ମନମୁଣ୍ଡା ୨୬।୬:ମନମୁଣ୍ଡା ଶ୍ରୀ ଦଧିବାମନ ଏବଂ ଗମ୍ଭାରୀଗୋରା (ପଦରପଡ଼ା) ଶ୍ରୀ ଜଗନ୍ନାଥ ମନ୍ଦିରରେ ନେତ୍ର ଉତ୍ସବ ଓ ମହାବାହୁଙ୍କ ନବଯୌବନ ବେଶ ଅନୁଷ୍ଠିତ ହୋଇଯାଇଛି। ଦେବ ସ୍ନାନ ପୂର୍ଣ୍ଣିମାରେ ପ୍ରତ୍ୟେକ୍ଷ ସ୍ନାନ କରି ଜ୍ବରରେ ପୀଡ଼ିତ ହୋଇ ଅଣସର ଗୃହରେ ମନମୁଣ୍ଡାର ପୂଜକ ଆଶୁତୋଷ ହୋତା ଏବଂ ଗମ୍ଭାରୀଗୋରାର ପୂଜକ ରମେଶ ହୋତା ଏବଂ ଶୁକଦେବ ହୋତା ପ୍ରଭୁଙ୍କ ଗୁପ୍ତ ସେବା ଓ ଉପଚାର କରୁଥିଲେ ।
ସକାଳେ ଉଭୟ ପୂଜକ ନିଜ ନିଜ ମନ୍ଦିର ଅଣସର ଘରେ ମହାପ୍ରଭୁଙ୍କ ଆସ୍ଥାନ ଚକା ଅପସାରଣ କରି ଅଣସର ତାଟି ଫିଟାଇଥିଲା। ତାପରେ ନେତ୍ର ଉତ୍ସବ କରାଯାଇଥିଲା। ଏନେଇ ସ୍ଵତନ୍ତ୍ର ପୂଜାର୍ଚ୍ଚନା ଓ ହୋମ କରାଯାଇଥିଲା। ଏହାପରେ ମହାପ୍ରଭୁ ନବଯୌବନ ବେଶରେ ଭକ୍ତ ମାନଙ୍କୁ ଦର୍ଶନ ଦେଇଥିଲେ। ଶତାଧିକ ଭକ୍ତ ପ୍ରଭୁଙ୍କ ଏହି ଦୁର୍ଲଭ ବେଶ ଦେଖିବାକୁ ଆସିଥିଲେ। ମନମୁଣ୍ଡାରେ ବ୍ରାହ୍ମଣ ଚନ୍ଦ୍ରଶେଖର ରଥ ଓ ମନ୍ଦିର କମିଟି ସଦସ୍ୟ ଗମ୍ଭାରୀଗୋରାରେ ଦେବାଶିଷ ଖମାରୀ, ଗୌତମ ଖମାରୀ ଓ ମନ୍ଦିର କମିଟି ସଦସ୍ୟମାନେ କାର୍ଯ୍ୟକ୍ରମରେ ସହଯୋଗ କରିଥିଲେ। ଶୁକ୍ରବାର କାଳିଆ ଠାକୁର ରଥାରୂଢ଼ ହୋଇ ନବଦିନାତ୍ମକ ଯାତ୍ରାରେ ଜନ୍ମବେଦୀକୁ ଯିବା ପାଇଁ ସୁସଜ୍ଜିତ ରଥ ପ୍ରସ୍ତୁତ ହୋଇ ରହିଛି।
