ଭୁବନେଶ୍ୱର,୦୧/୦୭: ମହାରାଷ୍ଟ୍ର ତଡ଼ଭା ଅନ୍ଧାରୀ ବ୍ୟାଘ୍ର ପ୍ରକଳ୍ପରୁ ଆସିଥିବା ୩ ବର୍ଷୀୟା ଚୁଲବୁଲି ଜିନ୍ନତ ଏବେ ଗର୍ଭବତୀ । ୩ ରାଜ୍ୟର ୭ ଜଙ୍ଗଲ ଘୂରିକି ଫେରିଥିବା ଏହି ମରାଠା ବାଘୁଣୀ ଶିମିଳିପାଳ ଅଭୟାରଣ୍ୟର ଜଣାଶୁଣା ମହାବଳ ‘ଟି-୧୨’ ସହ ସହବାସ ହୋଇଛି ।
ବନବିଭାଗ ସୂଚନା ମୁତାବକ, ସୁଦୂର ମହାରାଷ୍ଟ୍ରରୁ ଆସିଥିବା ଜିନ୍ନତକୁ ଜାନୁଆରୀ ପହିଲାରୁ ଯମୁନାଗଡ଼ସ୍ଥିତ ‘ସ୍ୱତନ୍ତ୍ର ଏନକ୍ଲୋଜର’ରେ ଛଡ଼ାଯାଇଥିଲା । ସ୍ୱତନ୍ତ୍ର ଡାକ୍ତରୀ ଦଳ ବାଘୁଣୀର ଗତିବିଧି ଓ ସ୍ୱାସ୍ଥ୍ୟ ଉପରେ ନିରନ୍ତର ନଜର ରଖୁଥିଲେ । ଦେଢ଼ ମାସେ ତଳେ ବାଘୁଣୀକୁ ଏନ୍କ୍ଲୋଜରରୁ ଜଙ୍ଗଲକୁ ଛଡ଼ାଯାଇଛି । ଏହାପରେ ବାଘୁଣୀଟି ଯମୁନାଗଡ଼ଠାରୁ ଗୁଡୁଗୁଡିଆ ଜଙ୍ଗଲରେ ଘୂରି ବୁଲୁଛି । ସୁବର୍ଣ୍ଣରେଖା ନଦୀ ପହଁରି ଝାଡ଼ଖଣ୍ଡ ମୁହାଁ ହୋଇନାହିଁ । କି ଅନ୍ୟ ରାଜ୍ୟ ସୀମା ଡେଇଁନାହିଁ । ଲାଗୁଛି, ଏହି ୨୫- ୩୦ ବର୍ଗକିମି ଇଲାକାକୁ ଜିନ୍ନତ ନିଜର ଟେରିଟୋରି ଭାବେ ବାଛି ନେଇଛି ।
‘ଟି-୧୨’ ହେଉଛି ମେଲାନିଷ୍ଟିକ୍ ପ୍ରଜାତିର ମହାବଳ । ବୟସ ପାଖାପାଖି ୧୧ ବର୍ଷ ହେବ । ଜଙ୍ଗଲର କିଛି ମାଈ ବାଘ ସହ ସହବାସ ହୋଇଛି । ମହାବଳଟିର ପିଲାପିଲି ସଂଖ୍ୟା ୮ ଟପିଯିବ । ଗତବର୍ଷ ଅକ୍ଟୋବରରେ ମହାରାଷ୍ଟ୍ରରୁ ଆସିଥିବା ଅନ୍ୟ ଏକ ବାଘୁଣୀ ଯମୁନା ପ୍ରେମରେ ପଡି଼ଥିଲା ଟି-୧୨ । ଯମୁନାକୁ ରଖାଯାଇଥିବା କବାଟଘାଇ ସେକ୍ସନର ଯମୁନାଗଡ଼ ଏନ୍କ୍ଲୋଜର ଚାରିପାଖେ ଢେର କିଛି ଦିନ ଘୁରି ବୁଲିଥିଲା ।
