ନୂଆଦିଲ୍ଲୀ: ନିକଟରେ ନେପାଳରେ ହୋଇଥିବା ଜେନ୍-ଜେଡ୍ ଆନ୍ଦୋଳନ ପରେ, ଏବେ ମରକ୍କୋରେ ସରକାରଙ୍କ ବିରୁଦ୍ଧରେ ବହୁ ସଂଖ୍ୟକ ଲୋକ ରାସ୍ତାକୁ ଓହ୍ଲାଇଛନ୍ତି। ପ୍ରତିବାଦକାରୀଙ୍କୁ ଶାନ୍ତ କରିବା ପାଇଁ ସରକାର ନିୟମିତ ଉଦ୍ୟମ ଚଳାଇଛନ୍ତି । ଗୁରୁବାର ଦିନ, ପ୍ରତିବାଦକାରୀ ମାନେ ବହୁ ସଂଖ୍ୟାରେ ରାସ୍ତାକୁ ଓହ୍ଲାଇ ସରକାରଙ୍କ ବିରୁଦ୍ଧରେ ସ୍ଲୋଗାନ ଦେଇଥିଲେ। ସେମାନେ ବ୍ୟାରିକେଡ୍ ଭାଙ୍ଗି ଆଗକୁ ବଢ଼ି ଚାଲିଥିଲେ। ଏହା ପରେ ପୋଲିସ ସହିତ ସଂଘର୍ଷ ହୋଇଥିଲା । ଯାହା ଫଳରେ ଅତି କମରେ ଦୁଇ ଜଣଙ୍କ ମୃତ୍ୟୁ ହୋଇଥିଲା। ଏହା ପ୍ରତିବାଦକାରୀଙ୍କ କ୍ରୋଧକୁ ଆହୁରି ବଢ଼ାଇ ଦେଇଛି।
ପ୍ରାୟ ପାଞ୍ଚ ଦିନ ଧରି ଏଠାରେ ପ୍ରତିବାଦ ଜାରି ରହିଛି। ଦିନରାତି ରାସ୍ତାରେ ବହୁ ସଂଖ୍ୟାରେ ଲୋକ ଜମା ହୋଇଛନ୍ତି। ଅନେକ ସ୍ଥାନରେ ପ୍ରତିବାଦକାରୀ ମାନେ ଯାନବାହାନ ଜାଳି ଦେଇଛନ୍ତି। ପରିସ୍ଥିତି ନିୟନ୍ତ୍ରଣ କରିବା ପାଇଁ ପୋଲିସକୁ ଦକ୍ଷିଣ ସହରରେ ଗୁଳି ଚଳାଇବାକୁ ବାଧ୍ୟ ହେବାକୁ ପଡିଛି, ଯେଉଁଥିରେ ଦୁଇ ଜଣଙ୍କର ମୃତ୍ୟୁ ହୋଇଛି । ମରକ୍କୋର ରାଜଧାନୀ ରାବାତରୁ ପ୍ରାୟ ୫ ଶହ କିଲୋମିଟର ଦକ୍ଷିଣରେ ଅବସ୍ଥିତ ଲେକଲିଆରେ ଏହି ମୃତ୍ୟୁ ଘଟିଛି।
ମରକ୍କୋର ରାଜ୍ୟ ନ୍ୟୁଜ୍ ଏଜେନ୍ସି ସ୍ଥାନୀୟ ଅଧିକାରୀଙ୍କ ସୂଚନାକୁ ଉଦ୍ଧୃତ କରି କହିଛି ଯେ, ପୋଲିସ ଆତ୍ମରକ୍ଷା ପାଇଁ ଦୁଇଜଣ ପ୍ରତିବାଦକାରୀଙ୍କୁ ଗୁଳି କରିଛି। ସଂସ୍ଥା କହିଛି ଯେ ସେହି ଲୋକମାନେ ପୋଲିସ ଅସ୍ତ୍ରଶସ୍ତ୍ର ଛିନତାଇ କରିବାକୁ ଚେଷ୍ଟା କରୁଥିଲେ।
