ପାଇଖାନା ଘରୁ ଯୁବକଙ୍କ ମୃତଦେହ ଉଦ୍ଧାର, ହତ୍ୟା ନା ଆତ୍ମହତ୍ୟା ?
ଖଲ୍ଲିକୋଟ, ୦୭/୦୨ : ପାଇଖାନା ଘରୁ ଯୁବକଙ୍କ ମୃତଦେହ ଉଦ୍ଧାର। ଗଞ୍ଜାମ ଜିଲ୍ଲା ଖଲ୍ଲିକୋଟରେ ଏଭଳି ଘଟଣା ଘଟିଛି। ଖଲ୍ଲିକୋଟ କରଣ ସାହିରେ ଜଣେ ବ୍ୟକ୍ତିଙ୍କ ପାଇଖାନାରେ ଜଣେ ଯୁବକଙ୍କ ମୃତଦେହ ପଡ଼ିଥିବା ଆଜି ସକାଳୁ ଦେଖିବାକୁ ମିଳିଥିଲା। ଖବର ପାଇ ଖଲ୍ଲିକୋଟ ପୋଲିସ ପହଞ୍ଚି ପାରିପାର୍ଶ୍ଵିକ ସ୍ଥିତି ଅନୁଧ୍ୟାନ କରିଛି। ସନ୍ଧାନୀ କୁକୁର ଓ ଫରେନସିକ୍ ଟିମ୍ ଆସି ଅଧିକ ତଦନ୍ତ କରିବ ବୋଲି ଜଣାପଡ଼ିଛି।
ସୂଚନାନୁଯାୟୀ, ଖଲ୍ଲିକୋଟ ଖୋଲ ସାହିର ସ୍ଵର୍ଗତ ଗଙ୍ଗାଧର ପ୍ରଧାନଙ୍କ ପୁଅ ମିଲୁ ପ୍ରଧାନ କରଣ ସାହିରେ ଭଡା ଘରେ ରହୁଥିବା ଜଣେ ବିଧବା ମହିଳାଙ୍କ ଘରକୁ ଯିବା ଆସିବା କରନ୍ତି। ଆଜି ସେହି ମହିଳାଙ୍କ ଘରର ପଡୋଶୀ ଘର ପାଇଖାନା ଘରୁ ମିଲୁଙ୍କ ମୃତଦେହ ପଡିଥିବା ଦେଖିବାକୁ ମିଳିଛି। ପାଇଖାନା ଘରର ଦୁଲାରେ ଏକ ଲୁଗା ବନ୍ଧା ଯାଇ ତଳକୁ ଓହଳି ରହିଥିବା ବେଳେ ମିଲୁଙ୍କ ମୃତଦେହ ତଳେ ବସିଥିବା ଅବସ୍ଥାରେ ରହିଛି। ପାଖରେ କିଛି ରକ୍ତ ମଧ୍ୟ ପଡିଥିବା ଦେଖିବାକୁ ମିଳିଛି। ଖବର ପାଇ ଖଲ୍ଲିକୋଟ ପୋଲିସ ପହଞ୍ଚି ପାରିପାର୍ଶ୍ଵିକ ସ୍ଥିତି ଅନୁଧ୍ୟାନ କରିଛି। ପାରିପାର୍ଶ୍ଵିକ ସ୍ଥିତିରୁ ମିଲୁଙ୍କୁ ହତ୍ୟା କରାଯାଇଥିବା ପରିବାର ଲୋକ ସନ୍ଦେହ କରୁଛନ୍ତି। ସନ୍ଧାନୀ କୁକୁର ଓ ଫରେନସିକ୍ ଟିମ୍ ଆସି ଅଧିକ ତଦନ୍ତ କରିବ ବୋଲି ଜଣାପଡ଼ିଛି। ଶବ ବ୍ୟବଚ୍ଛେଦ ରିପୋର୍ଟ ଆସିବା ପରେ ଏହା ହତ୍ୟା ନା ଆତ୍ମହତ୍ୟା ତାହା ସ୍ପଷ୍ଟ ହେବ ବୋଲି ପୋଲିସ କହିଛି।
