ନୂଆଦିଲ୍ଲୀ,୧୩/୦୧: ପ୍ରୟାଗରାଜରେ ମହାକୁମ୍ଭର ଶଙ୍ଖନାଦ। ତ୍ରିବେଣୀ ସଙ୍ଗମ ତଟରେ ବୁଡ଼ ପକାଇଲେ ଲକ୍ଷାଧିକ ସାଧୁସନ୍ଥ ଓ ଶ୍ରଦ୍ଧାଳୁ।ଏଥର ୪୫ ଦିନ ଧରି ଅନୁଷ୍ଠିତ ଏହି କାର୍ଯ୍ୟକ୍ରମରେ ୪୫ କୋଟି ଲୋକଙ୍କ ସମାଗମ ହେବ । କୁମ୍ଭ ଉତ୍ତର ପ୍ରଦେଶ ରାଜକୋଷକୁ ୨୫ ହଜାର କୋଟିର ରାଜସ୍ୱ ଏବଂ ଅର୍ଥନୀତିକୁ ୨ ଲକ୍ଷ କୋଟିର କାରବାର ସୁଯୋଗ ସୃଷ୍ଟି କରିବ ବୋଲି ଅନୁମାନ କରାଯାଇଛି ।
କୁମ୍ଭ ମେଳା ଦ୍ୱାରା ସ୍ୱୟଂ ସହାୟକ ଗୋଷ୍ଠୀ, କାରିଗର, ହୋଟେଲ, ହୋମଷ୍ଟେ ଓନର, ରେଷ୍ଟୁରାଣ୍ଟ ଅପରେଟର, ଫୁଡ ଭେଣ୍ଡରଙ୍କ ସମେତ ଡାବର, ମଦର ଡେରୀ, ଆଇଟିସି ପ୍ରମୁଖ ବ୍ରାଣ୍ଡଗୁଡିକ ୩ ହଜାର କୋଟି ବିନିଯୋଗ କରିବେ ବୋଲି ଆଶା କରାଯାଇଛି ।
ଉତ୍ତର ପ୍ରଦେଶ ସରକାରଙ୍କ ଆକଳନ ମୁତାବକ, ୨୦୧୯ କୁମ୍ଭରେ ୨୪ କୋଟି ଶ୍ରଦ୍ଧାଳୁଙ୍କ ସମାଗମ ହୋଇଥିଲା । ୨୦୧୩ ପୁର୍ଣ୍ଣ କୁମ୍ଭରେ ୧୩ କୋଟି ଲୋକ ଯୋଗ ଦେଇଥିଲେ । ୨୦୧୬ରେ ଉଜ୍ଜୟିନୀରେ ହୋଇଥିବା କୁମ୍ଭରେ ୭.୫ କୋଟି ଶ୍ରଦ୍ଧାଳୁଙ୍କ ସମାଗମ ହୋଇଥିଲା । ଯୋଗୀ ଆଦିତ୍ୟନାଥଙ୍କ ସରକାର କୁମ୍ଭ ପାଇଁ ମୋଟ ୫୪୯ ପ୍ରକଳ୍ପ ହାତକୁ ନେଇଛନ୍ତି । ଭିତ୍ତିଭୂମି ଠାରୁ ପରିମଳ ଯାଏ ବିଭିନ୍ନ କାର୍ଯ୍ୟ ଲାଗି ୬୯୦୦ କୋଟି ଟଙ୍କା ବିନିଯୋଗ କରାଯାଇଛି । ୨୦୧୯ରେ ଏହା ୩୭୦୦ କୋଟି ଟଙ୍କା ଏବଂ ୭୦୦ ପ୍ରକଳ୍ପ ରହିଥିଲା ।
ୟୁପିକୁ ୧ ଟ୍ରିଲିୟନ ଡଲାର ଅର୍ଥନୀତି କରିବା ଦିଗରେ ଏବେ ରାଜ୍ୟ ସରକାର ବ୍ରାଣ୍ଡ୍ ୟୁପି ଉପରେ କାମ କରୁଛନ୍ତି । ଏହାର ସଫଳ ଆୟୋଜନ ସାଂସ୍କୃତିକ ଜାଗରଣକୁ ଆଉପାଦେ ଆଗେଇ ନେବ ବୋଲି ୟୁପି ସରକାର ଆଶା ରଖିଛନ୍ତି । ଏ ଦିଗରେ ପୂର୍ବରୁ କାଶି ବିଶ୍ୱନାଥ ଧାମ କରିଡର ଏବଂ ଅଯୋଧ୍ୟାରେ ରାମ ମନ୍ଦିରର ସ୍ଥାପନା ହୋଇଛି ।
ଯୋଗୀ ଆଦିତ୍ୟ ନାଥ କହିଛନ୍ତି, ୨୦୧୬ରେ ଅଯୋଧ୍ୟାକୁ ୨.୮୩ ଲକ୍ଷ ଶ୍ରଦ୍ଧାଳୁ ପରିଦର୍ଶନ କରିଥିଲେ । ଏହା ୨୦୨୪ରେ ୧୩.୪ କୋଟିକୁ ବୃଦ୍ଧି ହୋଇଛି ।ସେହିଭଳି କାଶି ବିଶ୍ୱନାଥ ଧାମ କରିଡରକୁ ୬ କୋଟି ଲୋକ ପରିଦର୍ଶନ କରିଛନ୍ତି । ସିଆଇଆଇ ଅନୁମାନ ମୁତାବକ, ୨୦୧୯ କୁମ୍ଭରେ ୧.୨ ଲକ୍ଷ କୋଟିର ଆର୍ôଥକ ଲାଭ ଅର୍ଥନୀତିକୁ ମିଳିଥିଲା । ଏହା ଚଳିତ ଥର ବୃଦ୍ଧି ହେବାର ଢ଼େର ସମ୍ଭାବନା ରହିଛ।
