ମୁମ୍ବାଇ,୨୪/୦୭: ଟିଭି ଅଭିନେତ୍ରୀ ଜେନିଫର ୱିଙ୍ଗେଟ୍ ସୋସିଆଲ ମିଡିଆରେ ତାଙ୍କ ସାମ୍ପ୍ରତିକ ବିବାହର ଅନେକ ଫଟୋ ସେୟାର କରିଛନ୍ତି। ଜୁଲାଇ ୧୬ ତାରିଖରେ ୟୁକେରେ ଅନୁଷ୍ଠିତ ଏହି ଅନ୍ତରଙ୍ଗ ସମାରୋହ ପରେ, ଜେନିଫର ଏକ ନୂତନ ଭିଡିଓ ମୋଣ୍ଟେଜ୍ ଏବଂ ଫଟୋ କାରୋସେଲ୍ ପୋଷ୍ଟ କରିଛନ୍ତି । ପ୍ରଥମେ ତାଙ୍କ ଦ୍ୱିତୀହ ବିବାହକୁ ଗୁଜବ ବୋଲି କୁହାଯାଉଥିଲା । କିନ୍ତୁ ଜେନିଫର୍ ଫଟୋ ପୋଷ୍ଟ କରିବା ପରେ ଜଣାପଡିଛି କି ୪୧ ବର୍ଷରେ ଦ୍ୱିତୀୟ ଥର ବିବାହ କରିଛନ୍ତି ଜେନି ।
ଫଟୋଗୁଡ଼ିକରେ ଜେନିଫର ତାଙ୍କ ସ୍ୱାମୀ ୱିଲିୟମ୍ ଇସମାଏଲଙ୍କ ସହ ନଜର ଆସିଛନ୍ତି । ଗୋଟିଏ ଫଟୋରେ ସେ ତାଙ୍କ ବାପାଙ୍କୁ ଆଲିଙ୍ଗନ କରିବା ସମୟରେ ଭାବପ୍ରବଣ ହୋଇଥିବା ଦେଖାଯାଉଛି । ଫଟୋଗୁଡ଼ିକୁ ସେୟାର କରି ଜେନିଫର କ୍ୟାପସନରେ ଲେଖିଛନ୍ତି, "... ଶେଷରେ, ଆମର ତାରକାମାନେ ଏକତ୍ରିତ ହୋଇଛନ୍ତି । "
ଜେନିଫର ଇନଷ୍ଟାଗ୍ରାମରେ ଏକ ସ୍ୱତନ୍ତ୍ର ଭିଡିଓ ମୋଣ୍ଟାଜ୍ ସେୟାର କରିଛନ୍ତି, ଯେଉଁଥିରେ ସେ ଏବଂ ତାଙ୍କ ସ୍ୱାମୀ ୱିଲିୟମ୍ ଚର୍ଚ୍ଚରେ ବିବାହ ପ୍ରତିଜ୍ଞା କରୁଥିବାର ଦେଖାଯାଉଛି । ଏଥିରେ ସେମାନଙ୍କ ବିବାହ ଫଟୋସୁଟର ସୁନ୍ଦର ମୁହୂର୍ତ୍ତଗୁଡ଼ିକ ମଧ୍ୟ ରହିଛି । ଭିଡିଓଟି ଏକ ବାର୍ତ୍ତା ସହିତ ଶେଷ ହେଉଛି, "ମୋ ସ୍ୱାମୀ, , ୱିଲକୁ ଆନୁଷ୍ଠାନିକ ଭାବରେ ପରିଚିତ କରାଉଛି !" ଫଟୋଗୁଡ଼ିକରେ, ଜେନିଫର ତାଙ୍କ ବିବାହ ଗାଉନ, ଏମ୍ବ୍ରୋଡେରୀ ହୋଇଥିବା ଓଢ଼ଣୀ ଏବଂ ସ୍ୱାମୀ ସହିତ ସିଡ଼ି ତଳକୁ ଯାଉଥିବା ସମୟରେ ଅତ୍ୟନ୍ତ ଖୁସି ଦେଖାଯାଉଛନ୍ତି ।
ଜେନିଫର ୱିଙ୍ଗେଟ୍ ଏବଂ ସିଙ୍ଗାପୁରର ବ୍ୟବସାୟୀ ୱିଲିୟମ୍ ଇସମାଏଲ୍ ଜୁଲାଇ ୧୬ ତାରିଖରେ ଯୁକ୍ତରାଜ୍ୟ (ୟୁକେ)ରେ ଏକ ବ୍ୟକ୍ତିଗତ ଉତ୍ସବରେ ବିବାହ କରିଥିଲେ । ଏହି ବିବାହ ଉତ୍ସବରେ କେବଳ ପରିବାର ସଦସ୍ୟ ଏବଂ ଅତି ନିକଟତର ବନ୍ଧୁମାନେ ଯୋଗ ଦେଇଥିଲେ । ବିବାହ ପୂର୍ବରୁ, ଦମ୍ପତି ସେମାନଙ୍କ ସମ୍ପର୍କ ବିଷୟରେ ସମ୍ପୂର୍ଣ୍ଣ ନୀରବତା ରକ୍ଷା କରିଥିଲେ। ତଥାପି, ବିବାହ ପୂର୍ବରୁ, ଜେନିଫରଙ୍କ ଧଳା ବ୍ରାଇଡାଲ୍ ଗାଉନ୍ ଟ୍ରାଏଲ୍ ଭିଡିଓ ସୋସିଆଲ ମିଡିଆରେ ସାମ୍ନାକୁ ଆସିବା ତାଙ୍କ ଫ୍ୟାନ୍ସଙ୍କ ମଧ୍ୟରେ ଉତ୍ସାହ ବଢାଇଥିଲା ।
