୧୦ରୁ ୧୪ ବର୍ଷ ବୟସ ମଧ୍ୟରେ ପ୍ରାୟତଃ ପ୍ରତ୍ୟେକ ଝିଅଙ୍କର ପ୍ରଥମ କରି ଋତୁସ୍ରାବ ଆରମ୍ଭ ହୁଏ । ଯଦି ୯ ବର୍ଷ ଆଗରୁ ୠତୁସ୍ରାବ ଆରମ୍ଭ ହୁଏ କିମ୍ବା ୧୫ ବର୍ଷ ପର୍ଯ୍ୟନ୍ତ ଆରମ୍ଭ ହୁଏ ନାହିଁ, କିଛି ସମସ୍ୟା ଥିବା ସନ୍ଦେହ କରାଯାଏ । ଏ କ୍ଷେତ୍ରରେ ଡାକ୍ତରଙ୍କ ପରାମର୍ଶ ନେବା ଉଚିତ । ପ୍ରତି ମାସର ୨୪ରୁ ୨୮ ଦିନ ମଧ୍ୟରେ ଋତୁସ୍ରାବ ହେବା ସ୍ୱାଭାବିକ ପ୍ରକ୍ରିୟା । ଏହି ପ୍ରକ୍ରିୟା ୫ରୁ ୭ ଦିନ ଯାଏ ଚାଲିଥାଏ । ଯଦି ୨୧ ଦିନରୁ କମ୍ ବା ୩୮ ଦିନ ପରେ ମାସିକ ଋତୁସ୍ରାବ ହୁଏ, ଡାକ୍ତରଙ୍କ ପରାମର୍ଶ ଜରୁରି ହୋଇଥାଏ।
ଋତୁସ୍ରାବଜନିତ ଅସୁବିଧା
ଋତୁସ୍ରାବ ଆରମ୍ଭର ୨ କିମ୍ବା ୩ ବର୍ଷ ମଧ୍ୟରେ ଅନେକ କ୍ଷେତ୍ରରେ ଅନିୟମିତତା ଦେଖା ଦେବା ସାଧାରଣ କଥା । ଋତୁଚକ୍ରକୁ ନିୟନ୍ତ୍ରଣ କରୁଥିବା ଗ୍ରନ୍ଥିମାନେ ନିୟମିତ ହର୍ମୋନ୍ କ୍ଷରଣ ନ କରିବାରୁ ଏପରି ସମସ୍ୟା ଦେଖା ଦେଇପାରେ । ଯାହାକି ଦୁଇ ତିନି ବର୍ଷରେ ଆପେ ଆପେ ଠିକ ହୋଇଥାଏ । କେତେକ ଝିଅଙ୍କ କ୍ଷେତ୍ରରେ ଋତୁସ୍ରାବ ସମୟରେ ଖୁବ୍ ଜୋର୍ରେ ପେଟରେ ଯନ୍ତ୍ରଣା ହୁଏ । ଏହାର ଅନେକ କାରଣ ଥାଇପାରେ । ତେଣୁ ଯନ୍ତ୍ରଣା ହେଉଥିଲେ ଯଥାସମ୍ଭବ ଡାକ୍ତର ପରାମର୍ଶ କରାଇ ଚିକିତ୍ସା କରିବେ । ସେହିପରି କିଛି ଝିଅଙ୍କ କ୍ଷେତ୍ରରେ ଋତୁସ୍ରାବ ସମୟରେ ଅତ୍ୟଧିକ ରକ୍ତସ୍ରାବ ହେବା ପରି ସମସ୍ୟାମାନ ମଧ୍ୟ ଦେଖାଯାଇଥାଏ । କେମିତି ଜାଣିବେ ଅତ୍ୟଧିକ ଋତୁସ୍ରାବ ହେଉଛି?
