ଭଦ୍ରକ,୨୧/୬ : ଷ୍ଟେସନର ଗୋଟିଏ ପ୍ଲାଟଫର୍ମରୁ ଅନ୍ୟ ପ୍ଲାଟଫର୍ମକୁ ଲିଫ୍ଟରେ ଯାଉଥିବାବେଳେ ଅଧାରେ ଅଟକି ଗଲା ଲିଫ୍ଟ । ପରେ ରିପାରିଂ ଚାମ୍ବର୍ ଖୋଲି ଡେଇଁ ପଡ଼ିଲେ ଦିବ୍ୟାଙ୍ଗ ଯୁବକ । ଗୁରୁତର ଅବସ୍ଥାରେ ମେଡ଼ିକାଲରେ ଭର୍ତ୍ତି । ଭଦ୍ରକ ରେଳ ଷ୍ଟେସନର ୩ ଓ ୪ନମ୍ୱର ପ୍ଲାଟଫର୍ମରେ ଘଟିଛି ଏଭଳି ଅଘଟଣ ।
ସୂଚନା ଅନୁସାରେ, ପଶ୍ଚିମବଙ୍ଗ ରାଜ୍ୟ ଖଡ଼ଗପୁର, ପୁରୁଣା ବଜାର ଅଞ୍ଚଳର ସୁକୁମାର ସିଂ ଟ୍ରେନରେ ଭିକ୍ଷା ବୃତ୍ତି କରି ଚଳନ୍ତି । ସେ ଆଜି ଭଦ୍ରକ ଷ୍ଟେସନରେ ଓହ୍ଲାଇ ଅନ୍ୟ ପ୍ଲାଟଫର୍ମକୁ ଲିଫ୍ଟରେ ଯାଇଥିଲେ । ଲିଫ୍ଟ କିଛି ଦୂରରେ ଅଟକି ଯିବାରୁ ଦିବ୍ୟାଙ୍ଗ ଜଣଙ୍କ ଲିଫ୍ଟର ରିପାରିଂ ଚାମ୍ବର ଖୋଲି ଡେଇଁ ପଡ଼ିଥିଲେ । ତେବେ ଲିଫ୍ଟଟି ସେହି ସ୍ଥାନରେ ରହିଥିବାବେଳେ ତଳେ ବହୁ ସମୟ ଧରି ପଡ଼ି ରହିଥିଲେ । ଏହି ଘଟଣାକୁ ନେଇ ଆରପିଏଫ ଖବର ପାଇବା ପରେ ଯୁବକଙ୍କୁ ଉଦ୍ଧାର କରି ଭଦ୍ରକ ଜିଲ୍ଲା ମୁଖ୍ୟ ଡାକ୍ତରଖାନାରେ ଭର୍ତ୍ତି କରିଛି । ତେବେ ରେଳବାଇ ତରଫରୁ କୌଣସି ପ୍ରତିକ୍ରିୟା ମିଳି ନ ଥିବାବେଳେ ଲିଫ୍ଟଟି ଖରାପ ଥିବାରୁ ବ୍ୟବହାର କରାଯାଉଥିଲା ବୋଲି ସୂଚନା ମିଳିଛି ।
