ନୂଆଦିଲ୍ଲୀ,୦୧/୦୬: ଦେଶରେ ଲୋକସଭା ନିର୍ବାଚନର ସପ୍ତମ ତଥା ଅନ୍ତିମ ପର୍ଯ୍ୟାୟରେ ମତଦାନ ଆରମ୍ଭ। ୭ ରାଜ୍ୟ ଓ ଗୋଟିଏ କେନ୍ଦ୍ର ଶାସିତ ଅଞ୍ଚଳର ୫୭ ଆସନରେ ଚାଲିଛି ଭୋଟିଂ। ସକାଳ ୭ଟାରୁ ମତଦାନ ଆରମ୍ଭ ହୋଇ ଅପରାହ୍ନ ୫ଟା ପର୍ଯ୍ୟନ୍ତ ଚାଲିବ। ଉତ୍ତରପ୍ରଦେଶ, ବିହାର, ହିମାଚଳ ପ୍ରଦେଶ, ପଞ୍ଜାବ, ଓଡ଼ିଶା, ପଶ୍ଚିମବଙ୍ଗ, ଝାଡଖଣ୍ଡ ଓ କେନ୍ଦ୍ର ଶାସିତ ଅଞ୍ଚଳ ଚଣ୍ଡିଗଡ ମତଦାନ । ସପ୍ତମ ପର୍ଯ୍ୟାୟ ଭୋଟ ସହ ଅଷ୍ଟାଦଶ ଲୋକସଭା ନିର୍ବାଚନ ପାଇଁ ମତଦାନ ପ୍ରକ୍ରିୟା ଶେଷ ହେବ । ଜୁନ ୪ରେ ଭୋଟ ଗଣତି ସହ ଫଳାଫଳ ଘୋଷଣା ହେବ ।
ଶେଷ ପର୍ଯ୍ୟାୟରେ ମୋଟ ୯୦୪ ଜଣ ପ୍ରାର୍ଥୀ ନିର୍ବାଚନ ମଇଦାନରେ ଅବତୀର୍ଣ୍ଣ ହୋଇଛନ୍ତି । ସେମାନଙ୍କ ମଧ୍ୟରେ ୮୦୯ ଜଣ ପୁରୁଷ ଓ ୯୫ ଜଣ ମହିଳା ପ୍ରାର୍ଥୀ ଅଛନ୍ତି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସମେତ କେନ୍ଦ୍ରମନ୍ତ୍ରୀ ଆର.କେ ସିଂହ ଓ ଅନୁରାଗ ସିଂହ ଠାକୁର ଏହି ପର୍ଯ୍ୟାୟରେ ସେମାନଙ୍କ ଭାଗ୍ୟ ପରୀକ୍ଷା କରୁଛନ୍ତି । ସେହିଭଳି ୪ କଳାକାର କଙ୍ଗନା ରାଣାୱତ, ରବି କିଷନ, ପୱନ ସିଂହ ଓ କାଜଲ ନିଷାଦଙ୍କ ଭାଗ୍ୟ ନିର୍ଦ୍ଧାରଣ କରିବେ ମତଦାତା।
ପୂର୍ବରୁ ୬ଟି ପର୍ଯ୍ୟାୟରେ ଲୋକସଭାର ମୋଟ ୫୪୩ ଆସନ ମଧ୍ୟରୁ ୪୮୫ଟିରେ ଭୋଟ ଗ୍ରହଣ ଶେଷ ହୋଇସାରିଛି । ଶନିବାର ଅବଶିଷ୍ଟ ୫୮ଟି ଆସନରେ ଭୋଟ ଗ୍ରହଣ ହେବ । ତେବେ ଗୁଜରାଟ ସୁରଟର ବିଜେପି ପ୍ରାର୍ଥୀ ମୁକେଶ ଦଲାଲ ପୂର୍ବରୁ ନିଦ୍ଦ୍ୱର୍ନ୍ଦ୍ୱରେ ନିର୍ବାଚିତ ହୋଇସାରିଛନ୍ତି । ତେଣୁ ମତଦାନ ୫୪୨ଟି ଆସନ ପାଇଁ ହେଉଛି ।
