ନୂଆଦିଲ୍ଲୀ,୨୮/୦୮: ଆଜି ଜୁରିଖରେ ଡାଏମଣ୍ଡ ଲିଗ୍ ଫାଇନାଲ୍ର ମୋଟ୍ ୨୭ଟି ଇଭେଣ୍ଟ ଅନୁଷ୍ଠିତ ହେବ । ପ୍ରଥମ ଦିବସରେ ରହିଛି ୫ଟି ଇଭେଣ୍ଟ । ନୀରଜଙ୍କ ଜାଭେଲିନ ଥ୍ରୋ’ ଫାଇନାଲ୍ ମୁକାବିଲା ଭାରତୀୟ ସମୟ ରାତି ୧୧.୧୫ ମିନିଟ୍ରେ ଆରମ୍ଭ ହେବ ।
ଚଳିତ ସିଜନରେ ନୀରଜ ୨ଟି ଲେଗରେ ଭାଗ ନେଇଥିଲେ । ଦୋହା ଲେଗରେ ସେ ୯୦.୨୩ ମିଟର ଦୂର ଜାଭେଲିନ ଫିଙ୍ଗି ଦ୍ୱିତୀୟ ସ୍ଥାନ ଅଧିକାର କରିଥିଲେ । ଏହାପରେ ସେ ପ୍ୟାରିସ୍ ଲେଗ୍ରେ ୮୮.୧୬ ମିଟର ଥ୍ରୋ ବଳରେ ପ୍ରଥମ ସ୍ଥାନ ଅଧିକାର କରି ଫାଇନାଲ୍କୁ ଯୋଗ୍ୟତା ଅର୍ଜନ କରିଥିଲେ । ପରବର୍ତ୍ତୀ ୨ଟି ଲେଗ୍ ସିଲେସିଆ ଓ ବ୍ରସେଲ୍ସରେ ସେ ଭାଗ ନେଇ ନଥିଲେ ।
ଆଜି ନୀରଜଙ୍କ ଟକ୍କର ଦେବା ପାଇଁ ରହିଛନ୍ତି ଆଉ ୭ ପ୍ରତିଯୋଗୀ । ସେମାନଙ୍କ ମଧ୍ୟରୁ ୬ଜଣ ମାନ୍ୟତା ତାଲିକାର ଶ୍ରେଷ୍ଠ ୧୦ ମଧ୍ୟରେ ରହିଛନ୍ତି । ଟାଇଟଲ ଜିତିବାକୁ ହେଲେ ନୀରଜଙ୍କୁ ଜର୍ମାନୀର ଜୁଲିଆନ ୱେବର ଓ ଗ୍ରେନାଡ଼ାର ଆଣ୍ଡରସନ ପିଟର୍ସଙ୍କ ସହ କଡ଼ା ମୁକାବିଲା କରିବାକୁ ପଡ଼ିବ । ୱେବର ଚଳିତ ସିଜନରେ ୱାର୍ଲ୍ଡ ଲିଡର ରହିଛନ୍ତି । ଦୋହା ଲେଗରେ ସେ ଚାମ୍ପିଅନ୍ ହୋଇଥିଲେ । ୱେବର ଓ ପିଟର୍ସଙ୍କ ସମେତ ୨୦୧୨ ଅଲିମ୍ପିକ୍ସ ଚାମ୍ପିଅନ୍ କେସର୍ଣ୍ଣ ୱାଲକଟ ଓ ପୂର୍ବତନ ବିଶ୍ୱ ଚାମ୍ପିଅନ୍ ଜୁଲିୟସ ୟେଗୋ ମଧ୍ୟ ନୀରଜଙ୍କୁ ଚ୍ୟାଲେଞ୍ଜ ଦେବେ ।
