ନୂଆଦିଲ୍ଲୀ: ରଣଜୀ ଟ୍ରଫି ୨୦୨୫ର ଫାଇନାଲ ମ୍ୟାଚ୍ ନାଗପୁର କ୍ରିକେଟ ଷ୍ଟାଡିୟମରେ କେରଳ ଏବଂ ବିଦର୍ଭ ମଧ୍ୟରେ ଖେଳାଯାଉଛି । ୨୦୨୪-୨୫ରେ ଘରୋଇ କ୍ରିକେଟରେ ଚମତ୍କାର ପ୍ରଦର୍ଶନ କରିଥିବା କରୁଣ ନାୟର ଏହି ମ୍ୟାଚ୍ର ଉଭୟ ଇନିଂସରେ ଚମତ୍କାର ବ୍ୟାଟିଂ କରିଛନ୍ତ । ବିଦର୍ଭ ପାଇଁ ଖେଳୁଥିବା କରୁଣ ନାୟର ପ୍ରଥମ ଇନିଂସରେ ଶତକରୁ ବଞ୍ଚିତ ହୋଇଥିଲେ ଏବଂ ୮୬ ରନ କରି ଆଉଟ ହୋଇଥିଲେ । ସେ ଦ୍ୱିତୀୟ ଇନିଂସରେ କୌଣସି ଭୁଲ କରିନଥିଲେ ଏବଂ ଏକ ଚମତ୍କାର ଶତକ ହାସଲ କରି ତାଙ୍କର ଉତ୍କୃଷ୍ଟ ଫର୍ମ ଜାରି ରଖିଥିଲେ ।
ଏହି ମ୍ୟାଚ୍ର ଦ୍ୱିତୀୟ ଇନିଂସରେ କରୁଣ ନାୟର ୧୮୪ ବଲ୍ରେ ତାଙ୍କର ଶତକ ପୂରଣ କରିଥିଲେ । ଏହି ସମୟରେ ସେ ସାତୋଟି ଚୌକା ଏବଂ ଦୁଇଟି ଛକା ମାରିଥିଲେ । ଏହା ପ୍ରଥମ ଶ୍ରେଣୀ କ୍ରିକେଟରେ ତାଙ୍କର ୨୩ ତମ ଶତକ । ଏହି ମ୍ୟାଚ୍ରେ ଶତକ ହାସଲ କରିବା ପରେ, ନାୟର ଏକ ଭିନ୍ନ ଶୈଳୀରେ ଉତ୍ସବ ପାଳନ କରିଥିଲେ। ସେ ଦୁଇ ହାତର ୯ ଆଙ୍ଗୁଳି ଦେଖାଇଥିଲେ । ଏହି ଭିଡିଓ ସୋସିଆଲ ମିଡିଆରେ ଭାଇରାଲ ହେଉଛି । ସେ ଘରୋଇ କ୍ରିକେଟର ଚଳିତ ସିଜିନରେ ୯ଟି ଶତକ ମାରିଛନ୍ତି । ନାୟର ୨୦୧୭ ରୁ ଟିମ୍ ଇଣ୍ଡିଆରୁ ବାହାରେ ଅଛ ନ୍ତି। ସେ ଭାରତ ପାଇଁ ୬ଟି ଟେଷ୍ଟ ଏବଂ ଦୁଇଟି ଦିନିକିଆ ଖେଳିଛନ୍ତି ।
ସେ ଟେଷ୍ଟ କ୍ରିକେଟରେ ଭାରତ ପାଇଁ ଏକ ଦ୍ୱିଶତକ ମଧ୍ୟ ମାରିଛନ୍ତି । ୩୩ ବର୍ଷୀୟ ନାୟାର ୨୦୨୪-୨୫ ସିଜିନରେ ଘରୋଇ କ୍ରିକେଟର ସମସ୍ତ ଫର୍ମାଟରେ ବହୁତ ରନ କରିଛନ୍ତି । ସେ ବିଜୟ ହଜାରେ ଟ୍ରଫି ୨୦୨୪-୨୫ରେ ୯ଟି ମ୍ୟାଚ୍ରୁ ୭୭୯ ରନ୍ କରିଥିଲେ । ସେହି ଟୁର୍ଣ୍ଣାମେଣ୍ଟରେ ସେ ୫ଟି ଶତକ ଏବଂ ଗୋଟିଏ ଅର୍ଦ୍ଧଶତକ କରିଥିଲେ । ଏହା ବ୍ୟତୀତ, ନାୟର ଟି-୨୦ ଫର୍ମାଟରେ ଖେଳାଯାଇଥିବା ସୟଦ ମୁସ୍ତାକ ଅଲୀ ଟ୍ରଫିର ଏହି ସିଜିନରେ ୬ଟି ମ୍ୟାଚରେ ୨୫୫ ରନ କରିଥିଲେ । ସେହି ଟୁର୍ଣ୍ଣାମେଣ୍ଟରେ ସେ ତିନୋଟି ଅର୍ଦ୍ଧଶତକ କରିଥିଲେ ।
