- ୨୦୦୦ ମସିହାରେ ବାଂଲାଦେଶ ବିପକ୍ଷରେ ଗୋଟିଏ ମ୍ୟାଚ୍ ଖେଳି ବିସିବିକୁ ଟେଷ୍ଟ ମାନ୍ୟତା ଦେବାରେ ସହାୟତା କରିଥିଲା ଭାରତ
- ମୁସ୍ତାଫିଜୁରଙ୍କୁ କେକେଆର୍ରୁ ବାହାର କରାଯିବା ପରେ ବିକୃତ ମସ୍ତିଷ୍କ ସ୍ବରୁପ ଆଭିମୁଖ୍ୟ ଗ୍ରହଣ କରିଛି ବିସିବି
- ଭାରତର ଆଇପିଏଲ୍ ପ୍ରସାରଣରେ ପ୍ରତିବନ୍ଧକ ସାଙ୍ଗକୁ ୨୦୨୬ ଟି-୨୦ ବିଶ୍ବକପ୍ରେ ଏହାର ମ୍ୟାଚ୍ ଭାରତରୁ ସ୍ଥାନାନ୍ତରଣ ପାଇଁ ଆଇସିସିକୁ ଚିଠି ଲେଖିଛି ବିସିବି
ନୂଆଦିଲ୍ଲୀ,୦୫/୦୧: ମୁସ୍ତାଫିଜୁର ରହମାନ ବିବାଦ ସୀମା ଅତିକ୍ରମ କରିସାରିଛି। ବାଂଲାଦେଶ କ୍ରିକେଟ ବୋର୍ଡ ଏବଂ ସରକାର ସେମାନଙ୍କର ମତକୁ ତୀବ୍ର କରିଛନ୍ତି। ପ୍ରଥମେ, ବାଂଲାଦେଶ କ୍ରିକେଟ ବୋର୍ଡ, ସରକାରୀ ନିର୍ଦ୍ଦେଶ ଅନୁଯାୟୀ, ଟି-୨୦ ବିଶ୍ୱକପ୍ ପାଇଁ ଭାରତ ଯାତ୍ରା କରିବାକୁ ମନା କରି ଦେଇଥିଲା ଏବଂ ଆଇସିସିକୁ ଚିଠି ଲେଖିଥିଲା। କିନ୍ତୁ ଆଇସିସି ଏନେଇ କୌଣସି ନିଷ୍ପତ୍ତି ନେବା ପୂର୍ବରୁ, ବଂଲାଦେଶ ଆଉ ଏକ ନିର୍ଦ୍ଦେଶ ଜାରି କଲା ଯେ, ପରବର୍ତ୍ତୀ ସୂଚନା ପର୍ଯ୍ୟନ୍ତ ବାଂଲାଦେଶରେ ଆଇପିଏଲର ପ୍ରସାରଣ ହେବ ନାହିଁ। ଯେହେତୁ ଆଇପିଏଲ୍ ମ୍ୟାଚ୍ ବର୍ତ୍ତମାନ ଅନୁଷ୍ଠିତ ହେଉନାହିଁ, ଏହି ପରିପ୍ରେକ୍ଷିରେ ଏହାକୁ ବାଂଲାଦେଶର ଆକ୍ରମଣାତ୍ମକ ପ୍ରଦର୍ଶନ ବ୍ୟତୀତ ଅନ୍ୟ କିଛି ବିବେଚନା କରାଯାଇପାରିବ ନାହିଁ।
ବାଂଲାଦେଶରେ ଆଇପିଏଲ ପ୍ରସାରଣ ବନ୍ଦ:
ବାଂଲାଦେଶ ସରକାର ସମସ୍ତ ଟିଭି ଚ୍ୟାନେଲକୁ ଇଣ୍ଡିଆନ୍ ପ୍ରିମିୟର ଲିଗ୍ (ଆଇପିଏଲ୍) ମ୍ୟାଚ୍ ଏବଂ ସମ୍ପର୍କିତ କାର୍ଯ୍ୟକ୍ରମ ପ୍ରସାରଣ ତୁରନ୍ତ ବନ୍ଦ କରିବାକୁ ନିର୍ଦ୍ଦେଶ ଦେଇଛନ୍ତି। ଭାରତୀୟ କ୍ରିକେଟ୍ ବୋର୍ଡ ବାଂଲାଦେଶୀ କ୍ରିକେଟର ମୁସ୍ତାଫିଜୁର ରହମାନଙ୍କୁ କୋଲକାତା ନାଇଟ୍ ରାଇଡର୍ସ ଦଳରୁ ବାଦ ଦେବାର ନିଷ୍ପତ୍ତି ପରେ ଢ଼ାକା ପକ୍ଷରୁ ଏହି ନିଷ୍ପତ୍ତି ନିଆଯାଇଛି।
ସଂକ୍ଷେପରେ କହିବାକୁ ଗଲେ:
- କାରଣ: ଭାରତୀୟ କ୍ରିକେଟ୍ ବୋର୍ଡ କେକେଆର ଦଳରୁ ମୁସ୍ତାଫିଜୁର ରହମାନଙ୍କୁ ବାଦ ଦେବାର ନିଷ୍ପତ୍ତି
- କାର୍ଯ୍ୟାନୁଷ୍ଠାନ: ଆଇପିଏଲ୍ ମ୍ୟାଚ୍ ଏବଂ ସମ୍ପର୍କିତ କାର୍ଯ୍ୟକ୍ରମର ପ୍ରସାରଣ ବନ୍ଦ କରିବା
