ନୂଆଦିଲ୍ଲୀ,୧୭/୧୦: ବିମାନରେ ବୋମା ଥିବାର ମିଛ ଖବର ପ୍ରଚାର ପାଇଁ ଛତିଶଗଡ଼ର ଜଣେ ନାବାଳକ ଅଟକ। ମୁମ୍ଵାଇ ପୋଲିସ ତାଙ୍କୁ ଅଟକ ରଖିଛି। ତେବେ ମାତ୍ର ୪୮ ଘଣ୍ଟା ମଧ୍ୟରେ ୧୨ ବିମାନକୁ ବୋମା ଧମକ ଦେଇ ପୂରା ଦେଶକୁ ଦୋହଲାଇ ଦେବା ପରେ ପୁଲିସ୍ ଅଭିଯୁକ୍ତ ନାବାଳକକୁ ଧରିଛି।
ସୂଚନା ମୁତାବକ, ରାଜନନ୍ଦଗାଓଁର ଏହି ୧୭ ବର୍ଷ ନାବାଳକ ନିଜ ସାଙ୍ଗକୁ ଫସାଇବା ପାଇଁ ଏପରି ଷଡ଼ଯନ୍ତ୍ର କରିଥିଲା। ଏଥିପାଇଁ ସେ ବିଭିନ୍ନ ବିମାନ ସେବା ପ୍ରଦାନକାରୀ ସଂସ୍ଥାକୁ ଧମକ ଦେବାରେ ଲାଗିଥିଲା ବୋଲି ପୋଲିସ୍ ଜାଣିବାକୁ ପାଇଛି। ଘଟଣା ସମ୍ପର୍କରେ ଅଧିକ ତଥ୍ୟ ପାଇଁ ପୁଲିସ୍ ନାବାଳକର ବାପାଙ୍କୁ ମଧ୍ୟ ଘନଘନ ଜେରା କରୁଛି। ବିମାନଗୁଡ଼ିକ ବୋମାରେ ଉଡ଼ାଇ ଦେବାକୁ ଧମକ ଦେଇଥିବା ନାବଳକ ଜଣକ ସ୍କୁଲ ଡ୍ରପ ଆଉଟ। ମଙ୍ଗଳବାର ପୁଲିସ ତା’ ବାପାଙ୍କୁ ସମନ କରିଥିଲା। ଆଉ ଗତକାଲି ସେ ମୁମ୍ବାଇ ପୁଲିସ୍ ନିକଟରେ ହାଜର ହୋଇଛନ୍ତି। ନାବାଳକକୁ ପୁଲିସ୍ ହେପାଜତକୁ ନେବା ପରେ ସୁଧାର ଗୃହକୁ ପଠାଇ ଦେଇଛି। ନାବାଳକ ଜଣକ ଏକ୍ସରେ ନିଜ ସାଙ୍ଗ ନାଁରେ ଗୋଟିଏ ଆକାଉଣ୍ଟ ଖୋଲିଥିଲା। ଏହାପରେ ବୋମା ଧମକ ଏହି ଆକାଉଣ୍ଟରେ ପୋଷ୍ଟ କରିଥିଲା। ସାଙ୍ଗ ସହ ବିବାଦ ସୃଷ୍ଟି ହୋଇଥିବାରୁ ତା’କୁ ଫସାଇବା ପାଇଁ ସେ ଏପରି କରିଥିଲା। ଏବେ ପୁଲିସ୍ ଏହାର ଅଧିକ ତଦନ୍ତ କରୁଛି।
ତେବେ ବାରମ୍ବାର ବୋମା ଧମକ ମିଳିବା ପରେ ପୂରା ଦେଶରେ ହଇଚଇ ସୃଷ୍ଟି ହୋଇଛି। ଧମକ ଘଟଣାରେ ଦିଲ୍ଲୀ ପୁଲିସ ମଧ୍ୟ ୬ଟି ମାମଲା ରୁଜୁ କରିଥିଲା। ଗତକାଲି ପୁଣି ୨ଟି ବିମାନକୁ ବୋମା ଥିବା କଲ୍ ମିଳିଥିଲା। ମୁମ୍ବାଇ-ଦିଲ୍ଲୀ ଇଣ୍ଡିଗୋ ଓ ଦିଲ୍ଲୀ-ବେଙ୍ଗାଲୁରୁ ଆକାଶ ଏୟାର୍ ପ୍ଲେନ୍ କୁ ଧମକ ମିଳିଥିଲା। ବୋମା ଥିବା ସୂଚନା ପରେ ଇଣ୍ଡିଗୋ ବିମାନ ଅହମଦାବାଦ ଓ ଆକାଶ ବିମାନ ଦିଲ୍ଲୀ ଫେରିଥିଲା।ଗତ ୪୮ ଘଣ୍ଟା ମଧ୍ୟରେ ମୋଟ ୧୨ଟି ବିମାନକୁ ଏମିତି ଧମକପୂର୍ଣ୍ଣ କଲ ଆସିଛି। ଭାରତୀୟ ବିମାନଗୁଡିକୁ ଲଗାତର ବୋମା ଧମକର ଗୁଜବ ମିଳିବା ପରେ ସରକାର ଗୁରୁତର ସହ ନେଇଛନ୍ତି । ବୋମା ଧମକ ନେଇ ଫୋନ କରିଥିବା ବ୍ୟକ୍ତି ଧରାପଡ଼ିଲେ ସେମାନଙ୍କୁ ନୋ ଫ୍ଲାଏ ତାଲିକାଭୁକ୍ତ କରାଯିବ। ତେବେ ସେମାନଙ୍କ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ ନିଆଯିବ।
