ନୂଆଦିଲ୍ଲୀ, ୧୯। ୧୦: ଭାରତରେ ଏକାଧିକ ସିମ କାର୍ଡ ରଖିବାକୁ ଅନୁମତି ଅଛି କି ନାହିଁ ସେ ବିଷୟରେ କେଉଁ କେଉଁ ନିୟମ ରହିଛି ଜାଣିଛନ୍ତି କି ? ଯଦି ଏ ନିୟମ ବିଷୟରେ ଜାଣିନାହାନ୍ତି, ତେବେ ଏଥିପାଇଁ ଆପଣଙ୍କୁ ଜୋରିମାନା ଦେବାକୁ ପଡ଼ିପାରେ । ସେ ପୁଣି ୫-୧୦ ହଜାର ନୁହଁ ପୁରା ୨ ଲକ୍ଷ ଟଙ୍କାର ଜରିମାନା ।ଅନେକ ଏଭଳି ଲୋକ ଅଛନ୍ତି, ଯେଉଁମାନଙ୍କ ପାଖରେ ଏକାଧିକ ସିମ ରହିଛି । ଏପରିକି ଏକାଧିକ ଫୋନ ବି ରଖିଛନ୍ତି ଯେଉଁଥିରେ ଏକାଧିକ ସିମ ବ୍ୟବହାର କରୁଛନ୍ତି । କିନ୍ତୁ, ଭାରତରେ ଏନେଇ କ’ଣ କ’ଣ ନିୟମ ରହିଛି ଆସନ୍ତୁ ଜାଣିବା । ଯଦି ନିୟମ ଜାଣିନଥିବେ ତେବେ ଆଗକୁ ବୋଧହୁଏ ଏଥିପାଇଁ ଆପଣଙ୍କୁ ତଣ୍ଡ ଗଣିବାକୁ ପଡ଼ିପାରେ । ଯଦି ଏଥିରୁ ବର୍ତ୍ତିବାକୁ ଚାହାନ୍ତି । ତେବେ ସିମ କାର୍ଡ ସୀମା କେତେ ଜାଣିନିଅନ୍ତୁ । ଟେଲିକମ ଆଇନ ଅନୁଯାୟୀ, ଜଣେ ନିଜ ପାଖରେ କେବଳ ୯ଟି ସିମ କାର୍ଡ ରଖିପାରିବେ । ଆପଣଙ୍କ ନାଁରେ ୯ଟିରୁ ଅଧିକ ସଂଖ୍ୟାର ସିମ କାର୍ଡ ଥିଲେ ଆପଣ ଆଇନଗତ କାର୍ଯ୍ୟାନୁଷ୍ଠାନର ସମ୍ମୁଖୀନ ହୋଇପାରନ୍ତି ।
ତେବେ କହିରଖୁଛୁ ଯେ, ୯ଟି ସିମ କାର୍ଡ ନିୟମ ଭାରତର ସବୁଠାରେ ପ୍ରଯୁଜ୍ୟ ନୁହେଁ । ଭାରତର କିଛି ସ୍ଥାନରେ ଏହି ସଂଖ୍ୟା କମ । ଜମ୍ମୁ ଏବଂ କାଶ୍ମୀର, ଆସାମ ଏବଂ ଉତ୍ତର-ପୂର୍ବରେ ଏହି ସୀମା କେବଳ ଛଅଟି । ଅର୍ଥାତ୍ ଏହିସବୁ ସ୍ଥାନରେ ରହୁଥିଲେ ଆପଣ କେବଳ ୬ଟି ସିମ କାର୍ଡ ରଖିପାରିବେ । ଯଦି ଆପଣଙ୍କ ପାଖରେ ଏହିସବୁ ସଂଖ୍ୟାରୁ ଅଧିକ ସିମ କାର୍ଡ ଥାଏ, ତେବେ ଏଥିପାଇଁ କ’ଣ ଦଣ୍ଡ ରହିଛି ଜାଣିନିଅନ୍ତୁ । ସିମ କାର୍ଡ ସୀମା ଅତିକ୍ରମ କଲେ ପ୍ରଥମ ଅପରାଧ ପାଇଁ ୫୦ ହଜାର ଟଙ୍କା ଜରିମାନା ଏବଂ ପରବର୍ତ୍ତୀ ଅପରାଧ ପାଇଁ ୨ ଲକ୍ଷ ଟଙ୍କା ଜରିମାନା ହୋଇପାରେ । ଯଦି ଆପଣ ଜାଣିବାକୁ ଚାହାଁନ୍ତି ଯେ, ଆପଣଙ୍କ ନାଁରେ କେତୋଟି ସିମ କାର୍ଡ ଅଛି, ତେବେ ସଞ୍ଚାର ସାଥୀ ପୋର୍ଟାଲ ଭିଜିଟ କରନ୍ତୁ । ଏହି ପୋର୍ଟାଲ ମାଧ୍ୟମରେ ଆପଣ ସିମ କାର୍ଡ ସୀମା, ନିଜ ନାଁରେ କେତୋଟି ସିମ କାର୍ଡ ରହିଛି ଏ ବାବଦରେ ସମସ୍ତ ସୂଚନା ସହଜରେ ଜାଣିପାରିବେ ।
