ଭାରତ ବର୍ଡର ଗାଭାସ୍କର ଟ୍ରଫି ଜିତିବାକୁ ହେଲେ ବିରାଟ କୋହଲିଙ୍କୁ ରନ୍ କରିବାକୁ ପଡିବ: ହରଭଜନ ସିଂହ
ନୂଆଦିଲ୍ଲୀ ୦୭/ ୦୨: ଭାରତୀୟ ଦଳର ପୂର୍ବତନ ସ୍ପିନ୍ ଷ୍ଟାର ହରଭଜନ ସିଂହ କହିଛନ୍ତି, ଭାରତକୁ ବର୍ଡର ଗାଭାସ୍କର ଟ୍ରଫି ଜିତିବାକୁ ହେଲେ ବିରାଟ କୋହଲିଙ୍କୁ ରନ୍ କରିବାକୁ ପଡିବ । ଭାରତ ଏବଂ ଅଷ୍ଟ୍ରେଲିଆ ମଧ୍ୟରେ ୪ ଟିକିଆ ଟେଷ୍ଟ ସିରିଜର ପ୍ରଥମ ମ୍ୟାଚ୍ ଫେବୃଆରୀ ୯ ତାରିଖରୁ ନାଗପୁରରେ ଆରମ୍ଭ ହେବାକୁ ଯାଉଛି । ଉଭୟ ଦଳ ମୁହାଁମୁହିଁ ହେବାକୁ ଜୋରଦାର ପ୍ରସ୍ତୁତି ଜାରି ରଖିଛନ୍ତି ।
ଏକ ଗଣମାଧ୍ୟମକୁ ସାକ୍ଷାତକାର ଦେଇ ହରଭଜନ ସିଂହ କହିଛନ୍ତି, ପୃଥିବୀରେ ଯେତେ ପ୍ରଶଂସା ସବୁ ଆଣି ଅଜାଡି ଦେଲେ ବି ବିରାଟ କୋହଲିଙ୍କୁ କମ୍ ହେବ । ତାଙ୍କ ଫର୍ମକୁ ଫେରିବା ସମସ୍ତେ ଯେମିତି ଚାତକ ଭଳି ଚାହିଁ ରହିଥିଲେ । ସେ ଗତ କିଛି ବର୍ଷ ଧରି ଅନେକ ସ୍କୋର କରିଛନ୍ତି । ଏପରି ଲାଗୁଛି କୋହଲି ଯେବେ ବି ଶତକ ହାସଲ କରନ୍ତି ସେତେବଳେ ହିଁ ସେ ଫର୍ମରେ ରହିଥାନ୍ତି । ଗତ ୩ ବର୍ଷ ଅବଶ୍ୟ କୋହଲିଙ୍କ ପାଇଁ ସେତେଟା ଫଳପ୍ରଦ ହୋଇନାହିଁ । ତଥାପି ପରବର୍ତ୍ତୀ ମୁହୁର୍ତ୍ତରେ ସେ ନିଜ ଆତ୍ମବିଶ୍ବାସ ବଢାଇବା ସହ ଆହୁରି ମାର୍ଜିତ କରି ନିଜ ଫର୍ମକୁ ଫେରାଇଆଣିଛନ୍ତି।
ଭଜିଙ୍କ କହିବା ଅନୁଯାୟୀ, ‘କୋହଲି ତାଙ୍କ ପୁରୁଣା ଫର୍ମ ଠାରୁ ଆହୁରି ସୁଦୃଢ ହୋଇପାରିଛନ୍ତି ଓ ସେ ଅଷ୍ଟ୍ରେଲିଆ ବିପକ୍ଷ ବର୍ଡର ଗାଭାସ୍କର ଟ୍ରଫିରେ ଅଧିକ ରନ୍ କରିବେ । ଆଉ କୋହଲି ଫର୍ମରେ ଥିବା ବେଳେ ବିଶ୍ବ ଏଭଳି କୌଣସି ଦଳ ନାହିଁ ଯିଏକି ତାଙ୍କୁ ରନ୍ କରିବାରୁ ଅଟକାଇପାରିବ । ଆଗାମି ସିରିଜରେ ଆମେ ମଧ୍ୟ କୋହଲିଙ୍କ ଠାରୁ ତାହା ହିଁ ଆଶା କରୁଛୁ । ଅବଶ୍ୟ ସେ ବାଂଲାଦେଶ ବିପକ୍ଷ ଟେଷ୍ଟରେ ଅଧିକ ସ୍କୋର କରିପାରିନଥିଲେ । କିନ୍ତୁ ତାଙ୍କ ଭଳି ବଡ କ୍ରିକେଟର ବଡ ବଡ ମ୍ୟାଚରେ ନିଜର ପାରଦର୍ଶିତା ପ୍ରଦର୍ଶନ କରନ୍ତି ଯାହାକି ପୂର୍ବରୁ ନଜିର ରହିଛି’।
ପଢନ୍ତୁ: ଦ୍ରୁତ ଆରୋଗ୍ୟ ଲାଭ କରୁଛନ୍ତି ପନ୍ତ, ସୋସିଆଲ ମିଡିଆରେ ପୋଷ୍ଟ କରି କହିଲେ ଏମିତି