ଲକ୍ଷଣ
-ଯଦି ଋତୁସ୍ରାବ ସାତରୁ ଅଧିକ ଦିନ ଯାଏ ଲାଗି ରହେ ।
-ଯଦି ଚାରି ଘଣ୍ଟାରୁ କମ୍ ସମୟ ବ୍ୟବଧାନରେ ପ୍ୟାଡ୍ ପରିବର୍ତ୍ତନ କରିବାକୁ ପଡୁଥାଏ ।
-ଦିନକୁ ୬ରୁ ଉର୍ଦ୍ଧ୍ୱ ପ୍ୟାଡ୍ ବ୍ୟବହାର କରିବାକୁ ପଡୁଥିଲେ ।
-ମାତ୍ରାଧିକ ରକ୍ତସ୍ରାବରୁ ରାତିରେ ଠିକ୍ ଭାବେ ନିଦ ହେଉ ନ ଥିଲେ ।
-ଋତୁସ୍ରାବ ସମୟରେ ଖଣ୍ଡ ଖଣ୍ଡ ଆକାରରେ ରକ୍ତସ୍ରାବ ହେଉଥିଲେ । ଯଦି ଏପରି ସମସ୍ୟା ଦେଖାଦେଉଥାଏ, ତୁରନ୍ତ ସ୍ତ୍ରୀ ରୋଗ ଓ ପ୍ରସୂତି ବିଶେଷଜ୍ଞ ଡାକ୍ତରଙ୍କ ପରାମର୍ଶ ନେବା ଦରକାର।
ଅନେକ କ୍ଷେତ୍ରରେ ଅତ୍ୟଧିକ ମୋଟା ହୋଇଥିବା ଝିଅମାନଙ୍କର ୪୦ କିମ୍ବା ୪୫ ଦିନରେ ଥରେ ଋତୁସ୍ରାବ ହେବା ଅଭିଯୋଗ ଆସିଥାଏ । ସେମାନଙ୍କ ସମସ୍ୟା ଜାଣିବା ପାଇଁ ଅଲ୍ଟ୍ରାସାଉଣ୍ଡ କରିବାକୁ ପଡ଼ିଥାଏ । ଯଦି ସମସ୍ୟା ରହିଥାଏ, ଡିମ୍ବକୋଷରେ ପାଣି ଫୋଟକା ବା ଚକ୍ଟକ୍ଷଚ୍ଚମଚ୍ଚဧସମ ଙଙ୍ଖବକ୍ସଚ୍ଚ ଥିବା ଦେଖାଯାଇଥାଏ । ଏଭଳି ସମସ୍ୟା ଥିଲେ ଠିକ୍ ସମୟରେ ଋତୁସ୍ରାବ ହୋଇ ନଥାଏ । ତେଣୁ ଏହାର ଚିକିତ୍ସା କରାଯିବା ଆବଶ୍ୟକ ।
ପରାମର୍ଶ
ଏହି ସମସ୍ୟା ଥିବା ଝିଅମାନେ ନିୟମିତ ଯୋଗ, ବ୍ୟାୟାମ ଏବଂ ଖାଦ୍ୟଶୈଳୀରେ ପରିବର୍ତ୍ତନ ଦ୍ୱାରା ଓଜନକୁ ନିୟନ୍ତ୍ରିତ କରିପାରିବେ । ଏମାନେ ମାତ୍ରାଧିକ ଚର୍ବିଯୁକ୍ତ ଖାଦ୍ୟ ଯେମିତି କି ଛଣା ଭଜା, ଚଟ୍ପଟି ଖାଦ୍ୟ ଏବଂ ମିଠା, ଆଇସ୍କ୍ରିମ୍ଠାରୁ ଦୂରେଇ ରହିବା ଆବଶ୍ୟକ । ପ୍ରଫେସର ଡା. ବେଣୁଧର ପାଣ୍ଡେ
ସ୍ତ୍ରୀ ରୋଗ ଓ ପ୍ରସୂତି ବିଭାଗ, ଭିମ୍ସାର୍, ବୁର୍ଲା