ସାଥୀ ସନ୍ଧାନରେ ଥିବା ‘ଟି-୧୨’ ଗଲାମାସରେ ଶିମିଳିପାଳର ଅଧା ଜଙ୍ଗଲ ପାର୍ ହୋଇ ଯମୁନାଗଡ଼ରେ ପହଞ୍ଚିଥିଲା । ସେଠାରେ ମରାଠା ବାଘୁଣୀ ଜିନ୍ନତ ସହ ତା’ର ଭେଟଘାଟ ହୋଇଥିଲା । ହୃଷ୍ଟପୁଷ୍ଟ ଚେହେରା ଭରା ଜିନ୍ନତର ଯୌବନ ଦେଖି ବାଉଳା ହୋଇଗଲା ଟି୧୨ । ଉଭୟେ ୨ ସପ୍ତାହେରୁ ଅଧିକ ସମୟ ଏକାଠି ଘୁରି ବୁଲିଥିଲେ । ଯମୁନାଗଡ଼ଠାରୁ ଗୁଡୁଗୁଡି଼ଆ ଭିତରେ ଖଞ୍ଜାଯାଇଥିବା ଟ୍ରାପ୍ କ୍ୟାମେରାରେ ଉଭୟଙ୍କ ଫୁଟେଜ୍ କଏଦ୍ ହୋଇଛି । ଉଭୟଙ୍କ ଭିତରେ ସହବାସ ପରେ ଏବେ ଜିନ୍ନତ ଗର୍ଭବତୀ ଥିବା ଜଣାପଡି଼ଛି । ତା’ ଉପରେ ସ୍ୱତନ୍ତ୍ର ନଜର ରଖିବା ପାଇଁ ଏକ ଡାକ୍ତରୀ ଦଳ ନିୟୋଜିତ ହୋଇଛନ୍ତି ।
ଅନ୍ୟପଟେ ଯମୁନା ଏବେ ବାଲେଶ୍ୱର ଜିଲ୍ଲା କୂଳଡି଼ହ ବନଖଣ୍ଡରେ ଘୁରି ବୁଲୁଛି । ବେଳେବେଳେ ଶିମିଳିପାଳ କୋର ଏରିଆକୁ ଯାଉଛି । ପୁଣି ଫେରିଯାଉଛି । ହେଲେ ଏଯାବତ୍ ବାଘୁଣୀର କାହା ସହ ସହବାସ ହୋଇନଥିବା ବନ ବିଭାଗ ସୂତ୍ରରୁ ପ୍ରକାଶ ପାଇଛି । ସୂଚନାଯୋଗ୍ୟ, ଜିନ୍ନତକୁ ଗତବର୍ଷ ନଭେମ୍ବର ୨୪ରେ ଶିମିଳିପାଳର ଚହଲା କୋର ଏରିଆରେ ଛଡ଼ା ଯାଇଥିଲା । ଡିସେମ୍ବର ୧୦ ତାରିଖରେ ବାଘୁଣୀଟି ହଠାତ୍ ଝାଡ଼ଖଣ୍ଡ ମୁହାଁ ହୋଇଥିଲା । ଝାଡ଼ଖଣ୍ଡର ଚାଇଁବାସା, ଚାକୁଳିଆ ରେଞ୍ଜ୍ର ରାଜବାସା ଦେଇ ପଶ୍ଚିମବଙ୍ଗରେ ପଶିଥିଲା । ୫୦ କିମି ପାର୍ ହୋଇ ପୁରୁଲିଆ ଜିଲ୍ଲାର ବାନ୍ଦ୍ୱାନ୍ ଜଙ୍ଗଲକୁ ଯାଇଥିଲେ । ପ୍ରାୟ ମାସେ ଧରି ଜିନତ୍ ମନଖୁସିରେ ୩ ରାଜ୍ୟର ୭ଟି ଜଙ୍ଗଲ ଘୁରି ବୁଲିବା ପରେ ବାଘୁଣୀକୁ ପଶ୍ଚିମବଙ୍ଗ ବାଙ୍କୁଡ଼ା ଜିଲ୍ଲା ରାଣୀବନ୍ଧ ଜଙ୍ଗଲରେ ଟ୍ରାଙ୍କୁଲାଇଜ କରାଯାଇଥିଲା ।
