ସାମ୍ବାଦିକଙ୍କୁ ବିଧାୟକ ପୁଅଙ୍କ ମାଡ଼ ମାରିଥିବା ଅଭିଯୋଗ: ନିଶାସକ୍ତ ଅବସ୍ଥାରେ ଖେଳାଇଥିଲେ ଆତଙ୍କ, ସାଙ୍ଗରେ ଥିଲେ ଯୁବତୀ..
ଭୁବନେଶ୍ୱର,୨୫/୦୫: ଲକ୍ଷ୍ମୀସାଗର ଥାନା ଅଞ୍ଚଳରେ ଘଟିଛି ସାଂଘାତିକ ଘଟଣା । ଅଧ ରାତିରେ ଜଣେ ବିଧାୟକଙ୍କ ପୁଅ ଓ ଜଣେ ଯୁବତୀ ନିଶାସକ୍ତ ଅବସ୍ଥାରେ ଆତଙ୍କ ଖେଳାଇଛନ୍ତି । ଅଫିସ୍ ଫେରୁଥିବା ଜଣେ ସାମ୍ବାଦିକଙ୍କୁ ରାସ୍ତାରେ ସାଇଡ୍ ମାରିବା ସହ ମାରପିଟ କରିଛନ୍ତି । ଏନେଇ ସାମ୍ବାଦିକ ଜଣଙ୍କ ଥାନାରେ ଏତଲା ଦେଲା ପରେ ପୁଲିସ୍ (୨୧୫/୨୩) ମାମଲା ରୁଜୁ କରି ଘଟଣାର ତଦନ୍ତ ଆରମ୍ଭ କରିଛି ।
ସୂଚନା ମୁତାବକ, ଗତକାଲି ରାତିରେ ସାମ୍ବାଦିକ ଜଣଙ୍କ ଅଫିସରୁ କାର୍ରେ ଘରକୁ ଫେରୁଥିଲେ । ଲକ୍ଷ୍ମୀସାଗର ଛକ ନିକଟରେ ଜଣେ ବିଧାୟକଙ୍କ ପୁଅ ତାଙ୍କ କାର୍କୁ ସାଇଡ୍ ମାରିଥିଲା । ସାମ୍ବାଦିକ ଜଣଙ୍କ ପ୍ରଥମେ କିଛି କହିନଥିଲେ । ବିଧାୟକ ପୁଅ ପୁଣି ଥରେ ସାଇଡ ମାରିଥିଲେ । ଏଥର ସାମ୍ବାଦିକ ଜଣଙ୍କ ପ୍ରତିବାଦ କରିଥିଲେ । ଏତିକିରେ ଗାଡ଼ିକୁ ରାସ୍ତା ମଝିରେ ରଖି ବିଧାୟକଙ୍କ ପୁଅ ଓ ଉକ୍ତ ଯୁବତୀ କାର୍ରୁ ଓହ୍ଲାଇ ଆସି ସାମ୍ବାଦିକଙ୍କୁ ମାଡ ମାରିଥିଲେ । ସାମ୍ବାଦିକଙ୍କ ବେକରୁ ସୁନା ଚେନ୍ ଛିଡାଇ ନେଇଥିଲେ ବୋଲି ସାମ୍ବାଦିକ ଜଣଙ୍କ ଥାନାରେ ଏତଲା ଦେଇଛନ୍ତି ।
