ଢେଙ୍କାନାଳ/କାମାକ୍ଷାନଗର/ ବାସୁଦେବପୁର/ଭଦ୍ରକ, ୧୯/୧୧ : ଗିରଫ ହେଲେ ଢେଙ୍କାନାଳ ଜିଲ୍ଲା କାମାକ୍ଷାନଗର ଉପଜିଲ୍ଲାପାଳ ନାରାୟଣ ଚନ୍ଦ୍ର ନାୟକ। ଆୟ ବହିର୍ଭୂତ ସମ୍ପତ୍ତି ଠୁଳ ଅଭିଯୋଗରେ ତାଙ୍କୁ ଗିରଫ କରାଯାଇଛି। ସୋମବାର ଉପଜିଲ୍ଲାପାଳଙ୍କ କାମାକ୍ଷାନଗରସ୍ଥିତ କାର୍ଯ୍ୟାଳୟ ଓ ସରକାରୀ ବାସଭବନ ସମେତ ଏକକାଳୀନ ୧୦ଟି ସ୍ଥାନରେ ଭିଜିଲାନ୍ସ ରେଡ୍ କରିଥିଲା।
ସୂଚନାନୁଯାୟୀ, ଉପଜିଲ୍ଲାପାଳଙ୍କର ଭୁବନେଶ୍ୱରର ଝାରପଡ଼ାରେ ୪୮୦୦ ବର୍ଗଫୁଟ୍ ଜମି ଉପରେ ନିର୍ମାଣାଧୀନ ୩ ମହଲା କୋଠା, ଭଦ୍ରକର କୁଆଁସରେ ୬୯୦୦ ବର୍ଗଫୁଟ୍ ଜମି ଉପରେ ୩ ମହଲା ଓ ଗେଲପୁରରେ ୬୨୦୦ ବର୍ଗଫୁଟ ଜମି ଉପରେ ୨ ମହଲା ବିଶିଷ୍ଟ କୋଠା ଥିବା ସୂଚନା ମିଳିଛି । ଏଥିସହ ଭୁବନେଶ୍ୱରର ପ୍ରମୁଖ ଇଲାକା ଝାରପଡ଼ା, ଲକ୍ଷ୍ମୀସାଗର, ପଥରଗାଡ଼ିଆରେ ଶ୍ରୀ ନାୟକଙ୍କର ୭ଟି ମୂଲ୍ୟବାନ ପ୍ଲଟ୍ ରହିଛି । ସେହିପରି ଭଦ୍ରକରେ ୬ଟି ଓ ପୁରୀ ଜିଲ୍ଲା ପିପିଲିରେ ଗୋଟିଏ ପ୍ଲଟ୍ କିଣିଛନ୍ତି । ଚଢ଼ଉ ବେଳେ ସୋମବାର ସନ୍ଧ୍ୟା ସୁଦ୍ଧା ଉପଜିଲ୍ଲାପାଳଙ୍କ ନିକଟରୁ ନଗଦ ୧ ଲକ୍ଷ ୪୮ ହଜାର ୬୮୦ ଟଙ୍କା, ୩୬୬ ଗ୍ରାମ୍ ସୁନା, ବିଭିନ୍ନ ବ୍ୟାଙ୍କ୍ର ପାସବୁକ୍, ଗୋଟିଏ ବାଇକ୍ ସହ ଓ ୧୦ ଲକ୍ଷ ଟଙ୍କାର ଘରକରଣା ସାମଗ୍ରୀ ମିଳିଥିବା ଜଣାଯାଇଛି । ଏଥିସହ ବ୍ୟାଙ୍କ୍, ଜୀବନ ବୀମା ଓ ପୋଷ୍ଟାଲ୍ ଜମା ବାବଦରେ ମୋଟ୍ ୩୪ ଲକ୍ଷ ୫୭ ହଜାର ୫୨ ଟଙ୍କା ରହିଥିବା ସୂଚନା ମିଳିଛି।
ସୋମବାର ଭୋର୍ରୁ ଚଢ଼ଉ ଆରମ୍ଭ ହୋଇଥିଲା । ୪ ଦିନ ଧରି ସରକାରୀ ଛୁଟି ଥିବାରୁ ଉପଜିଲ୍ଲାପାଳ ଶ୍ରୀ ନାୟକ ଭୁବନେଶ୍ୱରରେ ଥିବାବେଳେ ଭିଜିଲାନ୍ସର ଜଣେ ଡିଏସ୍ପିଙ୍କ ନେତୃତ୍ୱରେ କାମାକ୍ଷାନଗରରେ ଥିବା ସରକାରୀ ବାସଭବନରେ ଚଢ଼ଉ ହୋଇଥିଲା । ପରେ ଉପଜିଲ୍ଲାପାଳଙ୍କ କାର୍ଯ୍ୟାଳୟକୁ ଯାଇ ତାଙ୍କ ପ୍ରକୋଷ୍ଠରେ ରହିଥିବା ବିଭିନ୍ନ କାଗଜପତ୍ର ଯାଞ୍ଚ କରିଥିଲା ଭିଜିଲାନ୍ସ ଟିମ୍ ।
ସୂଚନାଯୋଗ୍ୟ, ୨୦୨୩ରେ କାମାକ୍ଷାନଗର ଉପଜିଲ୍ଲାପାଳ ଭାବେ ନାରାୟଣ ଚନ୍ଦ୍ର ନାୟକ ଯୋଗ ଦେଇଥିଲେ । ସେ ୧୯୯୭ରେ ସରକାରୀ ଚାକିରୀ ଜୀବନ ଆରମ୍ଭ କରିଥିଲେ । ପ୍ରଥମେ କଳାହାଣ୍ଡିରେ ଆସିଷ୍ଟାଣ୍ଟ୍ ସେଟେଲମେଣ୍ଟ୍ ଅଫିସର ଓ ପରେ ଭବାନୀପାଟଣାର ଅତିରିକ୍ତ ତହସିଲଦାର ଭାବେ ୨୦୦୪ ପର୍ଯ୍ୟନ୍ତ କାମ କରିଥିଲେ । ୨୦୧୧ରେ ସେ ଓଏଏସ୍ କ୍ୟାଡର ପାଇଥିଲେ । ଖରିଆର, ଦଶରଥପୁର ଓ ବାଲିଅନ୍ତା ବ୍ଲକ୍ର ବିଡିଓ ଭାବେ ଦୀର୍ଘ ବର୍ଷ କାର୍ଯ୍ୟ କରିଥିଲେ । ୨୦୨୩ ମସିହାରେ ଓଡ଼ିଶା ପ୍ରଶାସନିକ ସେବାର ବରିଷ୍ଠ ପାହ୍ୟାକୁ ପଦୋନ୍ନତି ପାଇବା ପରେ କାମାକ୍ଷାନଗର ଉପଜିଲ୍ଲାପାଳ ଭାବେ କାମ କରିଆସୁଥିଲେ ।
