ନୀରବି ଗଲେ ବିଜୁ ବାବୁଙ୍କ ସହଯୋଗୀ ନୀଳ ଭାଇ, ୭୬ ବର୍ଷ ବୟସରେ ପରଲୋକ

କେନ୍ଦ୍ରାପଡ଼ା, ୨୦/୦୩ : କେନ୍ଦ୍ରାପଡ଼ାର ପୂର୍ବତନ ନଗରପାଳ ତଥା ଜିଲ୍ଲା ରାଜନୀତିର ଚାଣକ୍ୟ ଭାବେ ପରିଚିତ ବିଜୟକୃଷ୍ଣ ସାହୁ ଆଉ ନାହାନ୍ତି। ୭୬ ବର୍ଷ ବୟସରେ ତାଙ୍କର ପରଲୋକ ହୋଇଯାଇଛି। ବାର୍ଦ୍ଧକ୍ୟ ଜନିତ ଅସୁସ୍ଥତା କାରଣରୁ ସେ କିଛି ମାସ ହେଲା ଘରେ ଚିକିତ୍ସାଧୀନ ଥିଲେ। ଆଜି ସକାଳେ ଛାତିରେ ଯନ୍ତ୍ରଣା ଅନୁଭବ କରିବାରୁ ତାଙ୍କୁ କେନ୍ଦ୍ରାପଡ଼ା ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଥିଲା। ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ଘଟିଛି।

ସେ ନୀଳ ଭାଇ ନାଁରେ ବେଶ୍ ପରିଚିତ ଥିଲେ। ପ୍ରବାଦ ପୁରୁଷ ବିଜୁ ବାବୁଙ୍କ ସହଯୋଗୀ ଭାବେ ଜଣାଶୁଣା ଥିଲେ। ବରିଷ୍ଠ ନେତା ବିଜୟ ମହାପାତ୍ର, ଦିବଙ୍ଗତ ପୂର୍ବତନ ମନ୍ତ୍ରୀ ନଳିନୀକାନ୍ତ ମହାନ୍ତି, ବେଦପ୍ରକାଶ ଅଗ୍ରୱାଲ, ଶ୍ରୀକାନ୍ତ ଜେନା, ପ୍ରଭାତ ସାମନ୍ତରାୟଙ୍କ ଭଳି ପ୍ରଦେଶ ପରିଚିତି ଥିବା ଅନେକ ରାଜନେତାମାନଙ୍କ ସହ ମିଶି କାମ କରିଛନ୍ତି। କେବଳ ଯେ ରାଜନୀତି ନୁହେଁ, ଓକିଲାତି ପେଶାରେ ମଧ୍ୟ ଦୀର୍ଘ ବର୍ଷର ଅଭିଜ୍ଞତା ଥିଲା। ତାଙ୍କ ମୃତ୍ୟୁରେ ସ୍ଥାନୀୟ ଅଞ୍ଚଳରେ ଶୋକାକୁଳ ପରିବେଶ ସୃଷ୍ଟି ହୋଇଛି। ବହୁ ମାନ୍ୟଗଣ୍ୟ ବ୍ୟକ୍ତି ତାଙ୍କ ବଡ଼ହାଟର ସ୍ଥିତ ବାସଭବନରେ ପହଞ୍ଚି ଶେଷ ଦର୍ଶନ କରିଛନ୍ତି।

ବିଜୟକୃଷ୍ଣଙ୍କ ବିୟୋଗ ଜିଲ୍ଲା ରାଜନୀତି ଓ ସାଧାରଣ ସମାଜ ପାଇଁ ଏକ ଅପୂରଣୀୟ କ୍ଷତି l ମହାପ୍ରଭୁ ତାଙ୍କ ଆତ୍ମାକୁ ଶ୍ରୀଚରଣରେ ସ୍ଥାନ ଦିଅନ୍ତୁ। ପରିବାର ଓ ପ୍ରିୟଜନଙ୍କୁ ଏହି ଦୁଃଖ ସହିବାକୁ ଧୈର୍ଯ୍ୟ ଏବଂ ଶକ୍ତି ପ୍ରଦାନ କରନ୍ତୁ l