ଡେରାବିଶ,୩୦ା୩ : ଡେରାବିଶ ବ୍ଲକ୍ କାଉପଡ଼ା ପଞ୍ଚାୟତ ଅନ୍ତର୍ଗତ ୫୩ ନଂ. ଜାତୀୟ ରାଜପଥର ଓଲଢି ଛକଠାରୁ ବାଘିଲା ପର୍ଯ୍ୟନ୍ତ କରାଯାଉଥିବା ପୂର୍ତ୍ତ ବିଭାଗ ରାସ୍ତାକୁ ନେଇ ଅଞ୍ଚଳବାସୀ ଆପତ୍ତି ଉଠାଇଛନ୍ତି । ଏହି ରାସ୍ତାର କାଉପଡ଼ା ରାଜସ୍ୱ ନିରୀକ୍ଷକଙ୍କ କାର୍ଯ୍ୟାଳୟ ନିକଟସ୍ଥ ରାସ୍ତା ମଝିରେ ଏକ ବିଦ୍ୟୁତ ଟ୍ରାନ୍ସଫର୍ମର ଥିଲେ ମଧ୍ୟ ରାସ୍ତାକୁ ଅଣଓସାରିଆ କରି ଠିକାଦାର ବସି ରହିବା ଯୋଗୁଁ ସାଧାରଣରେ ତୀବ୍ର ଅସନ୍ତୋଷ ଦେଖାଦେଇଛି ।
ରାସ୍ତା ନିର୍ମାଣ ପୂର୍ବରୁ ଏହି ଟ୍ରାନ୍ସଫର୍ମରର ସ୍ଥାନ ପରିବର୍ତ୍ତନ ପାଇଁ ଅଞ୍ଚଳବାସୀ ଦାବି କରିଥିଲେ । ଏଥିପାଇଁ ବିଦ୍ୟୁତ୍ ବିଭାଗ ପକ୍ଷରୁ ନିକଟରେ ଟ୍ରାନ୍ସଫର୍ମରର ସ୍ଥାନ ପରିବର୍ତ୍ତନ ପାଇଁ ପିଣ୍ଡି ନିର୍ମାଣ କରାଯାଇଛି । ମାତ୍ର ଠିକାଦାର ଏହି ଟ୍ରାନ୍ସଫର୍ମର ନିକଟରେ ଅଣଓସାରିଆ ପିଚୁ ରାସ୍ତା କରିଥିବା ଯୋଗୁଁ ଏହାର ପ୍ରତିବାଦ କରିଛନ୍ତି ଅଞ୍ଚଳବାସୀ । ତେବେ ରାସ୍ତା ମଝିରେ ରହିଥିବା ଟ୍ରାନ୍ସଫର୍ମର ଯୋଗୁଁ କେତେବେଳେ କ'ଣ ଦୁର୍ଘଟଣା ଘଟିବ କହି ହେଉନଥିବା ବେଳେ ନିକଟରେ ଏହି ଟ୍ରାନ୍ସଫର୍ମରର ଷ୍ଟେ ତାରରେ ପିଟି ହୋଇ ଦୁଇ ଜଣ ଆହତ ହୋଇଛନ୍ତି । ବିପଦକୁ ଆମନ୍ତ୍ରଣ କରୁଥିବା ଏହି ଟ୍ରାନ୍ସଫର୍ମରକୁ ସ୍ଥାନାନ୍ତର କରି ରାସ୍ତାକୁ ସରକାରୀ ଅନୁମୋଦିତ ଢଙ୍ଗରେ କରିବା ପାଇଁ କାଉପଡ଼ା ପଞ୍ଚାୟତର ପୂର୍ବତନ ସରପଞ୍ଚ ଲକ୍ଷ୍ମୀଧର ମହାପାତ୍ର ଦାବି କରିଛନ୍ତି । ନଚେତ୍ ଆନ୍ଦାଳନାତ୍ମକ ପନ୍ଥା ଅବଲମ୍ବନ କରାଯିବ ବୋଲି ଚେତାବନୀ ଦେଇଛନ୍ତି ।
