ଜଗତପୁର, ୨୩/୦୨:  କଟକ ସହର ଉପକଣ୍ଠ ଜଗତପୁର ଥାନା ଅଧୀନ ମହାଜନପୁର ବାଣ ବିସ୍ଫୋରଣରେ ଗୋଟିଏ ପରିବାରର ତିନି ଜଣ ସଦସ୍ୟଙ୍କ ଅକାଳ ମୃତ୍ୟୁ ଘଟଣା ମନରୁ ନ ଲିଭୁଣୁ  ପୁଣି ଉକ୍ତ ଗ୍ରାମ ନିକଟସ୍ଥ ଏକ ଜଙ୍ଗଲିଆ ସ୍ଥାନରୁ ପୁଲିସ ବିପୁଳ ପରିମାଣର ବିସ୍ଫୋରକ ସାମଗ୍ରୀ ଠାବ କରିଛି ।

ବେଆଇନ ବାଣ ପ୍ରସ୍ତୁତକାରୀଙ୍କ ଉପରେ ରୋକ୍ ଲଗାଇବାକୁ ୩ଦିନ ଧରି ପୁଲିସ ଆକ୍ସନ୍ ମୋଡ଼୍‌ରେ ରହି ତଦନ୍ତ ପ୍ରକ୍ରିୟାକୁ ଜୋର୍‌ଦାର କରିଥିଲା । ପ୍ରତିଦିନ ବେଆଇନ ବାଣ ପ୍ରସ୍ତୁତକାରୀଙ୍କ ତାଲିକା କରି ବିଭିନ୍ନ ସ୍ଥାନରେ ଯାଞ୍ଚ୍ କରୁଥିଲା । ଏହି କ୍ରମରେ ବେଆଇନ ବାଣ ମହଜୁଦ୍ ଥିବା ମହାଜନପୁର ଗ୍ରାମ ପାଶ୍ୱର୍ ଏକ ଛୋଟିଆ ଜଙ୍ଗଲରୁ ବିପୁଳ ପରିମାଣର ବିସ୍ଫୋରକ ଠାବ କରିଛି ପୁଲିସ ଟିମ୍ । ସେଠାରେ ଟନ୍ ଟନ୍ ପରିମାଣର ବାଣ, ବାରୁଦ ସହ ବାଣରେ ବ୍ୟବହୃତ ଅନ୍ୟ ବିସ୍ଫୋରକ, ସାମଗ୍ରୀ ରହିଥିବା ଦେଖାଯାଇଛି। ବିସ୍ଫୋରଣ ଭଳି କିଛି ଅଘଟଣ ଆଶଙ୍କାରେ ପୁଲିସ ସମ୍ପୃକ୍ତ ସ୍ଥାନଠାରୁ କିଛି ଦୂରରୁ ଏହାକୁ ଘେରାଉ କରି ରଖିଛି ।

ତେବେ ଏଭଳି ବିପଜ୍ଜନକ ସାମଗ୍ରୀକୁ ଜବତ ସହ ଯାଞ୍ଚ୍ କରି ତାଲିକା ପ୍ରସ୍ତୁତ କରିବା ନେଇ ବଡ଼ ସମସ୍ୟା ଉପୁଜିଛି । ସବୁଠୁ ବିପଦଜନକ ବମ୍, ଆସ୍ମାନ୍ ଗୋଲା ତିଆରିରେ ବ୍ୟବହୃତ ବସ୍ତା ବସ୍ତା ବାରୁଦ ପ୍ରାୟ ୫୦ ମିଟର ଲମ୍ବ ଓ ୨୦ ମିଟର ଚଉଡ଼ା ପରିମିତ ଏହି ଜଙ୍ଗଲିଆ ସ୍ଥାନରେ ରହିଛି । ପୁଳା ପୁଳା ବିସ୍ଫୋରକ କେଉଁଠି ଲତା, ବୁଦା ମୂଳରେ ତ’ ପୁଣି କେଉଁଠି ଗଛକୁ ଡେରା ହୋଇ ରହିଥିବା ଦେଖିବାକୁ ମିଳିଛି । ଜବତ ସମୟରେ ଟିକିଏ ଅସାବଧାନ ହେଲେ ବିସ୍ଫୋରଣ ହୋଇ ଜୀବନ ଚାଲିଯିବାର ଭୟ ରହିଛି । ଏପରିସ୍ଥଳେ ବମ୍ ଡିସ୍ପୋଜାଲ ସ୍କ୍ୱାଡ୍ ଓ ଦମକଳ ବାହିନୀ ସହାୟତାରେ ଏଗୁଡ଼ିକୁ ନଷ୍ଟ କରିବା ପାଇଁ ପୁଲିସ ପ୍ରକ୍ରିୟା ଆରମ୍ଭ କରିଛି । ଆସନ୍ତାକାଲି ଏହା କରାଯିବ ବୋଲି ସୂଚନା ମିଳିଛି । ଘଟଣାସ୍ଥଳରେ ଦିନରାତି ପୁଲିସ ପ୍ରହରାକୁ କଡ଼ାକଡ଼ି କରାଯାଇଛି ।

ପୁଲିସ ଚଢ଼ଉରୁ ବର୍ତ୍ତିବା ପାଇଁ ବେଆଇନ ବାଣ ପ୍ରସ୍ତୁତକାରୀମାନେ ଯୋଜନାବଦ୍ଧ ଭାବେ ଗହୀର ବିଲ ମଧ୍ୟରେ ଘଞ୍ଚ ଜଙ୍ଗଲିଆ ସ୍ଥାନରେ ବିପୁଳ ପରିମାଣର ବିସ୍ଫୋରକ ସାମଗ୍ରୀ ରଖିଥିବା ଅନୁମାନ କରାଯାଉଛି । ଏବେ ଦୋଳ ଯାତ୍ରା ଓ ବିବାହ ଋତୁ ଚାଲିଥିବାରୁ ଅର୍ଡର ମୁତାବକ ବାଣ ପ୍ରସ୍ତୁତ କରାଯାଇ ଏଠାରେ ଗୁପ୍ତରେ ରଖାଯାଇଥିବା କୁହାଯାଉଛି । ଜନସାଧାରଣ ଓ ପୁଲିସର ଦୃଷ୍ଟି ଆଢ଼ୁଆଳରେ ବେଆଇନ ଭାବେ ଏଠାରେ ବାଣ ପ୍ରସ୍ତୁତ କରାଯାଇ କ୍ରମାଗତ ଭାବେ ବାହାରକୁ ଚାଲାଣ କରାଯାଉଥିବା ପ୍ରାଥମିକ ତଦନ୍ତୁ ଜଣାପଡ଼ିଛି । ଜଙ୍ଗଲିଆ ସ୍ଥାନଟିର ଭିତରୁ ବାହାରକୁ ସ୍ପଷ୍ଟ ଦେଖାଯାଉନଥିବା କଣ୍ଟାଗଛ ସଫା କରାଯାଇଛି । ଏଠାରେ ଏକାଧିକ ବ୍ୟକ୍ତି ବାଣ ପ୍ରସ୍ତୁତ କରିବା ଭଳି ସ୍ଥାନ ରହିଛି।