ସାଲେପୁର, ୦୪/୧୨: ମଙ୍ଗଳବାର ସଂଧ୍ୟାରେ ଆତ୍ମହତ୍ୟା ଉଦ୍ୟମ । ଚିକିତ୍ସାଧୀନ ଅବସ୍ଥାରେ ଆଖି ବୁଜିଲେ ମାଆ ଓ ଝିଅ । ପାରିବାରିକ କଳହରୁ ସାଲେପୁରରେ ଘଟିଥିବା ଏ ଘଟଣା ସମସ୍ତଙ୍କୁ ସ୍ତବ୍ଧ କରିଦେଇଛି । ମୃତକ ଶୁଭରଞ୍ଜନ ଲେଙ୍କାଙ୍କ ପତ୍ନୀ ସୁଚିସ୍ମିତା ମହାନ୍ତି ବୋଲି ଜଣାପଡ଼ିଛି । ଏହି ଘଟଣାରେ ମହିଳାଙ୍କ ସ୍ୱାମୀଙ୍କୁ ଅଟକ ରଖିଛି ପୋଲିସ । କଟକ ଜିଲ୍ଲା ସାଲେପୁର ଅଞ୍ଚଳରେ ଏଭଳି ଘଟଣା ଘଟିଛି ।
ସୂଚନା ମୁତାବକ,୨ ଦିନ ତଳେ ପରିବାର ଲୋକଙ୍କ ସହ ସୁଚିସ୍ମିତାଙ୍କର ଝଗଡା ହୋଇଥିଲା । ଏଥିରେ ସେ ମାନସିକ ଭାରସାମ୍ୟ ହରାଇ ବସିଥିଲେ । ଆଉ ଝିଅ ସହ ନିଜେ ଜୀବନ ହାରିବାର ନିଷ୍ପତ୍ତି ନେଇଥିଲେ । ମଙ୍ଗଳବାର ସଂଧ୍ୟା ସମୟର ଶୁଭରଞ୍ଜନ ଲେଙ୍କାଙ୍କ ପତ୍ନୀ ସୁଚିସ୍ମିତା ମହାନ୍ତି ଦେହରେ କିରୋସିନି ଡାଳି ଆତ୍ମହତ୍ୟା ଉଦ୍ୟମ କରିଥିଲେ । ସେ ଏକା ନଥିଲେ ସାଙ୍ଗରେ ଥିଲା ୪ ମାସର ନିଷ୍ପାପ ଶିଶୁ । ଭିତର ପଟୁ କବାଟ ବନ୍ଦ କରି ସୁଚିସ୍ମିତା ଏପରି କାଣ୍ଡ କରିଥିଲେ । ତାଙ୍କ ଚିତ୍କାର ଶୁଣି ପରିବାର ଓ ଗାଁ ଲୋକ ଉଭୟଙ୍କୁ ଜଳୁଥିବା ଅବସ୍ଥାରେ ଉଦ୍ଧାର କରି ସ୍ଥାନୀୟ ମେଡିକାଲରେ ଭର୍ତ୍ତି କରିଥିଲେ । ତେବେ ଶିଶୁର ଅବସ୍ଥା ଗୁରୁତର ହେବାରୁ ତାଙ୍କୁ କଟକ ବଡ ମେଡିକାଲକୁ ସ୍ଥାନାନ୍ତର କରାଯାଇଥିଲା । ସେଠାରେ ଶିଶୁର ମୃତ୍ୟୁ ହୋଇଥିବାବେଳେ ବୁଧବାର ଘରୋଇ ମେଡିକାଲରେ ମାଆ ମଧ୍ୟ ଆଖି ବୁଜି ଦେଇଛି । ଏଭଳି ଘଟଣା ପରେ ସ୍ବାମୀ ଶୁଭରଞ୍ଜନ ଲେଙ୍କାକୁ ଅଟକ ରଖି ପଚରାଉଚରା କରୁଛି ଜଗତପୁର ପୋଲିସ ।
