ୱାଶିଂଟନ୍,୩୧/୦୩: ଇରାନକୁ ବଡ଼ ଧମକ ଦେଇଛନ୍ତି ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍ । ଯଦି ଇରାନ ଆମେରିକା ସହ ମିଶି ନ୍ୟୁକ୍ଲିୟର ଚୁକ୍ତିରେ ସହମତ ନ ହୁଏ ତେବେ ତେବେ ବୋମା ବର୍ଷିବ ଏବଂ ଇରାନ ଉପରେ ବ୍ୟାପକ ଆର୍ଥିକ କଟକଣା ଲାଗିବ ବୋଲି ଟ୍ରମ୍ପ୍ ସିଧାସଳଖ କହିଛନ୍ତି ।
ଏକ ସାକ୍ଷାତକାରରେ ଟ୍ରମ୍ପ୍ କହିଛନ୍ତି, ଆମେରିକା ଏବଂ ଇରାନ ମଧ୍ୟରେ ଆଲୋଚନା ଜାରି ରହିଛି । କିନ୍ତୁ ଇରାନ ଯଦି କୌଣସି ବୁଝାମଣା ନ କରେ ତେବେ ଏହା ଉପରେ ବୋମାମାଡ଼ ହେବ । ଏଥିସହ ଇରାନ ଉପରେ ପୁଣି ସେକେଣ୍ଡାରୀ ଟାରିଫ୍ (ଦ୍ୱିତୀୟକ କଟକଣା) ଲାଗିବ, ଯାହା ସେ ୪ ବର୍ଷ ପୂର୍ବରୁ ଲଗାଇଥିଲେ । ଟ୍ରମ୍ପ୍ ୨୦୧୭ରୁ ୨୦୨୧ ପର୍ଯ୍ୟନ୍ତ ରାଷ୍ଟ୍ରପତି ଥିବାବେଳେ ଇରାନ ସହ ଆମେରିକାର ଥିବା ୨୦୧୫ର ଏକ ଚୁକ୍ତିରୁ ଓହରି ଯାଇଥିଲେ । ଏହି ବୁଝାମଣା ଇରାନର ପରମାଣୁ କାର୍ଯ୍ୟକ୍ରମ ଉପରେ ଶକ୍ତ କଟକଣା ଲଗାଇବା ଲାଗି ଉଦ୍ଦିଷ୍ଟ ଥିଲା ଯାହା ବଦଳରେ ଇରାନକୁ ଆର୍ଥିକ କଟକଣାରୁ ଆଶ୍ୱସ୍ତି ମିଳିଥିଲା । ଏହା ପରେ ଟ୍ରମ୍ପ୍ ପୁଣି ଇରାନ ଉପରେ କଟକଣା ଲଗାଇଥିଲେ । ଫଳରେ ଇରାନର ଆର୍ଥିକ ସଙ୍କଟ ଆହୁରି ବଢ଼ିଯାଇଥିଲା ।
ଅନ୍ୟପକ୍ଷରେ ଇରାନ ଟ୍ରମ୍ପ୍ଙ୍କ ଧମକକୁ ଖାରଜ କରିଛି । ଇରାନର ବିଦେଶ ମନ୍ତ୍ରୀ ଅବ୍ୱାସ ଅରାକଚି କହିଛନ୍ତି, ଇରାନ ଟ୍ରମ୍ପ୍ଙ୍କ ପତ୍ରର ଜବାବ ଓମାନ୍ ମାଧ୍ୟମରେ ପଠାଇଛି । ଚିଠିରେ ଟ୍ରମ୍ପ୍ ଇରାନ ସହ ନୂଆ ପରମାଣୁ ବୁଝାମଣା ଲାଗି ଅପିଲ କରିଥିଲେ । ଇରାନ ଉପରେ ଆକ୍ରମଣ ଲାଗି ଟ୍ରମ୍ପ୍ଙ୍କ ଏହି ଧମକ ଯୋଗୁ ମଧ୍ୟପ୍ରାଚ୍ୟରେ ସଂଘର୍ଷ ବଢ଼ିବାର ଆଶଙ୍କା ବଢ଼ିଛି । କାରଣ ଇରାନ ୟୁରାନିୟମ ସମ୍ବନ୍ଧିତ କାର୍ଯ୍ୟକ୍ରମକୁ ଦ୍ରୁତଗତିରେ ବଢ଼ାଇବାରେ ଲାଗିଛି ।
ଗାଜାରେ ଅସ୍ତ୍ରବିରତି ପ୍ରସ୍ତାବକୁ ହମାସର ମଞ୍ଜୁରୀ, ଇସ୍ରାଏଲ ଦେଲା ନୂଆ ପ୍ରସ୍ତାବ
