ଭବାନୀପାଟଣା,୨୫।୮(ଆପ୍ର): କେରଳ ତିରୁବନନ୍ତପୁରମ ଠାରେ ଏକ ଜାତୀୟ ସ୍ତରୀୟ ବରିଷ୍ଠ ସାମ୍ୱାଦିକ ସମାରୋହ ଅନୁଷ୍ଠିତ ହୋଇଯାଇଛି। ଅଗଷ୍ଟ ୧୯ରୁ ୨୧ ତିନି ଧରି ଆୟୋଜିତ ଏହି ସମାରୋହରେ ଦେଶର ସମସ୍ତ ରାଜ୍ୟର ବରିଷ୍ଠ ସାମ୍ବାଦିକ ଯୋଗଦେଇଥିବା ବେଳେ କେନ୍ଦ୍ର ସରକାରଙ୍କୁ ଅବସରପ୍ରାପ୍ତ ସାମ୍ବାଦିକମାନଙ୍କ ପାଇଁ ପେନସନ୍ ଯୋଜନା ଆରମ୍ଭ କରିବାକୁ ଆହ୍ୱାନ କରାଯାଇଥିଲା । ଏହି ଅବସରରେ ସିନିୟର୍ ଜର୍ନାଲିଷ୍ଟସ୍ ଫେଡେରେସନ୍ ଅଫ୍ ଇଣ୍ଡିଆ ଗଠନ ହୋଇଥିଲା।
ସମ୍ମେଳନରେ ବରିଷ୍ଠ ସାମ୍ବାଦିକମାନଙ୍କ ପାଇଁ ସାରା ଦେଶରେ ଏକକ ସ୍ୱାସ୍ଥ୍ୟ ସୁରକ୍ଷା ଯୋଜନା ଏବଂ ବନ୍ଦ ହୋଇଯାଇଥିବା ରେଳଯାତ୍ରାର ରିହାତି ପୁନଃ ପ୍ରଚଳନ କରିବା ପାଇଁ ମଧ୍ୟ ଦାବି ହୋଇଥିଲା ।
ଫେଡେରେସନ୍ର ଅଧ୍ୟକ୍ଷ ଭାବେ ସନ୍ଦୀପ୍ ଦିକ୍ଷିତ (ଦିଲ୍ଲୀ) ଓ ସାଧାରଣ ସଂପାଦକ ଭାବେ ଏନ୍. ପି. ଚେକ୍କୁଟି (କେରଳ) ମନୋନିତ ହୋଇଛନ୍ତି । ଅନ୍ୟାନ୍ୟ କାର୍ଯ୍ୟକାରୀ ସଦସ୍ୟମାନଙ୍କ ମଧ୍ୟରେ ଉପାଧ୍ୟକ୍ଷ ଆନନ୍ଦମ୍ ପୁଲିପାଲୁପୁଲା (ତେଲେଙ୍ଗାନା), ସୁହାସିନୀ ପ୍ରଭୁ ଗୋଭାଙ୍କର (ଗୋଆ), ଡା. ଟି. ଜନାର୍ଦ୍ଦନ (ଆନ୍ଧ୍ରପ୍ରଦେଶ) ଓ ଚନ୍ଦ୍ର ପ୍ରକାଶ୍ ଭାରଦ୍ୱାଜ (ମଧ୍ୟପ୍ରଦେଶ)। ସମ୍ପାଦକ ଭାବେ କେ. ଶାନ୍ତକୁମାରୀ (କର୍ଣ୍ଣାଟକ), କନ୍ହୁ ନନ୍ଦ (ଓଡିଶା), ଆର୍. ରଙ୍ଗରାଜ (ତମିଳନାଡୁ) ଓ ଡା. ଜୟପାଲ ପାରସୁରାମ ପାଟିଲ୍ (ମହାରାଷ୍ଟ୍ର)। କୋଷାଧ୍ୟକ୍ଷ ଭାବେ କେ. ପି. ବିଜୟକୁମାର (କେରଳ) ହୋଇଥିବା ବେଳେ ଓଡିଶାରୁ ପ୍ରତିନିଧିତ୍ଵ କରିଥିବା କଳାହାଣ୍ଡି ଜିଲ୍ଳାର ବରିଷ୍ଠ ସାମ୍ବାଦିକ ଉମା ଶଙ୍କରଙ୍କ ସମେତ ଏକ ୮ ଜଣିଆ କାର୍ଯ୍ୟକାରି ସଦସ୍ୟ ମନୋନିତ ହୋଇଥିଲେ।
ସମାରୋହରକୁ ପୂର୍ବତନ ଗୋଆ ଓ ମିଜୋରମ୍ ରାଜ୍ୟପାଳ ଅଧିବକ୍ତା ପି.ଏସ୍. ଶ୍ରୀଧରନ୍ ପିଳ୍ଳଇ ଉଦଘାଟନ କରିଥିଲେ। ଏହା ସହିତ, ପୂର୍ବତନ କେନ୍ଦ୍ରମନ୍ତ୍ରୀ ପ୍ରୋଫେସର କେ.ଭି. ଥୋମାସ୍, ପୂର୍ବତନ ମନ୍ତ୍ରୀ ପି. କେ. କୁନ୍ହାଲିକୁଟ୍ଟି, ଏସ୍ଜେଏଫଆଇ ଅଧ୍ୟକ୍ଷ ସନ୍ଦୀପ୍ ଦିକ୍ଷିତ ଓ ସାଧାରଣ ସଚିବ ଏନ୍. ପି. ଚେକ୍କୁଟି ମଧ୍ୟ ସଭାକୁ ସମ୍ବୋଧନ କରିଥିଲେ।