- ପ୍ରଭାବ: ତୁରନ୍ତ,ପରବର୍ତ୍ତୀ ନିର୍ଦ୍ଦେଶ ପର୍ଯ୍ୟନ୍ତ
- ସୂଚନା ପ୍ରାପ୍ତକର୍ତ୍ତା: ବାଂଲାଦେଶର ସମସ୍ତ ଟିଭି ଚ୍ୟାନେଲ,ପ୍ରସାରକ ଏବଂ କେବୁଲ ଅପରେଟର"
ଆହୁରି ପଢ଼ନ୍ତୁ: ବାଂଲାଦେଶରେ ଆଇପିଏଲ ପ୍ରସାରଣ ଉପରେ କଟକଣା, ମୁସ୍ତାଫିଜୁର ରହମାନଙ୍କ ବ୍ୟାନ୍ ପରେ ନିଷ୍ପତ୍ତି
ମୁସ୍ତାଫିଜୁରଙ୍କ ବିବାଦ:
ସମ୍ପୂର୍ଣ୍ଣ ବିବାଦ ମୁସ୍ତାଫିଜୁର ରହମାନଙ୍କ ନାଁରୁ ଆରମ୍ଭ ହୋଇଥିଲା। ଡିସେମ୍ବର ୧୬ ତାରିଖରେ ଆଇପିଏଲ୍ ୨୦୨୬ ନିଲାମରେ ତାଙ୍କୁ କୋଲକାତା ନାଇଟ୍ ରାଇଡର୍ସ ୯.୨୦ କୋଟିରେ କିଣିଥିଲା। ତା'ପରେ, ବାଂଲାଦେଶରେ ହିନ୍ଦୁମାନଙ୍କ ଉପରେ ଅତ୍ୟାଚାରକୁ ନେଇ ଭାରତରେ ହଙ୍ଗାମା ହୋଇଥିଲା। କୋଲକାତା ଦଳକୁ ମୁସ୍ତାଫିଜୁରଙ୍କୁ ମୁକ୍ତ କରିବାକୁ ପଡ଼ିଲା। ଏକ ଜରୁରୀକାଳୀନ ବୈଠକ ପରେ, ବାଂଲାଦେଶ କ୍ରିକେଟ୍ ବୋର୍ଡ ଏବଂ ବାଂଲାଦେଶ ସରକାର ଦାବି କରିଥିଲେ ଯେ ଟି-୨୦ ବିଶ୍ୱକପରେ ସେମାନଙ୍କର ମ୍ୟାଚ୍ ଭାରତରୁ ସ୍ଥାନାନ୍ତରିତ କରାଯାଉ। ତା'ପରେ ବାଂଲାଦେଶ ଆଇସିସିକୁ ଏକ ଚିଠି ଲେଖି ଟି-୨୦ ବିଶ୍ୱକପ୍ ସ୍ଥାନ ସ୍ଥାନାନ୍ତର କରିବାକୁ ଦାବି କରିଥିଲା। ବର୍ତ୍ତମାନ, ସେମାନେ ବାଂଲାଦେଶରେ ଆଇପିଏଲ୍ ପ୍ରସାରଣ ଉପରେ ରୋକ ଲଗାଇଛନ୍ତି।
ବିଶ୍ୱ କ୍ରିକେଟରେ ରେଭେନ୍ୟୁ ସେୟାର:
ବାଂଲାଦେଶ ପ୍ରଥମ ଥର ପାଇଁ ପାକିସ୍ତାନ କ୍ରିକେଟ ବୋର୍ଡର ଆଭିମୁଖ୍ୟକୁ ଅନୁକରଣ କରିବାକୁ ଚେଷ୍ଟା କରିଛି। ତଥାପି, ବାଂଲାଦେଶ କ୍ରିକେଟ ବୋର୍ଡର ଶକ୍ତି ପାକିସ୍ତାନ ତୁଳନାରେ ଅଧା। ଉଭୟ ବୋର୍ଡର ବଜାର ଶକ୍ତି ସେମାନଙ୍କର ନେଟ୍ ୱେର୍ଥରୁ ଅନୁମାନ କରାଯାଇପାରିବ। ବିସିସିଆଇର ନେଟ୍ ୱେର୍ଥ ୨ ବିଲିୟନ ଆମେରିକୀୟ ଡଲାର ଅର୍ଥାତ୍ ୧୮,୦୦୦ କୋଟି ଥିବା ବେଳେ ବାଂଲାଦେଶ କ୍ରିକେଟ ବୋର୍ଡ ଅର୍ଥାତ୍ ବିସିବିର ନେଟ୍ ୱେର୍ଥ ୫୧ ମିଲିୟନ ଆମେରିକୀୟ ଡଲାର ଅର୍ଥାତ୍ ଭାରତୀୟ ମୁଦ୍ରାରେ ୫୦୦ କୋଟି ଟଙ୍କା ହେବ।
ଉଭୟ ଦଳର ଆଇସିସି ରେଭେନ୍ୟୁରେ ମଧ୍ୟ ଏକ ବଡ଼ ପାର୍ଥକ୍ୟ ଅଛି:
୨୦୨୪-୨୭ ସୁଦ୍ଧା ଆଇସିସି ରାଜସ୍ୱରେ କାହାର କେତେ ଭାଗିଦାରୀ?
