ଭୁବନେଶ୍ୱର,୨୯/୦୭: ସ୍କୁଲର ସୁରକ୍ଷା ଯାଞ୍ଚ ବାଧ୍ୟତାମୂଳକ । ଛାତ୍ରଛାତ୍ରୀଙ୍କ ସୁରକ୍ଷାକୁ ଦିଆଯିବ ଗୁରୁତ୍ୱ । ସେହିପରି ସେମାନଙ୍କ ମାନସିକ ସ୍ୱାସ୍ଥ୍ୟକୁ ପ୍ରାଧାନ୍ୟ ଦିଆଯିବା ସହ କୌଣସି ଜରୁରୀକାଳୀନ ପରିସ୍ଥିତି ମୁକାବିଲା କରିବାକୁ ଶିକ୍ଷାର୍ଥୀ ଓ ଶିକ୍ଷକଙ୍କୁ ତାଲିମ ପ୍ରଦାନ କରାଯିବ । ସ୍କୁଲ କୋଠାର ଗଠନାତ୍ମକ ଦୃଢ଼ତାଠୁ ଆରମ୍ଭ କରି ବିଦ୍ୟୁତ୍ ଉପକରଣର ନିରାପତ୍ତା, ଅଗ୍ନି ନିର୍ବାପକ ବ୍ୟବସ୍ଥା ଆଦି ଯାଞ୍ଚ କରାଯିବ । ଏନେଇ ସମସ୍ତ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳକୁ କେନ୍ଦ୍ର ଶିକ୍ଷା ମନ୍ତ୍ରଣାଳୟ ପକ୍ଷରୁ ନିର୍ଦ୍ଦେଶ ଦିଆଯାଇଛି ।
ତେବେ ନିକଟରେ ରାଜସ୍ଥାନର ଏକ ସରକାରୀ ସ୍କୁଲର କୋଠା ଭୁଶୁଡ଼ି ୭ ଜଣଙ୍କ ମୃତ୍ୟୁ ହୋଇଥିବା ବେଳେ ୨୮ ଜଣ ଆହତ ହୋଇଥିଲେ। ଆଉ ଏହି ଘଟଣା ପରଠୁ ପିଲାଙ୍କ ସୁରକ୍ଷାକୁ ନେଇ ଚିନ୍ତାବ୍ୟକ୍ତ କରିଛି କେନ୍ଦ୍ର ଶିକ୍ଷା ମନ୍ତ୍ରଣାଳୟ। ମନ୍ତ୍ରଣାଳୟ ପକ୍ଷରୁ କୁହାଯାଇଛି ଯେ, ଛାତ୍ରଛାତ୍ରୀଙ୍କ ସୁରକ୍ଷାକୁ ଅଗ୍ରାଧିକାର ଦିଅ। ନିୟମିତ ବ୍ୟବଧାନରେ ସ୍କୁଲର ସୁରକ୍ଷା ଯାଞ୍ଚ କର । ଜାତୀୟ ସୁରକ୍ଷା କୋଡ୍ ଅନୁଯାୟୀ ସ୍କୁଲ କର୍ତ୍ତୃପକ୍ଷ ନିୟମ ମାନୁଛନ୍ତି କି ନାହିଁ ଯାଞ୍ଚ ହେବ । ବିପର୍ଯ୍ୟୟ ପରିଚାଳନା ମାର୍ଗଦର୍ଶିକା କଡ଼ାକଡ଼ି ପାଳନ ହେବ । ମନ୍ତ୍ରଣାଳୟ ୫ଟି ପ୍ରସ୍ତାବ ମଧ୍ୟ ଦେଇଛି । ଏଥିରେ ରହିଛି ପ୍ରତିରୋଧକ ସୁରକ୍ଷା ବ୍ୟବସ୍ଥା ଅନୁପାଳନ । ଏଥିରେ ପିଲା, ଅଭିଭାବକ ଓ ସର୍ବସାଧାରଣଙ୍କ ପାଇଁ ଉଦ୍ଦିଷ୍ଟ ସ୍ଥାନର ସୁରକ୍ଷା ଯାଞ୍ଚ କରାଯିବ । ଏଥିସହ ଅଗ୍ନି ନିରାପତ୍ତା, ଜରୁରିକାଳୀନ ପ୍ରସ୍ଥାନ, ବିଦ୍ୟୁତ ୱାରିଂ ଯାଞ୍ଚ କରାଯିବ । ସେହିପରି ଜନସଚେତନତା ଓ ପ୍ରଶିକ୍ଷଣ କାର୍ଯ୍ୟକ୍ରମକୁ ଗୁରୁତ୍ୱ ଦିଆଯାଇଛି ।
ମକ୍ଡ୍ରିଲ୍, ପ୍ରାଥମିକ ଚିକିତ୍ସା, ସୁରକ୍ଷା ପ୍ରୋଟୋକଲ ନେଇ ତାଲିମ ଦିଆଯିବ । ସ୍ଥାନୀୟ ଅଗ୍ନିଶମ ବାହାନୀ, ଏନ୍ଡିଏମ୍ଏ, ପୁଲିସ, ମେଡିକାଲ ଏଜେନ୍ସି ସହାୟତାରେ ସ୍ୱତନ୍ତ୍ର କାର୍ଯ୍ୟକ୍ରମ କରାଯିବ । ସାଇକୋସୋସିଆଲ୍ ୱେଲ୍ବିଙ୍ଗ୍ କୁ ମଧ୍ୟ ଗୁରୁତ୍ୱ ଦିଆଯିବ । ଏଥିରେ ମାନସିକ ସ୍ୱାସ୍ଥ୍ୟ, ଶାରିରୀକ ସୁରକ୍ଷା, ମାନସିକ ସୁସ୍ଥତାକୁ ଅଧିକ ମାତ୍ରାରେ ଗୁରୁତ୍ୱ ଦିଆଯିବ । ଏଥିପାଇଁ କାଉନ୍ସେଲିଂ କରାଯିବ । ରିପୋର୍ଟିଂ ମେକାନିଜିମ୍କୁ ତ୍ୱରାନ୍ୱିତ କରାଯିବ । ଯଦି କୌଣସି ବିପର୍ଯ୍ୟୟରେ ପିଲାଙ୍କ କ୍ଷତି ହୋଇଥାଏ ତେବେ ତାର ରିପୋର୍ଟ ୨୪ ଘଣ୍ଟା ମଧ୍ୟରେ ସରକାରଙ୍କୁ କର୍ତ୍ତୃପକ୍ଷ ପ୍ରଦାନ କରିବେ । ଅଭିଭାବକ, ପିତାମାତା, କମ୍ପ୍ୟୁନିଟି ନେତୃତ୍ୱ ଓ ସ୍ଥାନୀୟ ଲୋକଙ୍କୁ ନେଇ ସଚେତନ କରାଯିବ । ଏହି ନିୟମ ସମସ୍ତ ସରକାରୀ, ଘରୋଇ ସ୍କୁଲ ମାନିବା ବାଧ୍ୟତାମୂଳକ । ନଚେତ କାର୍ଯ୍ୟାନୁଷ୍ଠାନ ହେବ ବୋଲି କୁହାଯାଇଛି ।
