କାଠମାଣ୍ଡୁ/ନୂଆଦିଲ୍ଲୀ: ନେପାଳରେ ଜାରି ହିଂସା ମଧ୍ୟରେ ଏକ ଅନ୍ତରୀଣ ସରକାର ଗଠନ ପାଇଁ ପ୍ରସ୍ତୁତି ଜୋରସୋରରେ ଚାଲିଛି । ଯଦିଓ ଏପର୍ଯ୍ୟନ୍ତ ଅନ୍ତରୀଣ ସରକାରରେ ପ୍ରଧାନମନ୍ତ୍ରୀ କିଏ ହେବେ ତାହା ସ୍ଥିର ହୋଇନାହିଁ, କିନ୍ତୁ ସମୟ ସହିତ ନୂଆ ନାମ ବିଷୟରେ କଳ୍ପନାଜଳ୍ପନା ବୃଦ୍ଧି ପାଉଛି । ଗୋଟିଏ ଦିନ ପୂର୍ବରୁ ନେପାଳର ପୂର୍ବତନ ମୁଖ୍ୟ ବିଚାରପତି ସୁଶୀଳା କାର୍କି ଏହି ଦୌଡ଼ରେ ସବୁଠାରୁ ଆଗରେ ଥିଲେ । କିନ୍ତୁ ଏବେ ଏହା ପ୍ରାୟ ନିଶ୍ଚିତ ଯେ, କୁଲମାନ ଘିସିଂ ଅନ୍ତରୀଣ ପ୍ରଧାନମନ୍ତ୍ରୀ ହେବେ ।
କୁଲମାନ ଘିସିଂ ନେପାଳ ବିଦ୍ୟୁତ ପ୍ରାଧିକରଣର ପରିଚାଳନା ନିର୍ଦ୍ଦେଶକ ଭାବରେ ଦୁଇଟି କାର୍ଯ୍ୟକାଳ ସମାପ୍ତ କରିଛନ୍ତି । ସେ ତାଙ୍କର ପ୍ରଥମ କାର୍ଯ୍ୟକାଳ ୨୦୧୬-୨୦୨୦ ଏବଂ ତା'ପରେ ୨୦୨୧-୨୦୨୫ରେ ସମାପ୍ତ କରିଥିଲେ । ତାଙ୍କର ଜନ୍ମ ୨୫ ନଭେମ୍ବର ୧୯୭୦ରେ ନେପାଳର ରାମେଛାପ ଜିଲ୍ଲାରେ ହୋଇଥିଲା । ସେ ଭାରତର ଜାମସେଦପୁର ସହରରୁ ଇଞ୍ଜିନିୟରିଂରେ ଡିଗ୍ରି ହାସଲ କରିଥିଲେ । ତାଙ୍କ କାର୍ଯ୍ୟକାଳ ମଧ୍ୟରେ ସେ ନେପାଳର ଅନେକ ଅଞ୍ଚଳରେ ବିଦ୍ୟୁତ ସମସ୍ୟାର ସମାଧାନ କରିଥିଲେ ଏବଂ ଅନେକ ସ୍ଥାନରେ ବିଦ୍ୟୁତ ଉପଲବ୍ଧ କରାଇଥିଲେ ।
ଇଞ୍ଜିନିୟର କୁଲମାନ ଘିସିଂ ନେପାଳରେ ବିଦ୍ୟୁତ କାଟ ସମସ୍ୟାର ସମାଧାନ ପାଇଁ ଜଣାଶୁଣା। ସେ ନେପାଳ ବିଦ୍ୟୁତ ପ୍ରାଧିକରଣ ( NEA) କୁ କ୍ଷତିରୁ ବାହାର କରି ଲାଭଦାୟକ କରିଥିଲେ। କେପି ଶର୍ମା ଓଲିଙ୍କ ସରକାର ତାଙ୍କୁ ମାର୍ଚ୍ଚ ୨୪, ୨୦୨୫ ରେ NEAର ପରିଚାଳନା ନିର୍ଦ୍ଦେଶକ ପଦରୁ ହଟାଇ ଦେଇଥିଲେ । କୁହାଯାଏ ଯେ, ସେ ଅନେକ ଶିଳ୍ପପତିଙ୍କ ବିଦ୍ୟୁତ ବିଲ୍ ଛାଡ଼ କରିବାକୁ ମନା କରିଥିଲେ । ତେଣୁ ତାଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଥିଲା ।
କୁଲମାନ ଘିସିଂଙ୍କ ସରକାର ବିରୋଧୀ ମନୋଭାବ ତାଙ୍କୁ ଯୁବପିଢ଼ିଙ୍କ ମଧ୍ୟରେ ପରିଚୟ କରାଇଥିଲା । ପାଠପଢ଼ା ବ୍ୟତୀତ, ତାଙ୍କର ଭାରତ ସହିତ ଏକ ବିଶେଷ ସମ୍ପର୍କ ରହିଛି। NEAର ପରିଚାଳନା ନିର୍ଦ୍ଦେଶକ ଥିବା ସମୟରେ ନେପାଳ ୨୦୨୩-୨୪ରେ ଭାରତକୁ ବିଦ୍ୟୁତ୍ ରପ୍ତାନି କରିବା ଆରମ୍ଭ କରିଥିଲା । ସେ ନେପାଳର ଜଳ ବିଦ୍ୟୁତ୍ ଉତ୍ପାଦନକୁ ପରିବର୍ତ୍ତନ କରିଥିଲେ। କୁଲମାନ ଘିସିଂଙ୍କ ବହିଷ୍କାର ପରେ, ସାରା ଦେଶରେ ତାଙ୍କର ଲୋକପ୍ରିୟତା ଆହୁରି ବୃଦ୍ଧି ପାଇଥିଲା।
