ନୂଆଦିଲ୍ଲୀ, ୦୧/୦୬: ଉତ୍ତରପୂର୍ବ ଭାରତରେ ପ୍ରବଳ ବର୍ଷା ଲାଗି ରହିଛି । ଅରୁଣାଚଳ ପ୍ରଦେଶ, ଆସାମ, ମେଘାଳୟ, ମିଜୋରାମ, ସିକ୍କିମରେ ବନ୍ୟା ସ୍ଥିତି ସୃଷ୍ଟି ହୋଇଛି । ଗତ ୨ ଦିନରେ ଏଠାରେ ୩୦ ଜଣଙ୍କ ମୃତ୍ୟୁ ଘଟିଲାଣି । କେବଳ ୨୨ ଜଣ ପ୍ରାଣ ହରାଇଛନ୍ତି । ସେମାନଙ୍କ ମଧ୍ୟରେ ଭୂସ୍ଖଳନ ଯୋଗୁ ଆସାମରେ ୯ ଜଣଙ୍କ ମୃତ୍ୟୁ ଘଟିଛି । ବନ୍ୟାଯୋଗୁ ୧୦ ହଜାରରୁ ଊଦ୍ଧ୍ୱର୍ ଲୋକ ପ୍ରଭାବିତ ହୋଇଛନ୍ତି । ସେହିପରି ଅରୁଣାଚଳ ପ୍ରଦେଶରେ ଅଚାନକ ବନ୍ୟା-ଭୂସ୍ଖଳନ କାରଣରୁ ୭ ଜଣଙ୍କ ମୃତ୍ୟୁ ହୋଇଛି । ମୃତକଙ୍କ ମଧ୍ୟରେ ଦୁଇ ପରିବାରର ସଦସ୍ୟ ଅଛନ୍ତି । ପୂର୍ବ କାମେଙ୍ଗ ଜିଲ୍ଲାରେ ୧୩ ନମ୍ବର ଜାତୀୟ ରାଜପଥର ବାନାସେପ୍ପା ସେକ୍ସନରେ ଶୁକ୍ରବାର ବିଳମ୍ବିତ ରାତିରେ ଭୂସ୍ଖଳନ ହୋଇଥିଲା । ଏଥିରେ ଏହି ଦୁଇ ପରିବାରର ଗାଡ଼ି ଖାଇକୁ ଖସିପଡ଼ିଥିଲା ।
ସେହିଭଳି ମିଜୋରାମରେ ୪ ଓ ମେଘାଳୟରେ ୩ ଜଣଙ୍କ ମୃତ୍ୟୁ ହୋଇଛି । ସେହିପରି ଭୂସ୍ଖଳନ, ପାହାଡ଼ ଅତଡ଼ା ଖସିବା ଆଦି କାରଣରୁ ଗତକାଲି ମେଘାଳୟରେ ୩, ଅରୁଣାଚଳ ପ୍ରଦେଶରେ ୨ ଏବଂ ମିଜୋରାମ, ନାଗାଲାଣ୍ଡ ଓ ତ୍ରିପୁରାରେ ଜଣେ ଲେଖାଏଙ୍କ ମୃତ୍ୟୁ ହୋଇଥିଲା । ମିଜୋରାମର ଲାଙ୍ଗ୍ଟଲାଇ ସହରରେ ଭୂସ୍ଖଳନ ଯୋଗୁ ୫ ଘର ଏବଂ ଏକ ହୋଟେଲ ଭାଙ୍ଗି ଯାଇଛି । ସିକ୍କିମରେ ଭୂସ୍ଖଳନ ଯୋଗୁ ଥେଙ୍ଗ୍ ଏବଂ ଚୁଙ୍ଗ୍ଥାଙ୍ଗ୍ ଅଞ୍ଚଳରେ ଅନେକ ଘର ଆବର୍ଜନା ତଳେ ପୋତି ହୋଇଯାଇଛି । ହିମାଚଳ ପ୍ରଦେଶରେ ପ୍ରବଳ ବର୍ଷା ନେଇ ଆଲର୍ଟ ଜାରି କରାଯାଇଛି । ନେପାଳରେ ବର୍ଷା କାରଣରୁ ବିହାରର କିଶନଗଞ୍ଜ ଜିଲ୍ଲାର ନଦୀଗୁଡ଼ିକରେ ଜଳସ୍ତର ବୃଦ୍ଧି ପାଇଛି ।
କନକଇ, ବୁଢ଼ୀ କନକଇ ଏବଂ ମେଚି ନଦୀରେ ଜଳସ୍ତର ବଢ଼ିଛି । ନଦୀ ପାଶ୍ୱର୍ବର୍ତ୍ତୀ ଅଞ୍ଚଳରେ ପାଣି ପଶିଯାଇଛି । ଫଳରେ ଅନେକ ଫସଲ ନଷ୍ଟ ହୋଇଛି । ଜମ୍ମୁ-କାଶ୍ମୀରରେ ଶନିବାର ପ୍ରବଳ ବର୍ଷା ସାଙ୍ଗକୁ ଝଡ଼ତୋଫାନ ମଧ୍ୟ ହୋଇଛି । ମେ’ ୩୦ ସୁଦ୍ଧା ଦେଶରେ ହାରାହାରି ୧୧୬.୬ ମିମି ବର୍ଷା ହୋଇଥିବା ରେକର୍ଡ ହୋଇଛି । ଯାହା କି କୌଣସି ମେ’ ମାସରେ ସର୍ବାଧିକ । ୧୯୯୦ ମସିହାରେ ଏହା ୧୧୦.୭ ମିମି ଥିଲା । ସାଧାରଣତଃ ମେ’ରେ ହାରାହାରି ୬୧.୪ ମିମି ବର୍ଷା ହୋଇଥାଏ ।
