ସିମୁଳିଆ, ୦୧/୦୭: ବାଲେଶ୍ବର ଜିଲ୍ଲା ସିମୁଳିଆ ଥାନା ଅଞ୍ଚଳରେ ଲୁଟେରାଙ୍କ ଉତ୍ପାତ । ବଡ଼ ଡକାୟତି ଗ୍ୟାଙ୍ଗ ସିମୁଳିଆ ଓ ଏହାର ଆଖପାଖ ଅଞ୍ଚଳରେ ଲୁଟପାତ୍ କରୁଥିବା ଅଭିଯୋଗ । ଏହି ଗ୍ରୁପ ମୁହଁରେ କପଡ଼ା ଢଙ୍କାଇ ଚୋରି, ଛିନ୍ତାଇ ସହ ଖୋଲାଖୋଲି ଭାବେ ମଦ ଓ ଗଞ୍ଜେଇ କାରବାର ଚଳାଇଛନ୍ତି । ସେହିପରି ମନ୍ଦିର ଚୋରି ଘଟଣାରେ ମଧ୍ୟ ସାମିଲ୍ ରହିଥିବା ଜଣାପଡ଼ିଛି । ସିମୁଳିଆ ପୁଲିସ୍ ଲୁଟେରା ମାନଙ୍କୁ ଧରିବାରେ ବିଫଳ ହୋଇଥିବା ଅଭିଯୋଗ କରିଛନ୍ତି ସ୍ଥାନୀୟ ଲୋକେ ।
ବିଳମ୍ବିତ ରାତିରେ ଜାତୀୟ ରାଜପଥର ନିଛାଟିଆ ସ୍ଥାନ ଏବଂ ଓଭର ବ୍ରିଜ୍ ବାଇପାସ ନିକଟରେ ଲୁଚି ରହି ବ୍ୟବସାୟୀ ମାନଙ୍କୁ ଟାର୍ଗେଟ କରୁଛନ୍ତି ଲୁଟେରା ଗୋଷ୍ଠୀ । ଗତକାଲି ଅର୍ଥାତ୍ ସୋମବାର ରାତି ପ୍ରାୟ ସାଢ଼େ ୧୦ଟାରେ ଥାନା ଠାରୁ ମାତ୍ର ୨କିମି ଦୂରରେ ଭଗିଆ ଓଭର ବ୍ରିଜ୍ ବାଇପାସ ନିକଟରେ ଲୁଟେରା ମାନେ ସଙ୍ଘବଧ୍ୟ ଭାବେ ଜଣେ ଯୁବକଙ୍କୁ ଆକ୍ରମଣ କରିବା ସହିତ ତାଙ୍କ ଠାରୁ ସୁନା ଚେନ୍ ଏବଂ ୨୦ ହଜାର ଟଙ୍କା ଛଡାଇ ନେଇଯାଇଥିଲେ । ଲୁଟ୍ର ଶିକାର ହୋଇଥିବା ମଇତାପୁର ପଞ୍ଚାୟତ ରାମବିନ୍ଧା ଗାଁର ବ୍ୟବସାୟୀ ରମେଶ ପୁହାଣ ଲୁଟେରାଙ୍କ ପାଖରୁ କୌଶଳ କ୍ରମେ ଖସିଆସି ଏନେଇ ଗାଁ ଲୋକଙ୍କୁ ଜଣାଇଥିଲେ । ପରେ ଗ୍ରାମବାସୀ ଘଟଣାସ୍ଥଳରେ ପହଞ୍ଚିଥିଲେ । ହେଲେ ସେଠାରେ ଲୁଟେରା ମାନେ ଯୁବକଙ୍କ ଗାଡ଼ି ଛାଡ଼ି ପଳାଇଥିଲେ । ପରେ ଗାଁ ଲୋକ ଥାନାକୁ ଖବର ଦେଇଥିଲେ, ହେଲେ ସିମୁଳିଆ ପୁଲିସ ଏଯାଏଁ ଲୁଟେରାଙ୍କ ଟେର୍ ପାଉନାହିଁ...
