ପୁରୀ,୧୧/୦୫(ରାଜଶ୍ରୀ ସାହୁ): ସନ୍ତାନକୁ ଦଶ ମାସ ଦଶ ଦିନ ଗର୍ଭରେ ଧରି କିଏ ମା’ର ପରିଚୟ ପାଇଥାଏ ତ ପୁଣି କିଏ ଯଶୋଦା ଭଳି ବାତ୍ସଲ୍ୟ ମମତା ଅଜାଡ଼ି ଦେଇ ମାତୃତ୍ୱର ପରିଭାଷା ବଦଳାଇଦିଏ । ଜନ୍ମ ନ କରି ବି ଜନନୀ ସାଜେ । ଗର୍ଭଧାରଣ ନ କରି ମଧ୍ୟ ମା’ ବୋଲି ଗର୍ବ ଅନୁଭବ କରେ । ସେଭଳି ପ୍ରେରଣାଦାୟୀ ମା’ ହେଉଛନ୍ତି ପୁରୀ ସହରର କସ୍ତୁରିକା ମିଶ୍ର ଓ ମିନତି ମିଶ୍ର । ଆଜି ସାରା ବିଶ୍ୱ ମାତୃତ୍ୱ ଦିବସ ପାଳନ କରୁଛି । ବିନା ବିବାହରେ, ବିନା ସ୍ୱାମୀରେ, ଗର୍ଭବତୀ ନ ହୋଇ, ସମାଜର କଟୁ କଥା ସହି ବଣମଲ୍ଲୀକୁ ତୋଳି ନେଇ ସାରା ଦେଶରେ ମହକାଇ ପାରିଥିବା ମା’ ହେଉଛନ୍ତି ଏହି ଦୁଇ ମହିୟସୀ ।
ପିଲାଦିନର ଏହି ଦୁଇ ବାନ୍ଧବୀ ଏକ ଶିଶୁକନ୍ୟାକୁ ପୋଷ୍ୟ ରୂପେ ଗ୍ରହଣ କରିଛନ୍ତି । କନ୍ଧମାଳର ଏକ ଆଦିବାସୀ ପରିବାରର ଝିଅକୁ ୨୦ ବର୍ଷ ତଳେ ସେମାନେ ପୋଷ୍ୟ କରିଥିଲେ । ସ୍ନେହରେ ତା’ ନାଁ ଦେଇଥିଲେ ମିହିକା ମିଶ୍ର । ବଣମଲ୍ଲୀ ଭାବେ ଆସିଥିବା ମିହିକା ଏବେ ସାରା ଦେଶକୁ ମହକାଉଛି । ଜଣେ ଖ୍ୟାତନାମା ମଡେଲ ଭାବେ ପ୍ରତିଷ୍ଠିତ ହୋଇପାରିଛି । ଖାଲିଲ ମିହିକା ନୁହେଁ, କସ୍ତୁରିକା ଓ ମିନତି ନିଜର ଏକ ଏନ୍ଜିଓ ସଂସ୍ଥା ଯୋଗେ ଅବହେଳିତ ଶିଶୁମାନଙ୍କୁ ବିଭିନ୍ନ ପ୍ରକାର ସୁବିଧା ସୁଯୋଗ ପ୍ରଦାନ କରୁଛନ୍ତି ।
ପୁରୀ ଓ ଭୁବନେଶ୍ୱରରେ ସ୍କୁଲ ଶିକ୍ଷା ସାରିବା ପରେ କସ୍ତୁରିକା ଆଇଏଏସ୍ ହେବାର ସ୍ୱପ୍ନ ଦେଖି ନୂଆଦିଲ୍ଲୀ ଚାଲି ଯାଇଥିଲେ । ସାକ୍ଷାତକାର ପର୍ଯ୍ୟାୟରେ ପହଞ୍ଚିଥିଲେ ମଧ୍ୟ ସେ ଆଇଏଏସ୍ ହେବାର ସ୍ୱପ୍ନ ପୂରଣ କରିପାରିନଥିଲେ । ତେବେ ନୂଆଦିଲ୍ଲୀ ସ୍ଥିତି ଆମେରିକା ଦୂତାବାସରେ ଉଚ୍ଚ ବେତନରେ ସେ ଚାକିରି କରିଥିଲେ । ଅନ୍ୟ ଝିଅଙ୍କ ଭଳି ବିବାହ କରି ସଂସାର କରିବାର ସ୍ୱପ୍ନ ଦେଖିଥିଲେ। କିନ୍ତୁ ମନପସନ୍ଦର ଜୀବନସାଥୀ ନ ମିଳିବାରୁ ସେ ସାରା ଜୀବନ ଏକା ରହି ଗୋଟିଏ ଝିଅକୁ ପୋଷ୍ୟ କରିବାକୁ ନିଷ୍ପତ୍ତି ନେଇଥିଲେ ।
