋମା,ବିଜିଏଲ ବୋମା,ଜେନେରେଟର, ୱେଲଡିଙ୍ଗ ମେଶିନ, ଲେଥ୍ ମେଶିନ ସାମଗ୍ରୀ ଜବତ କରିଛନ୍ତି। ସୁକୁମା ଜିଲ୍ଲା ମେଟାଗୁଡା ଓ ଦୁଲେଡ ଜଙ୍ଗଲରେ କମ୍ବିଂ ଅପରେସନ୍ ବେଳେ କୋବ୍ରା ଓ ସିଆରପିଏଫ୍ ଯବାନ ଏହି ବିସ୍ଫୋରକ ସାମଗ୍ରୀ ଜବତ କରିଛନ୍ତି ।
