ସମ୍ବଲପୁର,୧୮/୧୧: ବିଲରୁ ହାତୀ ପଲଙ୍କୁ ଘଉଡାଉ ଥିବା ବେଳେ ଦଳିଦେଲେ । ଚାଲିଗଲା ବ୍ୟକ୍ତିଙ୍କ ଜୀବନ ।  ମୃତକ ହାତୀବାରି ଟେଙ୍ଗପଡାର ଗଣେଶ୍ବର ଭୋଇ ବୋଲି ଜଣା ପଡ଼ିଛି । ସମ୍ବଲପୁର ଜିଲ୍ଲା ହାତୀବାରି ଅଞ୍ଚଳରେ ଏଭଳି ଘଟଣା ଘଟିଛି ।

ସୂଚନା ମୁତାବକ, ରବିବାର ବିଳମ୍ୱିତ ରାତିରେ ଗାଁକୁ ଏକ ହାତୀ ପଲ ପଶି ଆସିଥିଲା । ଏହି ହାତୀ ପଲ ଗଣେଶ୍ବରଙ୍କ ବିଲ ଭିତରକୁ ପଶି ଫସଲ ନଷ୍ଟ କରିଥିଲେ । ଏହା ଦେଖି ସେ ବିଲରେ ରହି ହାତୀଙ୍କୁ ଘଉଡାଇବାକୁ ଚେଷ୍ଟା କରିଥିଲେ । ଏହି ସମୟରେ ସେ ହାତୀ ଆକ୍ରମଣର ଶିକାର ଦୋଇଥିଲେ । ବିଲରେ ହାତୀ ପଲ ତାଙ୍କୁ ଦଳି ଚକଟି ମାରି ଦେଇଥିଲେ । ସେ ସାରା ରାତି ସେହି ବିଲରେ ହିଁ ପଡ଼ି ରହିଥିଲେ । ତେବେ ରାତିରେ ଘରକୁ ଫେରି ନଥିବାରୁ ସୋମବାର ସକାଳୁ ବିଲକୁ ଖୋଜିବାକୁ ଯାଇଥିଲେ ପରିବାର ଲୋକେ । ସେଠାରେ ତାଙ୍କର ମୃତ ଦେହ ପଡିଥିବା ଦେଖିଥିଲେ । ଏହା ଦେଖି ସେ ତୁରନ୍ତ ବନ ବିଭାଗର କର୍ମଚାରୀଙ୍କୁ ଖବର ଦେଇଥିଲେ । ଖବର ପାଇ ଘଟଣାସ୍ଥଳରେ ବନ ବିଭାଗର କର୍ମଚାରୀ ପହଞ୍ଚି ବ୍ୟକ୍ତିଙ୍କ ମୃତଦେହ ଉଦ୍ଧାର କରିଛି ।