କସ୍ତୁରିକାଙ୍କ ଏହି ନିଷ୍ପତ୍ତିକୁ ତାଙ୍କ ବାପା ତଥା ପୁରୀ ଜିଲ୍ଲାର ପୂର୍ବତନ ସିଡିଏମ୍ଓ ଡା. ଜଗମୋହନ ମିଶ୍ର ସହଜରେ ଗ୍ରହଣ କରି ନେଇଥିଲେ। ହେଲେ ତାଙ୍କ ମା’ ତଥା ଓଡିଶାର ଖ୍ୟାତନାମା କଣ୍ଠଶିଳ୍ପୀ ଭୁବନେଶ୍ୱରୀ ମିଶ୍ର ଆପତ୍ତି ଉଠାଇଥିଲେ । ପରବର୍ତ୍ତୀ ସମୟରେ ଭୁବନେଶ୍ୱରୀ ମଧ୍ୟ ନାତୁଣୀ ମିହିକା ସ୍ନେହରେ ବାନ୍ଧି ହୋଇଯାଇଥିଲେ । ଭୁବନେଶ୍ୱରୀଙ୍କ ଶେଷ ଜୀବନ ମିହିକାଙ୍କ ସହ ବିତିଛି । କସ୍ତୁରିକାଙ୍କ କହିବା କଥା, ତାଙ୍କୁ ୨୭ ବର୍ଷ ବୟସ ହୋଇଥିବା ବେଳେ ସେ ସରକାରୀ ନିୟମ ଅନୁଯାୟୀ ପୋଷ୍ୟ କନ୍ୟା ପାଇଁ ଆବେଦନ କରିଥିଲେ । ୫ ବର୍ଷ ଅପେକ୍ଷା ପରେ ସେ କନ୍ଧମାଳର ଏକ ଆଶ୍ରମରୁ ମହିକାକୁ ପାଇଥିଲେ । ସେତେବେଳେ ତାକୁ ୧ ବର୍ଷ ବୟସ ହୋଇଥିଲା ।
ଏହି ରାସ୍ତାରେ ତାଙ୍କ ସହଚର ସାଜିଥିଲେ ତାଙ୍କ ବାଲ୍ୟ ବନ୍ଧୁ ମିନତି । କସ୍ତୁରିକାଙ୍କ ଭଳି ମୀନତି ମଧ୍ୟ ଶିକ୍ଷୟିତ୍ରୀ ଭାବେ ଚାକିରି କରି ଅବିବାହିତ ଜୀବନ ବିତାଉଥିଲେ । ଦୁଇ ବାନ୍ଧବୀ ଦିଲ୍ଲୀର ଏକ ଫ୍ଲାଟରେ ଏକାଠି ରହି ମିହିକାଙ୍କୁ ବଡ କରିଥିଲେ । ଦୁଇ ମା’ଙ୍କ ସ୍ନେହଶ୍ରଦ୍ଧା ଭିତରେ ମିହିକା ବଡ଼ ହୋଇ ଏବେ ଫ୍ୟାସନ ଦୁନିଆରେ ପରିଚିତ ଚେହେରା । ‘ମିସ୍ ଟିନ୍ ଇଣ୍ଡିଆ’ ସମେତ ସେ ଏକାଧିକ ପୁରସ୍କାର ହାସଲ କରିଛନ୍ତି ।
ମିହିକା କହିଛନ୍ତି, ମୋତେ ସମସ୍ତେ କୁହନ୍ତି ମୋର ବାପା ନାହାନ୍ତି । ହେଲେ ମୁଁ ସେମାନଙ୍କୁ ଗର୍ବରେ କହେ ମୋତେ ୨-୨ ଜଣ ମା’ ମିଳିଛନ୍ତି । ଉଭୟ ମୋତେ କେବେ କେଉଁଥିରେ ଅଭାବ ରଖିନାହାନ୍ତି । ବଡ଼ ହୋଇ ମୁଁ ମଧ୍ୟ ଆଶ୍ରମରେ ରହୁଥିବା ଅବହେଳିତ ପିଲାଙ୍କ ପାଇଁ କିଛି କରି ଦେଖାଇବାର ସ୍ୱପ୍ନ ରଖିଛି । ମୁଁ ଯେମିତି ନୂଆ ଜୀବନ ପାଇଛି ସେଭଳି ଅନେକ ନୂଆ ଜୀବନ ଦେବାକୁ ଲକ୍ଷ୍ୟ ରଖିଛି ।
ମୀନତି କହିଛନ୍ତି, ଆମେ ଦୁଇ ବାନ୍ଧବୀ ଯେତେବେଳେ ଏକାଠି ରହିଲୁ । ସମାଜ ଆମକୁ ଭିନ୍ନ ଦୃଷ୍ଟିରେ ଦେଖିଲା । ଆମ ପଛରେ ଲୋକେ ଅନେକ କଥା କୁହନ୍ତି । ହେଲେ ସେସବୁକୁ ଖାତିର ନ କରି ଆମେ ହସଖୁସିରେ ଆଗେଇ ଚାଲିଛୁ । ଅନ୍ୟ ପରିବାର ଭଳି ଆମ ପରିବାରରେ ବି ଝଗଡ଼ା ହୁଏ । ମୁଁ ମିହିକାକୁ ତାଗିଦ୍ କଲାବେଳେ କସ୍ତୁରିକା ତାକୁ ଅଧିକ ସ୍ୱାଧୀନ କରିଦିଏ । ସେଥିପାଇଁ ଆମର ମତାନ୍ତର ହୁଏ । ହେଲେ କେବେ ବି ମନାନ୍ତର ହୁଏନାହିଁ ।
