କୋଲକାତା,୦୨/୦୬: କୋଲକାତା ଇସ୍କନ୍ର ପ୍ରସିଦ୍ଧ ଜଗନ୍ନାଥ ରଥଯାତ୍ରାରେ ରଥର ଚକାକୁ ଦୀର୍ଘ ୪୮ ବର୍ଷ ପରେ ବଦଳା ଯାଇଛି । ଏଥର ରଥରେ ସୁଖୋଇ ବିମାନର ଟାୟାର ଲଗାଯାଉଛି । ରୁଷୀ ଯୁଦ୍ଧ ବିମାନ ସୁଖୋଇର ଉଡ଼ାଣ ବେଗ ଘଣ୍ଟା ପିଛା ୨୮୦ କିଲୋମିଟର ହୋଇଥାଏ । ତେବେ ରଥ ଘଣ୍ଟା ପିଛା ୧.୪ କିଲୋମିଟର ଗତିରେ ଚାଲିବ ।
ଇସ୍କନ୍ କୋଲକାତା ପକ୍ଷରୁ କୁହାଯାଇଛି ଯେ ଅନେକ ବର୍ଷ ଧରି ରଥକୁ ଚଳାଇବାରେ ସମସ୍ୟା ହେଉଥିଲା । ଆୟୋଜକ ୧୫ ବର୍ଷ ହେଲା ନୂଆ ଟାୟାର ସନ୍ଧାନରେ ରହିଥିଲେ । ବୋଇଙ୍ଗ୍ ବିମାନର ପୁରୁଣା ଟାୟାର ବ୍ୟବହାର କରାଯାଉଥିଲା । କିନ୍ତୁ ଏବେ ଏହା ବଜାରରେ ମିଳିବା କଷ୍ଟକର ହୋଇପଡ଼ିଛି । ଏହାପରେ ଆୟୋଜକମାନେ ସୁଖୋଇ ବିମାନର ଟାୟାରକୁ ରଥରେ ଲଗାଇବାକୁ ନିଷ୍ପତ୍ତି ନେଇଥିଲେ । କାରଣ ଏହାର ବ୍ୟାସ ବୋଇଙ୍ଗ୍ ଟାୟାର ସହ ମେଳ ଖାଉଛି । ଇସ୍କନ୍ ମ୍ୟାନେଜମେଣ୍ଟ ସମ୍ପୃକ୍ତ କମ୍ପାନିଠାରୁ ସୁଖୋଇର ୪ଟି ଟାୟାର କ୍ରୟ କରିଛି । ଗୋଟିଏ ଟାୟାରର ଓଜନ ୧୧୦ କିଲୋଗ୍ରାମ ଓ ବ୍ୟାସ ୪ ଫୁଟ । ଏବେ ସେଗୁଡ଼ିକୁ ରଥରେ ଲଗାଯାଉଛି । ପ୍ରଭୁ ଜଗନ୍ନାଥଙ୍କ ରଥଯାତ୍ରା ପ୍ରତିବର୍ଷ ଆଷାଢ଼ ମାସ ଶୁଳ୍କ ପକ୍ଷ ଦ୍ୱିତୀୟା ତିଥିରେ ଆରମ୍ଭ ହୋଇଥାଏ । ଏଥର ରଥଯାତ୍ରା ଜୁନ୍ ୨୭ରେ ଆରମ୍ଭ ହେବ । ଏହା ୮ ଦିନ ଧରି ଚାଲି ଜୁଲାଇ ୫ରେ ଶେଷ ହେବ ।
