ମାଲକାନଗିରି, ୧୮/୩(ଆପ୍ର) ମାଲକାନଗିରି ଜିଲ୍ଲା ରେ ତାପମାତ୍ରା ଦିନକୁ ଦିନ ବୃଦ୍ଧିପାଇବାରେ ଲାଗିଛି। ଉତ୍ତପ୍ତ ସହର ପାଲଟି ଯାଇଛି ଜିଲ୍ଲା । ଯେମିତି ଆକାଶରୁ ନିଆଁହୁଳା ଖସିଲା ପରି ଲାଗୁଛି। ଏଥିସହ ଏହି ଜିଲ୍ଲାରେ ଦୀର୍ଘଦିନ ଧରି ବର୍ଷା ନଥିବାରୁ ଜଳ ସଙ୍କଟ ଦେଖାଗଲାଣି। ଏଥିସହ ଅଘୋଷିତ ବିଦ୍ୟୁତ କାଟ ଜନଜୀବନକୁ ଅତିଷ୍ଠ କରିପକାଇଛି । ପ୍ରବଳ ଗ୍ରୀଷ୍ଣପ୍ରବାହ ସାଙ୍ଗକୁ ଗରମ ଓ ଗୁଳୁଗୁଳି ଯୋଗୁ ଜିଲ୍ଲାବାସୀ ହନ୍ତସନ୍ତ ହେଉଛନ୍ତି ।
ଜିଲ୍ଲାରେ ଦିନକୁ ଦିନ ତାପାମାତ୍ରା ବୃଦ୍ଧିପାଇ ପ୍ରବଳଖରା ହେଉଥିଲେ ମଧ୍ୟ ଏପର୍ଯ୍ୟନ୍ତ ପଞ୍ଚାୟତ କିମ୍ବା ପୌରଞ୍ଚଳରେ ବାଟୋଇଙ୍କ ପାଇଁ ଜଳଛତ୍ର ମଧ୍ୟ ଖୋଲାଯାଇ ନଥିବାର ଜଣାପଡିଛି । ମାଲକାନଗିରି ଜିଲ୍ଲାରେ ଅଧିକାଶଂ ଟିଣ ଛପର ଘର ଯୋଗୁଁ ପ୍ରବଳ ଖରାରେ ଟିଣଗୁଡିକ ତାତି ନିଆଁ ହୁଳା ଖସିଲା ପରି ଲାଗୁଥିବା ବେଳେ ବାରମ୍ବାର ଅଘୋଷିତ ବିଦ୍ୟୁତ କାଟ ହେଉଥିବାରୁ ଜିଲ୍ଲାବାସୀ ଫ୍ୟାନ,କୁଲର ଲଗାଇ ନପାରି ଗରମରେ ହନ୍ତସନ୍ତ ହେଉଛନ୍ତି ।
ଲଗାତର ଭାବେ ପ୍ରବଳ ଖରା ହେଉଥିବାରୁ କୁଅ,ପୋଖରୀ,ନଦୀନାଳ ଗୁଡିକ ଶୁଖିଗଲାଣି, ପାଣି ମୁନ୍ଦାଏ ପାଇଁ ଗାଇଗୋରୁ ଛେଳି,ବୁଲାକୁକୁର ଓ ପଶୁପକ୍ଷୀମାନେ ଡହଳ ବିକଳ ହେଉଛନ୍ତି । କେବଳ ପଶୁପକ୍ଷୀ ମାନେ ନୁହଁନ୍ତି ମାଲକାନଗିରି ସହର ସହିତ ଅନେକ ଗ୍ରାମରେ ପାନୀୟ ଜଳ ସଙ୍କଟ ମଧ୍ୟ ଦେଖା ଦେଇଛି।