ବିସିସିଆଇ ୩୮.୨% (ପ୍ରାୟ୨,୦୦୦ କୋଟି)
ବାଂଲାଦେଶ ୪.୪୬% (ପ୍ରାୟ୨୨୫ କୋଟି)
ଅନେକ ଉପକାର ଭୁଲିଯାଉଛି ବାଂଲାଦେଶ କ୍ରିକେଟ୍ ବୋର୍ଡ:
ବାଂଲାଦେଶ କ୍ରିକେଟ୍ ବୋର୍ଡ ଜଣେ ଖେଳାଳିଙ୍କୁ ନେଇ ଭାରତ ବିରୁଦ୍ଧରେ ଏପରି ଆଭିମୁଖ୍ୟ ଗ୍ରହଣ କରୁଛି, ଯେପରି ସେ ଦୀର୍ଘ ଦିନ ଧରି ଭାରତୀୟ କ୍ରିକେଟ୍ ବୋର୍ଡ ବିରୁଦ୍ଧରେ କିଛି ହତାଶା କିମ୍ବା କ୍ଷୋଭର ଶିକାର ହୋଇଛି। ତଥାପି, ବାଂଲାଦେଶ କ୍ରିକେଟ୍ ବୋର୍ଡ ଭୁଲିଯାଉଛି ଯେ, ବିସିବି ଟେଷ୍ଟ କ୍ରିକେଟର ମାନ୍ୟତା ହାସଲ କରିବାରେ ଭାରତୀୟ କ୍ରିକେଟ୍ ଏକ ପ୍ରମୁଖ ଭୂମିକା ଗ୍ରହଣ କରିଥିଲା। ବାଂଲାଦେଶକୁ ଟେଷ୍ଟ କ୍ରିକେଟରେ ମାନ୍ୟତା ଦେବାରେ ସାହାଯ୍ୟ କରିବା ପାଇଁ, ଭାରତୀୟ କ୍ରିକେଟ୍ ଦଳ ୨୦୦୦ ମସିହାରେ ବାଂଲାଦେଶ ବିପକ୍ଷରେ ଗୋଟିଏ ଟେଷ୍ଟ ମ୍ୟାଚ୍ ଖେଳିଥିଲା। ବାଂଲାଦେଶର ଅମିନୁଲ ଇସଲାମ ସେହି ମ୍ୟାଚ୍ରେ ଏକମାତ୍ର ଶତକ ହାସଲ କରିଥିଲେ। ଏହି ସମୟରେ ସୁନୀଲ ଜୋଶୀ ୮ ୱିକେଟ୍ ନେଇଥିଲେ ଏବଂ ଗୋଟିଏ ଇନିଂସରେ ୯୨ ରନ୍ କରିଥିଲେ। ଜୋଶୀଙ୍କୁ ମ୍ୟାନ୍ ଅଫ୍ ଦି ମ୍ୟାଚ୍ ବିବେଚିତ କରାଯାଇଥିଲା, ଏବଂ ଭାରତ ୯ ୱିକେଟ୍ ରେ ମ୍ୟାଚ୍ ଜିତିଥିଲା।
ପ୍ରମେୟ ପୃଷ୍ଠାର କ୍ରୀଡ଼ା ଖବର: ପୋଲାର୍ଡଙ୍କ ସହ ପଙ୍ଗା ନେଲେ ପାକିସ୍ତାନ ବୋଲର ନସୀମ, ମ୍ୟାଚ ମଝିରେ ମାହୋଲ ସରଗରମ
