ସମ୍ବଲପୁର/ଅନୁଗୁଳ/ଢେଙ୍କାନାଳ୧୭/୦୫: ଶୁକ୍ରବାର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ସମ୍ବଲପୁର, ଅନୁଗୁଳ, ଢେଙ୍କାନାଳ ଗସ୍ତ କରିବେ । ସମ୍ବଲପୁର ଓ ଢେଙ୍କାନାଳ ସଂସଦୀୟ କ୍ଷେତ୍ରରେ ଦଳୀୟ ପ୍ରାର୍ଥୀଙ୍କ ପାଇଁ ପ୍ରଚାର କରିବେ । ଏଥିପାଇଁ ସମସ୍ତ ପ୍ରସ୍ତୁତି ଚୂଡ଼ାନ୍ତ ହୋଇଛି ।
ଦିନ ୧୧ଟା ୧୫ରେ ସମ୍ବଲପୁରର ଅଇଁଠାପାଲି ପିଏଚ୍ଡି ପଡ଼ିଆରେ ପହଞ୍ଚି ମୁଖ୍ୟମନ୍ତ୍ରୀ ଜନସଭାକୁ ସମ୍ବୋଧନ କରିବେ । ମଧ୍ୟାହ୍ନ ୧୨ଟା ୦୫ ସମୟରେ ନାକଟିଦେଉଳ କଲେଜ ପଡ଼ିଆରେ ଉଦ୍ବୋଧନ ଦେବାର ସୂଚନା ରହିଛି । ପରେ ଢେଙ୍କାନାଳ ସଂସଦୀୟ କ୍ଷେତ୍ରର ଅନୁଗୁଳ ଓ ଢେଙ୍କାନାଳରେ ନିର୍ବାଚନୀ ପ୍ରଚାର ପାଇଁ ଯିବେ ମୁଖ୍ୟମନ୍ତ୍ରୀ । ଦୁଇ ପୃଥକ୍ ସ୍ଥାନରେ ଆୟୋଜିତ ବିଶାଳ ଜନସଭାରେ ସାମିଲ୍ ହୋଇ ଦଳୀୟ ପ୍ରାର୍ଥୀଙ୍କ ପାଇଁ ଭୋଟ ମାଗିବେ । ଅପରାହ୍ଣ ସାଢ଼େ ୧ଟା ବେଳେ ମୁଖ୍ୟମନ୍ତ୍ରୀ ଅନୁଗୁଳରେ ମଧ୍ୟାହ୍ନଭୋଜନ ଓ ବିଶ୍ରାମ ନେବେ । ଅପରାହ୍ଣ ୩ଟା ୩୫ରେ ଷ୍ଟାଡିୟମ୍ ପରିସରରେ ଆୟୋଜିତ ସଭାରେ ଜନତାଙ୍କୁ ସମ୍ବୋଧିତ କରିବାର କାର୍ଯ୍ୟକ୍ରମ ରହିଛି । ଅପରାହ୍ଣ ୪ଟା ୫ରେ ମୁଖ୍ୟମନ୍ତ୍ରୀ ଢେଙ୍କାନାଳ ଅଭିମୁଖେ ଯିବେ । ଅପରାହ୍ଣ ପ୍ରାୟ ସାଢ଼େ ୪ଟାରେ ଢେଙ୍କାନାଳ ସଭାରେ ମୁଖ୍ୟମନ୍ତ୍ରୀ ଯୋଗଦେବାର କାର୍ଯ୍ୟକ୍ରମ ରହିଛି । ବରିଷ୍ଠ ବିଜେଡି ନେତା କାର୍ତ୍ତିକ ପାଣ୍ଡିଆନ୍ ମଧ୍ୟ ଯୋଗଦେବେ ବୋଲି ଜଣାପଡ଼ିଛି । ମୁଖ୍ୟମନ୍ତ୍ରୀଙ୍କ ଗସ୍ତକୁ ନେଇ ବିଜେଡି ଶିବିର ଚଳଚଞ୍ଚଳ ହୋଇଉଠିଛି ।